Білімі мен білігі, мәдениеті жоғары, іскерлікке қабілетті елдің азаматтары өркениет көшін өрге бастайды. Бұл орайда жас ұрпаққа білім-тәрбие беріп, аталмыш дағдыларды балалардың бойына дарытуға мұғалімдердің қосар үлесі мол. Оқушылардың мектепте алған білімін өмірде кеңінен қолдануына жол ашуды мақсат тұтатын бүгінгі білім беру жүйесіне қойылып отырған талап та зор. Биылғы жаңа оқу жылы мұғалімдер қауымы үшін оқытудың жаңа сатысына қадам басуымен ерекшеленіп отыр. Орта білім ошақтарының 1-сыныбына жаңартылған білім бағдарламасы енгізілуде. Жаңаша оқытудың мән-маңызы, орындалу барысы мен жас ұрпақтың білім-тәрбиесіне қатысты көпшілікті толғандырар өзекті мәселелерді талқылаған білім қызметкерлерінің дәстүрлі тамыз кеңесіне де елімізді өркениет жолына бастайтын, жас ұрпақтың жарқын болашағын айқындайтын «Білімді ел – Мәңгі ел» тақырыбын арқау етті. Ұстаздар жиынының пленарлық мәжілісі І. Жансүгіров атындағы Мәдениет сарайында өтіп, оған Қазақстан Республикасы Білім және ғылым министрлігі Білім және ғылым саласындағы бақылау комитетінің төрағасы Ахметжан Пірімқұлов, облыс әкімінің бірінші орынбасары Лаззат Тұрлашов, сондай-ақ, облыстық басқарма, кәсіподақ ұйымдарының, білім бөлімдерінің басшылары, аудан, қала әкімдері, ата-аналар комитеттерінің төрағалары, мектеп директорлары мен ұстаздар қауымы қатысты. Кеңесті облыс әкімінің орынбасары Бақтияр Өнербаев жүргізіп отырды.
Тамыз кеңесіне қатысушылар алғашқы кезекте білім беру саласының озық үлгілері мен оқытудың жаңа технологиялары қойылған көрмені аралап, облыстағы игі жетістіктерге көз жүгіртті. Бұдан соң облысымызда осы сала бойынша атқарылып жатқан жұмыспен бейнекөрсетілім арқылы танысты.
Алғашқы болып мінбеге көтерілген облыстық білім басқармасының басшысы Ләззат Базарқұлова баяндама жасап, өткен оқу жылының қорытындысы жайлы айта келіп, алдағы міндеттерді саралады.
– Қазіргі таңда еліміздің болашақ ұрпағына білім беру мәселесі – мемлекетіміздің басты ұстанымы болып отыр. Білім беру жүйесіндегі өзгерістер мен түбегейлі жаңарулар Қазақстан Республикасында білім беруді және ғылымды дамытудың 2016–2019 жылдарға арналған мемлекеттік бағдарламасында айқын көрініс табуда.
Бүгінгі құбылмалы, шапшаң өзгерістер заманында «Білім туралы» Заңға қажетті өзгерістер мен толықтыруларды уақытында енгізіп отыру – бүгінгі күннің басты талабы. Қазақстанның әлемдік үрдістерге кіруі, дамыған елдердің стандарттарына деген ұмтылысы білім беру жүйесінің жаңа сапалық деңгейге өту қажеттілігін арттыруда. Осы міндетті жүзеге асыруда білім жүйесін қаржыландыру жылдан жылға ұлғайып, биыл облыс бюджетінің 39,9 пайызын құрады. Соған орай қазіргі уақытта 47 білім беру нысаны салынды. Үшауысымды білім беру мекемелерінің мәселесі оңды шешімін тауып, оқу жылы барысында 7 мектеп, 7 балабақша пайдаланылуға беріледі. 34 білім беру нысанына күрделі жөндеу жұмысы жүргізіліп, толығымен аяқталуда.
Қысқы жылыту маусымына дайындықтың баса назар аударуды қажет ететіні сөзсіз. Барлық білім нысанының жылыту жүйесі мен қазандықтарының жағдайларын тексеру жұмыстары жүргізіліп, мектеп ғимаратының ішінде орналасқан қазандықтарды сыртқа шығару үшін 45 білім беру мекемесіне 200 млн. 100 мың теңгеге жылжымалы қазандық сатылып алынды.
Ақпараттық-коммуникативтік технология ХХІ ғасыр білімінде зор рөл атқарады. Сондықтан да облысымызда оқытудың интерактивті нысандарын тиімді қолдануға, білімді ақпараттандыруға баса көңіл аударылады. Қазіргі уақытта 1 компьютерге 11 оқушыдан келеді. Облыста 140 білім беру ұйымы «Е-learning» электронды оқыту жүйесіне қосылса, 190-ы «Білім Ланд» медиа ресурстарымен жұмыс жасауға мүмкіндік алып отыр.
Білім беру ұйымдарының 81 пайызы кеңжолақты Интернет желісіне қосылған. Білім беру мекемелері заманауи техникамен жабдықталып, сабақтарда толық қолданылуда. Десек те, облыс бойынша жаңа заман талаптарына жауап бере алмайтын 7248 компьютер ауыстыруды қажет етеді. Өйткені ең озық білім кеңістігіне енудің тиімді жолы білім беру саласын толықтай ақпараттандыру құралдарымен жабдықтауға байланысты болып отыр. Сондықтан аудандық, қалалық білім бөлімдерінің басшылары аталған мәселенің оңды шешілуін қамтамасыз етуі қажет.
Барлық білім беру жүйесінің негізі – мектепке дейінгі тәрбие болып табылады. Бүгінгі таңда 837 мектепке дейінгі ұйымда 60 мыңнан астам бала оқумен қамтылған, бұл 79 пайызды құрайды. Мемлекеттік-жекеменшік серіктестікті дамытуда жекеменшік балабақшалар желісі 227 бірлікке артып, жалпы балабақша санының 56 пайызын құрады. Мектепке дейінгі ұйымдар желісін арттыру бағытындағы жұмыстарға қарамастан облысымыздың көрсеткіші республикалық деңгейден төмен, облыс әкімінің тікелей тапсырмасына сәйкес жыл соңына дейін 88 білім мекемесін ашып, 87 пайызға жету көзделіп отыр.
Мемлекеттік-жекеменшік әріптестік аясында балабақша құрылысына жекеменшік инвесторларды тарту жұмысы жалғасуда.
Жыл сайын мектепке дейінгі ұйымдардың тапшылығы мәселесін шешу үшін қажетті қаржылық-экономикалық жағдай жасалуда. Облыс әкімінің басшылығымен кәсіпкерлерді тарту арқылы өткен жылы ашылған 99 балабақшаның 88-і жекеменшік. Биыл да осы бағыттағы жұмыстар өз жалғасын таба береді және аудан, қала әкімдерін, үкіметтік емес ұйымдарды балабақша желісін дамыту үшін бірлесіп жұмыс атқаруға шақырамын, – деді облыстың бас ұстазы.
Елбасымыз қазіргі таңдағы қиындықтар мен бюджеттік шектеулерге қарамастан білім саласын одан әрі дамыту, жаңа білім беру мазмұнына көшу барысында бірқатар тапсырмалар мен міндеттерді алға қойғандығы белгілі. Оны орындауда облысымызда отандық және озық халықаралық тәжірибені енгізу арқылы 37 тірек мектеп, 2 балабақша, 4 инновациялық алаң жұмыс жасайды. Екі мектеп білім мазмұнын жаңарту бойынша апробациядан өтіп, оқу-әдістемелік кешендердің оқу үрдісінде қолданылу тиімділігі дәлелденген. Орта білімді жан басына шаққандағы қаржыландыру үшін 4 мектеп апробациядан өтті. Сонымен қатар, онлайн және тұрақты семинарларда 2671 мұғалімнің тәжірибесі таратылды. Соңғы 3 жылда облыстық әдістемелік кабинет арқылы 54 педагогтің авторлық бағдарламалары бекітіліп, оқу үрдісіне элективті курстар енгізілуде. Осындай жүйелі жұмыстардың нәтижесінде облысымызда шығармашылықпен жұмыс істейтін, инновациялық технологияны меңгерген педагогикалық ұжымдар жүйесі қалыптаса бастады.
Биылдың өзінде 12 педагог түрлі республикалық байқауларда жеңімпаз атанса, физика, математика пәні мұғалімдерінің ағылшын тіліндегі олимпиадаларының бас жүлдесін иеленген облыс ұстаздары командалық есепте республика бойынша 2-орынға табан тіреген.
Мектептерге робототехника курсын енгізу – балаларды жоғары технологияға толы жаңа өмірге дайындаудың таптырмас жолы. Оларға заманауи конструктивті-жобалау және бағдарламалаудың негізгі қағидаларын үйрету мақсатында бүгінгі таңда 448 мұғалім робототехника негіздері бойынша курстан өткен. Осы бағытта І. Жансүгіров атындағы Жетісу мемлекеттік университеті жаңа оқу жылынан облысымыздың 10 мектебін тәжірибе алаңы ретінде робототехникаға қажетті материалдық-техникалық базамен қамтамасыз етпек.
– Ұлы педагог К. Ушинский: «Мұғалім – өзінің білімін үздіксіз көтеріп отырғанда ғана мұғалім, ал оқуды, ізденуді тоқтатқанда, оның мұғалімдігі де жойылады», – деген екен. 12 жылдық білім беру жағдайында педагог – ең алдымен, кәсіби деңгейі жоғары, интеллектуалдық, шығармашылық әлеуеті мол тұлға болуы тиіс. Сол себепті соңғы жылдары педагогтардың біліктілігін арттыру жүйесінде түбегейлі реформа жүргізілуде. Бүгінгі күнге дейін облыс бойынша білім мазмұнын жаңарту бағдарламасы аясында 6479 педагог біліктілікті арттыру курстарынан өтті. 2012 жылдан бері жаңа жүйе бағдарламасы негізінде 5486 мұғалім мен 337 мектеп директоры біліктіліктерін жетілдірді.
Білім беру мазмұнының жаңаруы – біз үшін жоғары ұйымдастырушылықты, жауапкершілікті, тәртіпті, әрбір педагогтың бейімделгіш болуын, ұжымдық бірлік, өзара қолдау мен өзара түсінушілікті қажет ететін үлкен жауапты сын болып отыр. Сондықтан барша ұстаздар қауымы өз кәсіби міндеттерін үлкен жауапкершілікпен атқаруы керек.
Өткен оқу жылында облысымыздың білім беру мекемелері 1281 жас маманмен толықты, оның 1025-і «Дипломмен ауылға» бағдарламасы аясында ауылды жерлерге жұмысқа орналасты. Оларға жан-жақты әлеуметтік қолдау көрсетілуде. Солай бола тұрса да бүгінгі таңда облыс мектептеріне математика, физика, орыс тілі, химия пәндері бойынша 107 маманға қажеттілік бар. Осы мәселені шешу үшін білім басқармасы жоғары оқу орындарымен бірлесіп жұмыс атқаруда.
Жүргізілген сауалнаманың қорытындысы бойынша жас мамандардың 64 пайызы қосымша білім беруді және 90 пайызы тәлімгерлік көмекті қажет ететіні анықталды. Облыстық әдістемелік кабинетке жас маманмен жүргізілетін жұмысты жандандыруды тапсырамын.
Ағымдағы жылдың бірінші жарты жылдығында білім саласындағы бақылау департаменті тарапынан 109 білім беру ұйымында мемлекеттік аттестаттау өткізілген. Аттестация барысында кейбір білім беру ұйымдарында материалдық-техникалық базаның төмендігі, жаңа модификациялық кабинеттер мен технология кабинеттерінің, оқу шеберханалары мен зертханалардың аздығы, бітіруші сыныптардағы (4,9,11 сыныптар) оқушылардың білім деңгейінің төмендігі анықталған. Білім беру жүйесінің тұрақты дамуы ұйым басшысының басқарушылық іс-әрекетіне тікелей байланысты екендігіне ешкімнің күмәні жоқ. Білім беру мекемелерінің басшысы лауазымына үміткерлермен әңгімелесу барысында қолданыстағы нормативтік-құқықтық актілерді, оқу-тәрбие үрдісін ұйымдастырып, жүргізуде басшылыққа алатын негізгі құжаттарды, білім саласындағы өзгерістер мен жаңашылдықты жете білмейтіндерді жиі кездестіреміз. Бұл білім бөлімдері басшыларының мектеп директорларын тағайындау және кадрлық резерв дайындау жұмыстарын тиісті деңгейде жүргізбейтіндігін көрсетеді. Сондай-ақ, бұған мұғалімдердің білім беру бағдарламаларын жүзеге асыратын инновациялық технологияларды өз дәрежесінде меңгере алмауы да себеп болып отыр. Білім бөлімі басшыларына аталған мәселелерді жан-жақты зерттеп, нақты іс-шара жоспарын жасақтауды тапсырамын.
Қазіргі таңда барлық әлем жұртшылығының назарын аударып отырған мәселелердің бірі – балалардың жеке сұраныстары мен ерекшеліктеріне сай білім беру үрдісіне тең дәрежеде қосуды қарастыратын инклюзивті білім беру. Осы мақсатта облыстағы 208 мектепте 1645 балаға инклюзивті білім беріледі. Талдықорған, Қапшағай, Текелі қалалары мен Алакөл, Сарқан, Қарасай аудандарындағы жалпы білім беретін 27 мектепте дамуының психикалық тежелуі бар 398 балаға арналған 83 арнаулы сыныптар бар. Қазіргі таңда психологиялық – медициналық – педагогикалық консультацияларда ерекше білім беру қажеттіліктері бар 9966 балаға кеңес берілсе, 1943 балаға сауықтыру түрінде кешенді психологиялық-педагогикалық қолдау көрсетілді. Инклюзивті білім беру барысында оқыту, тәрбие беру және оңалту жұмыстары қатар жүретіндіктен басты мәселе – тиісті кадрлармен қамту және сол мамандардың өз білімі мен тәжірибелерін ортаға салып, инклюзивті білім беруді жүзеге асыруына мүмкіндік жасау болып отыр. Ол үшін әрбір мектеп инклюзивті білім беру мәселесімен жіті айналысуы керек.
Сондай-ақ, облыстағы 9 коррекциялық кабинеттің өз ғимараты жоқ, бөлінген орындар нормативтік талапқа сай емес. Бір ғана мысал келтірсек, 2004 жылдан бері №1 коррекциялық кабинеті Талдықорған қаласының өндірістік индустрия және жаңа технологиялар колледжі жатақханасының 5-қабатынан 500 шаршы метр алаңды пайдаланып отыр. Ол жердің тарлығынан коррекциялық көмек алатын балаларға арналған құрал-жабдықтарды толығымен пайдалануға мүмкіндік жоқ. Сондай-ақ, аталған санаттағы балалардың 5-ші қабатқа кіріп-шығуы үлкен кедергі келтіріп, ата-аналардың да наразылығын тудыруда.
Коррекциялық кабинеттерде түзету, емдеу жұмыстарын тиісті деңгейде жүргізу, нормаға сәйкес келетін жаңа ғимарат құрылысын салу бүгінгі күні кезек күттірмейтін мәселе болып отыр.
Оқушылардың жаңа білім мен дағдыларды меңгеруінде қосымша білім берудің маңызы зор. Облыстағы қосымша білім беретін 38 ұйымда 14449 (4,4 пайыз) бала әртүрлі бағытта шығармашылық, интеллектуалдық және физикалық қабілетін дамытуда. Бұл – республика бойынша төмен нәтиже. Мысалы, Ескелді, Кербұлақ, Ұйғыр аудандарында қосымша білім беру желісін дамыту бағытында жұмыс жүргізілмейді. Мекемелері бола тұра қосымша біліммен қамтамыз етудің төменгі пайызы Қарасай, Іле, Панфилов, Еңбекшіқазақ, Ескелді, Балқаш аудандарында байқалады. Осы бағыттағы жұмысты жандандыру мақсатында ағымдағы жылдың маусым айында Талдықорған қаласында жобалық қуаттылығы 1800 орынға арналған Оқушылар сарайы ашылды. Әлі де болса қосымша білім беру мекемелерінің желісін кеңейту оқушылардың бос уақытын тиімді ұйымдастыруға септігін тигізіп, бала тұлғасын жан-жақты қалыптастыруға ықпал ететініне жергілікті басшылар жете мән бермей отыр.
Бүгінгі күнде қоғамның алдында тұрған басты міндеттердің бірі – балалар мен жасөспірімдер арасындағы құқықбұзушылықтың алдын-алу, кәмелетке толмағандар арасындағы қылмыстың өсуіне жол бермеу. Осы бағытта атқарылып жатқан жұмыстарға қарамастан, өткен жылдың 7 айымен салыстырғанда жасөспірімдермен жасалған қылмыс саны өсуде. Бұл – бүкіл қоғамды алаңдатып отырған өзекті мәселе. Қылмыс санының артуы Қапшағай қаласы, Талғар, Райымбек, Іле, Ұйғыр, Еңбекшіқазақ, Ескелді, Панфилов аудандарында анық байқалады.
Аталған мәселенің алдын алу мақсатында облыстық бюджеттен 27,7 млн. қаржы бөлініп, 122 білім беру мекемесіне 122 немесе 18,3 пайыз әлеуметтік педагог бірлігі берілген. Алдағы уақытта кезең-кезеңімен барлық білім беру мекемесі әлеуметтік педагогпен қамтылатын болады. Бұл жоғарыдағы мәселенің оңды шешілуіне үлкен септігін тигізбек.
Ағымдағы жылдың жаз кезінде балалар мен жасөспірімдердің жазғы демалысы екі бағытта жүргізілді. Сауықтырумен оқушылардың 66,9, ал жұмыспен 55,4 пайызы қамтылды.
Жас жеткіншектердің еңбек нарығына қажетті кәсіптерді таңдауына «Серпін – 2050» әлеуметтік жобасы үлкен ықпалын тигізуде. Аталған жоба аясында солтүстік өңірлердің жоғары оқу орындарында облысымыздың 491 түлегі, ал техникалық және кәсіптік білім беру мекемелерінде 96 студент білім алуда.
Өткен жылғы тамыз кеңесінде аудандық, қалалық білім бөлімдері жұмысын сараптап, рейтингін шығаруды тапсырған болатынмын. Ол ҰБТ қорытындысы, білім мекемелерінің аттестатталуы, оқушылардың, мұғалімдердің түрлі байқауларға қатысу сапасы, құқықбұзушылықты болдырмау, т.б. критерийлер бойынша анықталды. Жыл бойы атқарылған жұмыстың қорытындысы бойынша І орынды Қапшағай, ІІ орынды Талдықорған қалалық, ІІІ орындарды Көксу және Еңбекшіқазақ аудандық білім бөлімдері иеленіп, көш бастап тұр.
Биыл ҰБТ-ға 8899 түлек қатысып, орта балл 80-ді құрады, бұл өткен жылмен салыстырғанда 3 балға артық. «Алтын белгіге» үміткер 364 мектеп бітірушінің 216-сы ғана өз білімін дәлелдей алды, 174 түлек ерекше аттестат иеленді.
Сөзімді қорыта келе, Елбасымыздың бастамасымен өмірге келген «Мәңгілік Ел» ұлттық идеясын жүзеге асыруға үлес қосатын жас жеткіншектерді тәрбиелеуде облыстың педагогикалық ұжымы аянбай еңбек етеді деп сендіремін.
Мәңгілік Елдің білімді ұрпағын тәрбиелеу мен оқытуда табысты нәтижелерге бірге жетейік! – деп аяқтады сөзін Ләззат Тілеубайқызы.
Келесі кезекте сөз алған Қазақстан Республикасы Білім және ғылым министрлігі Білім және ғылым саласындағы бақылау комитетінің төрағасы Ахметжан Пірімқұлов еліміз тәуелсіздігін алған жылдардан бері білім жүйесінің едәуір табыстарға қол жеткізгендігін, ендігі мақсат дамыған елдер қатарына ену үшін қазақстандық білім саласын жоғары деңгейге көтеру екенін атап өтті. Осыған орай биылдан бастап Білім мен ғылымды дамытудың 2016-2019 жылдарға арналған бағдарламасын іске асыру қолға алынуда. Жаңа білім мазмұнына сәйкес оқытуға кезең-кезеңімен көшу жұмысы басталды. Жаңа оқу жылында республиканың барлық орта білім шаңырақтарының 1-сыныбына Назарбаев зияткерлік мектебінің тәжірибесі бойынша жаңартылған білім беру бағдарламасы енгізіледі. Осыған орай өткен оқу жылында 30 мектеп апробациядан табысты өткен. Жаңартылған білім мазмұны бойынша кезең-кезеңімен бес күндік оқу аптасына көшіру жүзеге асырылады. Биыл бірінші сыныпқа қадам басқан оқушылар бес күндік жүйе бойынша оқиды. Бірінші сыныпқа жаңа оқулықтар шығарылып, мектептерге жеткізілген.
Техникалық-кәсіптік білім саласы алдында да үлкен міндеттер тұр. Ең басты міндет – білім сапасының тиісті талап деңгейіне сай болуы. Мемлекет басшысының тапсырмасына сәйкес бірінші жұмысшы мамандығын тегін беру бағдарламасы жасалды. Биыл барлық қажетті шаралар қабылданып, бұл бастама келер жылы жүзеге асырылатынын жеткізді министрлік өкілі.
Бұдан соң жырыссөзге шыққан Талдықорған қаласының әкімі Бағдат Қарасаев биылғы мектеп бітірушілердің Ұлттық бірыңғай тестілеуде 83 балдық білім нәтижесін көрсеткенін, бұл өткен жылмен салыстырғанда 1,5 балға артық екенін жеткізді. Білім көрсеткіші бойынша үздік нәтижеге қол жеткізіп келе жатқан дарынды балаларға үш тілде білім беретін №20, М. Арын атындағы №24 және Талдықорған қазақ-түрік жасөспірімдер лицейлерін даралап атап өтті. Мектепке дейінгі білім беру мекемелерінің желісін дамыту жайына да тоқталып өтті.
Келесі кезекте сөз алған «Өрлеу» біліктілікті арттыру ұлттық орталығы» АҚ филиалы Алматы облысы бойынша педагог қызметкерлердің біліктілігін арттыру институтының директоры Кенжехан Мытыжанов «Біліктілікті арттырудың жаңа жүйесі: құзыретті педагог «Мәңгілік елдің басты тұлғасы» тақырыбында баяндама жасап, жаңартылған білім беру бағдарламасы бойынша мұғалімдерді қайта даярлаудан өткізу жайын саралап өтті.
Сондай-ақ кеңес барысында Ақсу ауданы, Қарашілік орта мектебінің бастауыш сынып мұғалімі Айгүл Исабекова білім беру мазмұнын жаңарту жағдайында бастауыш сыныптағы оқытуды жүзеге асыру жайын баян етсе, Қарасай ауданындағы дарынды балаларға арналған үш тілде оқытатын әл-Фараби атындағы арнаулы гимназияның мұғалімі Гүлдана Елшіманова қазақ тілін оқытудағы жаңаша көзқарасын ортаға салды. Жаңартылған бағдарлама негізінде облысымыз бойынша апробациядан өткен екі білім ошағының бірі – Панфилов ауданы, Х. Хамраев атындағы орта мектеп директоры Зүлфия Машурова осы орайдағы іс-тәжірибесімен бөліссе, Қапшағай қаласы, №2 орта мектептің педагог-психологы мектепті жаңғырту жағдайында білім беру үрдісіне психологиялық қолдау көрсету жайын жан-жақты сөз етті. Қаратал ауданы, Лермонтов атындағы орта мектеп директоры Людмила Котова шағын жинақты мектеп жағдайында педагогикалық үрдісті басқарудағы инновациялық менеджмент жайын, Еңбекшіқазақ ауданы, №14 психологиялық-педагогикалық коррекциялық кабинет меңгерушісі Галина Күзетова мүмкіндігі шектеулі балаларды оқытудың мүмкіндіктерін тілге тиек етті.
Пленарлық мәжіліс жұмысын қорытындылаған облыс әкімінің бірінші орынбасары Лаззат Тұрлашов:
– Құрметті ұстаздар! Сіздерді келе жатқан жаңа оқу жылымен құттықтаймын! Биылғы кездесуіміз еліміздегі айтулы мереке – Тәуелсіздіктің 25 жылдығымен тұспа-тұс келіп отыр. Мұның өзі сіздерге жүктеліп отырған үлкен жауапкершілікті еселей түседі. Еліміздің болашағы – білімді де дарынды ұрпақты тәрбиелеу, ең алдымен, ұлағатты ұстаздар, сіздердің қажырлы еңбектеріңізге байланысты. Сондықтан жаңа оқу жылын жаңа серпінмен бастап, жақсы жетістіктерге жетулеріңізге тілектеспін.
Білімді дамыту Мемлекет басшысы Нұрсұлтан Әбішұлы Назарбаев белгілеген барлық стратегиялық бағдарламалардың тірегі болып келеді. Елбасы ұсынған 5 реформа аясында іске асатын Ұлт жоспары да білім саласына қатысты бірқатар маңызды қадамды қамтиды.
«Өркениеттің шынайы белгісі – мемлекеттің тәрбиелеп шығарған азаматы» деп Елбасы атап көрсеткендей, білімге бағытталған инвестиция – ең қайтарымды, ең игілікті іс болып табылады. Биылғы білім беру саласына 148,76 миллиард теңгеден аса қаржы бөлінді. Үш жыл ішінде білім беру саласының бюджеті 42,5 миллиард теңгеге артты. Елбасының тапсырмасына сәйкес облыста апатты жағдайдағы және 3 ауысымды мектептерді жоюдың қадамдық жоспары жасалып, тиісті шаралар қабылдануда. Соңғы бес жылдың ішінде апатты жағдайдағы 24 мектептің 21-і қайта салынып, екеуі күрделі жөндеуден өткізілді. Қалған бір мектептің құрылысын 2017 жылы аяқтаймыз. Ол Райымбек ауданындағы 600 орынды Сарыжаз орта мектебі.
Облыста үш ауысымда оқитын 51 мектептің мәселесін шешу мақсатында 43 мектеп салу қажеттілігі анықталып, 2015-2017 жылдарға жоспар жасалды. Тек биылға Ұлттық қор есебінен 27 мектеп және 3 балабақша құрылысына 24 млрд. 272 млн. теңге бөлінді.
Үстіміздегі жылы жалпы 9 мектеп, оның ішінде үш ауысымда оқытуды жою үшін Ұлттық қор есебінен 7 мектеп салынып, пайдалануға беріледі. 20 мектеп келесі жылы іске қосылады. Бұдан басқа жергілікті бюджет есебінен 7 мектептің құрылысы жүргізілуде. Қалған үш ауысымда оқитын 9 мектепті 2017 жылы жергілікті бюджет есебінен салу жоспарланып отыр. Келесі жылы апатты жағдайдағы және 3 ауысымды мектептердің мәселесін толықтай шешеміз.
Ендігі кезекте аудан және қала әкімдеріне бұл бағытқа инвесторлардың қызығушылығын тудыру, салаға өз қаржысын салушыларға ыңғайлы жағдай жасау қажет.
Үстіміздегі жылы «Мектеп ауласы» жобасы аясында 452,2 млн. тенгеге 20 білім беру ұйымының аулалары мен алаңдары абаттандырылуда. Бұл оқушыларының салауатты өмір салтын, эстетикалық талғамын қалыптастыруға үлкен ықпал етері сөзсіз, – деді өз сөзінде.
Лаззат Махатұлы оқушы денсаулығының жақсы болуы дұрыс тамақтануға қатысты екенін, соған орай барлық типтік мектептерде ыстық тамақ ұйымдастыру мәселесінің өз деңгейінде жүзеге асуы қажеттігін де атап өтті.
Бүгінгі күні облыстың мектебі жоқ 70 елді мекеніндегі 18251 оқушының 99 пайызы тасымалдануда, 85 бала интернаттарда, 113-і туыстарының үйінде тұрып білім алады. Облыс оқушыларының 16,5 пайызы ғана қосымша білім берумен қамтылған. Бұл өте төмен көрсеткіш екенін айта келіп, қолданыстағы қосымша білім беру ұйымдарының мүмкіндіктерін толығымен пайдаланып, бұл мәселеге ерекше көңіл бөлуді тапсырды. Сонымен қатар облыста жетім және ата-ананың қамқорлығынсыз қалған балаларды патронаттық тәрбиеге алу жұмысының да баяу жүргізіліп жатқанына тоқталып, бұл істі кеңінен насихаттап, осы санаттағы балаларды мүмкіндігінше тұрғын үймен қамтамасыз етуге баса мән беру қажеттігін жеткізді. Бүгінгі күнге 292 бала баспаналы болған, алайда Балқаш, Жамбыл, Қаратал, Кербұлақ, Райымбек, Сарқан аудандарында жергілікті атқарушы органдар тарапынан соңғы он жыл ішінде бірде-бір тұрғын үй бөлінбеген.
Жастардың діни сауаттылығын арттыруға бағытталған жұмысты жандандыру – қазіргі таңдағы үлкен талап. Бүгінде еліміздегі діни ахуалдың оңды болуына білімді, саналы жастардың да ықпалы зор. Сондықтан да дәстүрлі емес және радикалды діни көзқарастардың қатерін түсіндіруде білім орындарында «Дінтану негіздері» пәнін сапалы оқытып, бұл іске теологиялық білімі бар оқытушыларды тарту қажеттігін де айта кетті.
– Өздеріңіз білесіздер, өткен жылы білім беруді жетілдірудің алдағы төрт жылға арналған жаңа Мемлекеттік бағдарламасы қабылданды, – деп жалғады сөзін Лаззат Махатұлы. – Бағдарламада мектепке дейінгі білім беруден бастап балалар құқығын қорғау, педагог кадрларының біліктілігін арттыру, білім берудің электронды жүйесін енгізу, мектеп аттестациясымен қатар көптеген мәселелер қамтылды.
Бүгінде ұстаздар қауымдастығы мен бүкіл қоғам алдында «Мінсіз мектеп» моделін бірлесіп дайындау міндеті тұр. Жалпы алғанда, атқарылар жұмыс көп. Мұның бәрін де орындауға болады. Ал олардың табысты болуы сіздер мен біздерге қатысты болмақ.
Бұдан соң кеңес қарары қабылданып, жылдағы дәстүрге сай білім саласында елеулі еңбек етіп жүрген қызметкерлер марапатталды. Олардың бірқатары Білім және ғылым министрлігінің ұсынуымен «ҚР білім беру ісінің Құрметті қызметкері», «Ы. Алтынсарин» төсбелгілеріне қол жеткізсе, біразы облыс әкімінің Құрмет грамотасы, Алғыс хатын иеленді.
Білім қызметкерлерінің тамыз кеңесі бұдан кейінгі ретте секциялық жұмыстарға ұласып, ұстаздар қауымы білім сапасын арттыру, жас ұрпаққа тәлімді тәрбие беру турасындағы ойларымен бөлісіп, үздік тәжірибелерді ортаға салды.
Алма ЕСЕНБАЕВА