Апта ортасында Жамбыл ауданының орталығы Ұзынағаш ауылында Алматы облысы әкімінің жанындағы әйелдер істері және отбасылық-демографиялық саясат жөніндегі комиссияның көшпелі отырысы болып өтті. Облыс әкімінің орынбасары Бақтияр Өнербаевтың жетекшілігімен өткен алқалы жиынға аталған комиссияның мүшелері, бірқатар департаменттердің басшылары, аудан әкімдерінің әлеуметтік сала жөніндегі орынбасарлары, ішкі саясат бөлімдерінің басшылары, бұқаралық ақпарат құралдарының өкілдері қатысқан еді.
Маңызы мен мазмұны өте жоғары басқосудың күн тәртібіне қойылған «Жамбыл, Іле, Талғар аудандарының әкімдері жанындағы комиссиялардың адамгершілік және жыныстық жағынан тәрбиелеу мен ерте жүктіліктің алдын алу жөніндегі жұмысы туралы» мәселесі бойынша алғашқы болып сөз алған Жамбыл ауданы әкімінің орынбасары Гүлнар Ермекбаева өздерінде қалыптасып отырған жайға жан-жақты тоқталып өтті. Ұстаздармен, дәрігерлермен бірлесе жасаған жұмыстың нәтижесінде өткен жылдан бері ерте жүктіліктің тіркелмегенін тілге тиек еткен ол ауданда жасөспірімдерге сапалы білім, саналы тәрбие беріп, бос уақыттарын тиімді пайдаланулары үшін, қыз балалардың ерте жүктілікке ұрынуының алдын алу жолында көптеген шаралардың қолға алынғанын баяндады. Осы орайда, жыныстық жауапсыздық, одан сақтану үшін қажетті білімнің болмауы, жасөспірімдердің алдында тұратын сұрақтарға ата-аналарының жауап бере алмауы, жыныстық жолмен берілетін аурулардың артуы кәмелеттік жасқа толмағандарды жасанды түсікке немесе ерте жастан ана атануына алып келіп, өзге де бақытсыздыққа ұрындырып жатады. Міне, осындай келеңсіз жағдайларға жол бермеу үшін мектептерде түсіндіру және алдын алу шаралары молынан атқарылуда.
Осы мәселе бойынша екінші болып баяндама жасаған Іле ауданы әкімінің орынбасары Дәурен Жүнісов ауданда тұратын 191 мыңнан аса халықтың 52 пайызы, яғни 99 мың 66-сы әйел азаматтар екенін айта келіп, гендерлік саясат бойынша басшы қызметтер мен кәсіпкерлікті дөңгелентіп жүрген нәзікжандылар туралы мәлімет беріп өткен. Адамгершілік және жыныстық жағынан тәрбиелеу, ерте жүктіліктің алдын алу жұмыстары мұнда да белсенді жүргізіліп, мектеп жасындағы қыз балаларға мұндай жауапсыздық салдарының неге апарып соқтыруы мүмкін екені жан-жақты түсіндірілуде. Осы орайда үгіт-насихат, түсіндіру, ата-аналармен әңгімелесу шаралары, жастарды ерте бастан денсаулығын сақтауға үндейтін түрлі тақырыптағы 35 кездесулер, 28 «дөңгелек үстел» басындағы әңгіме, дәрігерлік кеңестер өткізілген. Бұл өзекті мәселе бұқаралық ақпарат құралдарында да кеңінен талқылануда.
– Жыныстық қатынасқа ерте түсудің алдын алу жұмыстары жүргізіліп жатқанына қарамастан, өкінішке орай, мұндай жағдайлар ішінара тіркеліп отыр, – деді Дәурен Қабдолдаұлы. – Мысалы өткен жылы прокуратура, ішкі істер бөлімі және әкімшілік бірлесе өткізген тексерулердің нәтижесі бойынша 12 жағдай анықталып отыр. Бұлардың төртеуі мектеп жасындағы тұрғылықты қыз балалар болса, 8-і басқа облыстар мен Алматы қаласынан келгендер. Олардың көпшілігінің колледжде оқитынын айта кету керек. Екі қыз бала әке-шешелерінің келісімі бойынша тұрмыс құрып, отбасы болғандар. Бұл жерде белгілі бір ұлттардың дәстүрлері бойынша қыз балалардың 16 жастан тұрмысқа шығатыны тағы бар. Соған қарамастан аталған жағдайлар бойынша қажетті шаралар қабылданып, кемшілікке жол берген оқу мекемелерінің басшылары жауапқа тартылған.
Талғар ауданында да жасөспірімдерді жыныстық мәдениетке тәрбиелеу, ерте жүктіліктің алдын алу шаралары кең көлемде жүргізілуде. Өздерінде атқарылып жатқан жұмыс жайлы баяндаған аудан әкімінің орынбасары Дәрменияр Қыдырбекұлы өткен жылы ерте жыныстық қатынасқа түскен жалғыз ғана жағдай тіркелгенін тілге тиек етті. Оның өзі Алматыдан келіп колледжде білім алып жатқан бойжеткен екені анықталған. Алдағы уақытта мұндай кемшіліктерге жол бермеу шаралары жан-жақты жүргізілуде. Бұл жерде шетелдік көркемфильмдер мен ғаламтор желілері арқылы келіп жатқан жатпиғылды ақпаратқа тосқауыл қоюды қолға алудың маңызы зор.
Алматы облысы ішкі саясат басқармасының басшысы Ғалиасқар Сарыбаев та көтеріліп отырған мәселе жөнінде ой бөлісті.
Күн тәртібіндегі екінші мәселе – «Балқаш, Қарасай аудандарының әкімдері жанындағы комиссиялардың әйелдерді саясатқа тарту жөніндегі жұмысы» туралы тиісінше аудан әкімінің орынбасарлары Сайран Смағұлов пен Ғалия Амановалар кең көлемде мәлімет беріп өткен. Бұл бағытта Елбасының тікелей қадағалауы бойынша нәзікжандылардың жауапты лауазымдарға көптеп тартылып жатқанын айта кету керек. Әсіресе, денсаулық сақтау мен білім беру саласында, биліктің үш тармағында, бизнесте олардың үлесі жыл санап көбейіп келеді. Ғалия Матанқызының баяндамасында көрсетілгендей, Қарасай ауданында бұл жұмыс әсіресе қарқынды жүргізуде. Қандай қызметте болса да өз міндеттеріне жауапты қарайтын нәзікжандылар өзгелерге үлгі көрсетуде.
Облыстық білім басқармасы басшысының орынбасары Гүлсара Исағұлова «Балаларға, жастарға арналған мектептен тыс мекемелер желісі мен бос уақытты өткізу орталықтарын дамыту және олардың қызметін қамтамасыз ету жөніндегі шаралар» мәселесі бойынша баяндама жасады. Бұл жерде өлкемізде тұрақты түрде жұмыс жасайтын мектептен тыс мекемелер, спорт үйірмелері, өнер орталықтарымен қатар жаз айларында оқушылар демалатын арнайы лагерьлер жөнінде де кең көлемде мәліметтер беріліп өтті. Ал төртінші мәселе бойынша: «Ана мен бала өлім-жітімін азайту, түсік санын төмендету және ана қауіпсіздігі әдістерінің халық үшін қолжетімділігін қамтамасыз ету жөніндегі шаралар» туралы баяндама жасаған облыстық денсаулық сақтау басқармасы басшысының орынбасары Сәуле Құсмолданова күн тәртібіне қойылып отырған тақырыптың маңыздылығына тоқтала келіп, осы бағытта атқарылып жатқан істерді көрнекі слайдтардың көмегімен көпшілікке ұғынықты етіп айтып берді. Сәуле Ырысбекқызы өлкемізде сәбилердің дүниеге келуі көрсеткішінің өсіп келе жатқанын айта келіп, жастардың жыныстық мәдениетін көтеру, ана болу жасындағы әйелдердің денсаулығын жақсарту, ана мен сәби өліміне алып келетін аурулар мен әлеуметтік мәселелер төңірегінде маман кеңесін ортаға салған. Ал облыстық денешынықтыру және спорт басқармасы басшысының орынбасары Алмат Үшкемпіров халық арасында салауатты өмір салтын қалыптастыру құралы ретінде бұқаралық спорт пен денешынықтыруды насихаттау мәселесі бойынша атқарылып жатқан жұмыстарды жиналғандардың назарына ұсынды. Бұл бағытта да облысымызда қол жеткізген жетістіктердің жетерлік екендігі жұртшылыққа мәлім. Лондон Олимпиадасында біздің спортшылар алған биіктер, өзге де әлемдік жарыстарда елімізге олжа салып жүрген жетісулық қыз-жігіттер жалпы жастарға спортпен айналысудың қажеттігін көрнекі түрде көрсетуде. Ал соңғы жылдары өлкемізде бұқаралық спортты дамытуға күрделі қаржы бөлініп, түрлі спорттық нысандардың бой көтеріп жатқанына куә болып келеміз.
Күн тәртібіне қойылған мәселелердің маңыздылығына назар аударған комиссия отырысының төрағасы Бақтияр Әлтайұлы жасалынып жатқан жұмыстарға оң бағасын бере келіп, әлі де болса жасалынуға тиісті шараларды ашып көрсетті.
Басқосудың соңында Алматы облысы әкімінің жанындағы әйелдер істері және отбасылық-демографиялық саясат жөніндегі комиссия мен облыстық іскер әйелдер ассоциациясының ұйымдастыруымен Қазақстан Республикасы Тәуелсіздігінің 25 жылдығына арналып «Іскер әйелдің имиджі» тақырыбында тренинг жүргізілді. Тренингті аталған ұйымның төрайымы, «Нұр Отан» партиясы саяси кеңесінің мүшесі Р. Салықова кіріспе сөзбен бастап, әлеуметтік және гендерлік зерттеулер ғылыми-зерттеу институтының директоры, философия ғылымдарының докторы Зәмзә Қодар жиналғандармен әйелдердің көшбасшылық қабілеттерін қалыптастыру жөнінде тәжірибе сабақтарын өткізді.
Қуат Қайранбаев
Жамбыл ауданы.