«Басы ауырмағанның құдаймен ісі жоқ» деген сөз бар. Сол айтқандай, жайшылықта адамдардың денсаулығын жақсарту жолында тыным таппай еңбек етіп жүрген ақжелеңді жандар жайлы ойлана бермейтініміз жасырын емес. Алайда, ерте ме, кеш пе, дәрігердің алдына бір баратынымыз да ақиқат. Ағзамызға шипа қонып, дертімізден айығып шыққан кезде олар атқаратын қызметтің маңыздылығына мән беріп, ризашылығымызды білдіріп жатамыз.
Жамбыл ауданына қарасты Қарғалы ауылындағы аудандық аурухананың ұйымшыл ұжымы жайлы жақсы сөздерді бұрыннан естіп жүруші едік. Сондықтан «Мың рет естігенше, бір рет көрген артық» деген тәмсілге сүйене отырып, Алматының іргесіндегі ауылға арнайы ат басын бұрдық. Екі қабатты еңселі ғимарат алыстан көзге шалынып, айналасындағы жасыл желегімен, тап-тұйнақтай тазалығымен жаныңа шуақ құятындай. Алдымыздан жолыққан медициналық мекеменің қызметкерлері жылышырай танытып, басшыларының бөлмесіне барар бағытты сілтеп жіберген. Бас дәрігердің жұмыс бөлмесі кең болғанымен артық-ауыс дүниені байқай қоймадық. Бұл да болса оның қарапайымдығы мен қанағатшылдығын аңғартатын шығар деп ой түйдік. Ашық-жарқын мінезімен бірден баурап алып, өзі басқаратын медициналық мекеменің жай-күйін асықпай баяндай бастады.
Жалпы Қарғалының ежелден іргелі елді мекен болғаны көпшілікке мәлім. Кеңес одағы кезінде мұнда бірегей шұға комбинаты орналасып, әскери шинельдер, түрлі жамылғылардан бастап киім-кешектің неше түрі шығарылған көрінеді. Өндіріс ұлғая келе Ұзынағаш, Қаскелең, Үшқоңыр тәрізді ауылдардың біраз тұрғыны осында еңбек еткен. Сол жылдары қала типтес поселке атанып, халықтың саны да артқаны белгілі.
Емдеу мекемесінің тарихы да таңдай қақтырмай қоймайды. Бірде балабақша, бірде милиция бөлімінің ғимаратында орналаса жүріп ақжелеңді абзал жандар халыққа сапалы медициналық қызмет көрсете білген. Аурухана бас дәрігерлерінің бірі – Салиха Меңдібаева қазақтың екінші ғарышкері Талғат Мұсабаевтың анасы болғаны өз алдына бөлек әңгіме. Ал 1960 жылы бүгінгі еңселі ғимараттың іргетасын қалап, жұмысын жолға қойған бас дәрігер Ысқақ Әлібеков Социалистік Еңбек Ері атағын алған. Ол мұндай құрметке ие болған ауылдық деңгейдегі алғашқы дәрігер десе де болады.
Алматы мемлекеттік медицина институтының стоматология факультетін жақ-бет сүйегі хирургі мамандығы бойынша тамамдап, Қарғалы ауылына жолдамамен келген Сертай Сағиев өз өмірін осы ауылмен бүтіндей байланыстыратынын ойламаған да болар. Алдыңғы буын ағаларынан үйрене жүріп, өзінің білімді маман, білікті ұйымдастырушы екенін көрсете білген жас жігітті ауданның бас дәрігері Қадыр Омаров аудандық тіс емханасының бас дәрігері қызметіне тағайындайды. Бұл лауазымды өз дәрежесінде атқарып, ел алғысына бөленген Сертай Сейфуллаұлының еңбек жолын бастаған Қарғалы ауылдық ауруханасына қайта оралғанына да біраз жылдың жүзі болды. Сонау қиын-қыстау жылдары бөлінетін қаражаттың болымсыздығынан тозып кеткен аурухана ғимаратын, оның төңірегін қалпына келтіру де оңай болған жоқ. Алайда, өзіне тапсырылған жұмысқа жауапкершілікпен қарап, ынта-шынтасымен атқаруды әдетке айналдырған бас дәрігер аз жылдың ішінде көп істерді тындырып үлгерді. Ғимараттың іші-сыртына күрделі жөндеу жүргізіліп, емделушілерге жақсы жағдай туғызылған. Емханаға қажетті медициналық қондырғылардың қатары да жыл өткен сайын толығып келеді. Сандық рентген аппараты, «жедел жәрдем» көліктері жаңартылып, шұғыл көмекті қажет ететін жандарға қызмет көрсете бастаған. Емдеу мекемесін қаржыландыру мәселесін жеңілдетіп, дәрігерлік қызмет сапасын жақсарту мақсатында Қарғалы ауруханасына «аудандық» дәреже алудың да оңайға түспегені белгілі.
Әрине, ғимараттың ішін алтынмен аптап, күміспен күптеп қойсаң да мамандардың жоғары біліктілігі мен өз жұмысына деген жауапкершілігінсіз жақсы нәтижелерге қол жеткізу мүмкін емес. Осы орайда Сертай Сейфуллаұлы медицина қызметкерлерінің жеке жауапкершілігін арттыруды үнемі назарда ұстап келеді. Бүгіндері ауруханада 285 қызметкер еңбек ететін болса, олардың 50-і жоғары білімді дәрігерлер. Мұнда ота жасау, перзентхана, жансақтау, терапия, жұқпалы ауруларды емдеу қатарлы сегіз бөлімше тұрақты түрде жұмыс жасауда. Жыл сайын Сертай Сейфуллаұлының өзі медицина институттарына барып, оқу бітіргелі отырған жастарды жұмысқа шақыруды дәстүрге айналдырған. Ал жоғары санатты 16 дәрігер оларға тәлімгерлік көрсетіп, мамандықты тезірек меңгерулеріне, ұжымға кірігіп кетулеріне көмектеседі.
Ұжым демекші, Қарғалы ауруханасында директордың тікелей бастамасы бойынша жұмыстан тыс уақытта да көпшілік шаралар ұйымдастырылып тұрады. Әр сенбі сайын қызметкерлер ақ- желеңдерін спорттық киімге алмастырып, түрлі жарыстар өткізуді дәстүрге айналдырған. Осындай шара барысында әріптестер арасында жақсы қарым-қатынас орнап, бір-біріне көмекке келу, достық пен туыстық сезімдердің қалыптасатыны белгілі.
– Адамдарға саламатты өмір жайлы насихат айту үшін дәрігерлердің өздерінің денсаулықтары жақсы болуы керек. Ол үшін спортпен айналысқан абзал, – дейді Сертай Сағиев бұл жайлы сұрағанымызда.
Аудан мен облыс қана емес, республикалық дәрежедегі түрлі байқаулардың жеңімпазы атанып, әріптестері арасында оза шауып жүрген жарастығы келіскен ұжымның құпиясы да осы ауызбіршілік екен ғой деген оймен ауруханадан аттандық.
Қуат Қайранбаев
Жамбыл ауданы.