Тәуелсіздіктің арқасында еліміздің экономикалық саласы қарқынды дамып, құрылыс, тұрғын үйге қатысты мәселелер де оң шешімін тапты. Әсіресе, тұрғындарды баспанамен қамтудағы қазақстандық тәсілдің тиімділігі жұрттың көңілінен шығып келеді. Тұрмысқа қолайлы, қалтаға жүк түсірмейтін пәтерлер салынып, ел игілігін еселеуде. Сол қатарда кезінде Кеңес одағы тұсында салынған ескі үйлерде тұрып жатқан тұрғындардың мұқтажын шешу бағытында бірқатар шаруа тындырылды. Сол қуаныштың жалғасындай күні кеше Көксу ауданының Балпық би кентінде 50 пәтерлі үйдің кілті иелеріне табысталды.
Елу отбасын қуанышқа бөлеп, одан да көп жүректі елжіреткен қоныстойға аудан әкімі Әділ Алмас қатысып, тұрғындардың қуанышымен ортақтасып, пәтер кілтін табыстады. Аудан басшысы алдымен өңірдің тәуелсіздіктің жиырма бес жылындағы өрелі жетістіктеріне тоқталды. Сондай-ақ, Рио Олимпиадасындағы жеңісімізді тілге тиек ете келіп, қазақстандық спортшылардың табысын мақтанышпен еске алды. Астанада өтетін «ЭКСПО – 2017» халықаралық көрмесінің маңыздылығын да атап көрсетті. Осыдан кейін алдағы жоспарларымен де бөлісе кетті. Оның айтуынша, келесі жылы орталық стадион толығымен күрделі жөндеуден өтеді. Өткен жылы Кеңарал ауылында жаңа мектеп салынса, Жамбыл ауылындағы жаңа оқу ордасының жуық арада ел игілігіне берілетіндігін жеткізіп, аудан аумағында жасалып жатқан жол мен газ құбырының өңір экономикасын өркендетуге зор серпін беретіндігіне сенім білдірді.
Естеріңізге сала кетейік, 2014 жылы Көксу ауданының орталығы Балпық би кентіндегі Қабанбай батыр көшесіне орналасқан 1, 2, 5, 6-шы үйлер қауіпті деп танылып, ондағы тұрғындарды басқа қонысқа орналастыру мәселесі көтерілген еді. Осыған орай аудан әкімінің тапсырысы бойынша жобалаушы мекеме «Жетісу Сәулет Құрылыс» ЖШС Балпық би кентінен 50 пәтерлі коммуналдық меншіктегі тұрғын үй құрылысының жоба-сметалық құжаттарын дайындаған болатын. Сол тұста құрылыстың құны 366 миллион 190 мың теңгеге бағаланған. Облыстық құрылыс басқармасы өткізген мемлекеттік сатып алу хаттамасына сәйкес бұл үйдің құрылысын жүргізуге мердігер болып А. Бузыкин басқаратын «Строитель» ЖШС бекітілген. Міне, құрыш қолды жұмысшылардың тынымсыз еңбегінің нәтижесінде жергілікті бюджеттен бөлінген қаржы толығымен игеріліп, жаңа үй өз иелеріне табысталды.
Жаңа үйдің кілтін бірінші болып Разия Ибрагимова алса, одан кейін Саят Қойшыбаев пен Сәбетқан Тантибаева бастаған елу адамға толығымен кілт тапсырылды. Әсіресе жаңа қонысқа ие болған ақсақалды қариялар мен ақжаулықты апаларымыздың қуанышында шек жоқ. Осындай қуанышқа кенелткен Елбасына, облыс әкімі Амандық Баталовқа, аудан әкімі Алмас Әділге көпшіліктің алдында бата беріп, алғыс жаудырса, жаңа пәтер иесі Бауыржан Өсербай көпшіліктің жүрекжарды ойын жеткізді.
Жанарларында қуаныш нұры ойнаған тұрғындарды көріп, біз де жадырап қалдық. Бұл қуаныш аудан әкімімен бірге үйлерді аралап, құтты болсын айтқан тұста еселене түсті. Расында, 15 бір, 15 екі, 20 үш бөлмелі үйдің бәрі де бүгінгі өлшем, талап, сапа негізінде салынғандықтан құрылыс жұмысының сапалы жүргізілгені көрініп тұр. Демек, осы жаңа үйлерден жарқын болашақ өркендеп өседі.
Қажет АНДАС
Көксу ауданы.