Жақында Достық үйі – Қоғамдық келісім орталығының ұйымдастыруымен тәуелсіздіктің 25 жылдығы аясында Конституция күніне арналған «Ата Заңым – айбыным!» деген тақырыпта форум өтті. Оған «Ұлағат» ақсақалдар кеңесі, «Бірлік» жастар қауымдастығы, «Парасат» клубының мүшелері қатысты. Жиынды орталық директоры Тәңірберген Қасымберкебаев ашып, жүргізді.
Форумда Сарқан ауданы аналар кеңесінің төрағасы Есбала Сыдырбаева сөз сөйлеп, бақыт пен шаттықтың таласқан жерге емес, жарасқан жерге баратынын айтты. – Біздің Ата Заңымыз да Қазақстан халқының саналы таңдауы, өркенді дамуымыздың кепілі. Конституцияны құрметтеу және сақтау арқылы оның тарихы мен маңызын білеміз. Ел құндылықтарын құрметтеп, еліміздің дамуына, қоғамдық келісімге, бейбітшілік пен тыныштыққа қол жеткізе аламыз,– деді ол. Жиын барысында сөз алған облыстық ардагерлер кеңесінің төрағасы Ермек Келемсейіт Конституцияның маңыздылығы мен құндылығы жайында айтып, барша жиналған қауымды мерекемен құттықтады.
Шара аясында «Мектепке жол» қайырымдылық акциясы ұйымдастырылып, Достық үйі және орыс, қытай этномәдени орталықтары мүшелері әлеуметтік жағдайы төмен отбасыларының балаларына қамқорлық танытып, мектепке қажетті құрал-жабдықтармен қамтамасыз етті. Ақ пейіл, ізгі ниеттен туындаған сауапты іс көпшіліктің көңілінен шықты. Басқосу соңында ел бірлігін сақтауға үлес қосып жүрген бірқатар мекеме қызметкерлері мен белсенді азаматтар Достық үйі – Қоғамдық келісім орталығы директорының Алғыс хатымен марапатталды.
Жақсы-жайсаңдардың басқосуы этномәдени орталықтар көркемөнерпаздарының мерекеге арналған концерттік бағдарламасымен аяқталды.
Гүлжан Мұқашқызы.