Ертеде “Науатоған” болып құрылып, кейіннен Алғабас аталған ауылдың тұрғындары шаруасын шалқытып отыр. Мемлекет тарапынан шағын және орта кәсіпкерліктің дамуына көптеп көңіл бөлінгелі тыңнан түрен салынды. Егін егілді. Өрістеп шығар мал тұяғы көбейді. 2005 жылы іргетасын қалап, бидай егуден бастаған «Хафиза» шаруа қожалығы соның дәлелі іспетті.
Біз барғанда егінге комбайн түсіп, шаруалар жиын-терін бабымен қарбаласып жатты. Егіннің бітік шыққаны бірден білінеді. Сары алтындай түске еніп, толқындана жайқалған егістік тізеден асады. Биылғы дәнді дақылдардың түсімі жайлы сөз өрбіткенімізде, «Хафиза» шаруа қожалығының басшысы Ербол Мәмбеков жаз бойы табиғаттың ерекше пейілі түскенін айтты. Мәселен, өткен жылы бидайдан гектарына 15 центнерден айналса, биыл бұл көрсеткіш гектарына 23 – 25 центнерге дейін артып, жерді емген жандардың еңбегі жанған. Оның үстіне, егін тұқымын Кербұлақ ауданына қарасты Қарашоқы ауылынан алатындықтан тұқымның сапасы да жақсы. «Ақбидай» сортының ерекшелігі сол, Шақбақты тауларына, нақтырақ айтқанда, шөлге аса шыдамды келеді.
– Қазірде еншімізде 156 гектар егістік жер бар. Оның негізгі бөлігін таулы жер болғандықтан бидай, арпа сынды жаңбыр суымен өсетін дәнді дақылдарға сай жыртып, баптаймыз. Демалдырып, тыңайтып отыратын жерлеріміз де бар. Бұдан бөлек, осы жылы 15 гектар жерге майлы дақыл ектік. Қазірге өсімі көңіл көншітуде. Болашақта осы егіс түрін көптеп егуді жоспарлап отырмыз, – дейді Ербол Мәмбеков.
Мұнан сырт, шаруа қожалығы басшысының айтуынша, екі мыңнан астам жайылымдық жері бар бұл ұжым бүгінде егіншілікпен қатар мал шаруашылығын да дамытып отыр. Бүгінгі таңда 30 тұяқ жылқы, 50 бас сиыр, бір отар қой өргізуде. Осы тұста мемлекет тарапынан қандай көмек болып отырғанын сұрағанымызда, бізбен бірге егіндік басына барған округ әкімі Ерік Тұрғанбаев бұл жайлы да баяндап берді.
– Біз ауыл шаруаларына көмектесіп отырамыз. Біздің округте 61 жеке шаруа қожалық бар. Бәріне мемлекеттік бағдарламалар жайында ақпарат беріп отырамыз. Мысалы, өздеріңіз таныса келген осы «Хафиза» шаруа қожалығы 2010 жылдан бастап мал өсіруге ден қойды. Соны ескеріп, өткен жылы ұжымды «Сыбаға» бағдарламасына қатыстырғанбыз. Нәтижесінде 25 бас аналық, бір бас аталық мал алып, ірі қара санын еселей түсті. Округте мұндай жағымды жаңалықтар аз емес. Бір сөзбен айтқанда, ауыл гүлденіп келеді, – дейді округ әкімі.
Көксу ауданына қарасты бұл елді мекеннің Алғабас атануы да тегін емес. Жан-жағын тау қоршаған ауылдың бүгінде еңбегі ретті, тіршілігі тиянақты көрінді. Ал «Хафиза» шаруа қожалығының егіні мен малы түгел осы таудың танабын еміп, төскейді берекеге бөлеп отыр.
Қозыбай ҚҰРМАН.