ҚАРУ
Кино дегеніңіз кәдімгі магнит іспетті. Жалпы, адамзат жыбырлаған құбылысқа, жанды бейнеге, шынайылыққа қызыққыш. Сондықтан да көпшілік кітап оқығаннан кино көрген әлдеқайда көңілге қонымды әрі әсерлі екендігін айтады. Бірақ бұл пікірді бір жақты қарауға болмайды. Дегенмен, асыл қазынаның көшін бастап тұратын кітап деген құндылықтың қоғамнан алар орны тым зор. Кітап – кез келген адамның өміріне оң өзгеріс беретіндігін ерекше атағанымыз жөн.
Адамның санасын бір-ақ минутта жүз сексен градусқа бұрып жіберу тек телеарналардың қолынан келетін іс. Оған сонша шырылдаудың қажеті жоқ. Жай ғана ұрпақ тәрбиесіне қажетсіз, арзанқол дүниелерді жиырма төрт сағат бойы ызыңдатып қойсаңыз болды. Елімізде отандық телеарналар күн санап көбейіп келеді. Олардың атауы ғана отандық. Заты өзге мемлекеттің мүддесіне жұмыс істейді. Ол – ақиқат. Өкінішке қарай, қазір әр телеарна рейтинг көрсеткіштерін қууда алдына жан салар емес. Соның салдарынан еліміздің жастарына патриоттық тәрбие беру, ұлттық салт-дәстүрлерді сақтау, қазақтық қалпымыздың құндылықтарын кеңінен насихаттау, елдік және мемлекеттік рухты өрлету секілді маңызды мәселелер сол рейтингтердің тасасында қалып қойды. Ұлтқа керек дүние біздің арналарда көп ұлықталмайды. Бірақ ел Тәуелсіздігін баянды етуге қызмет етпеген телеарналар толығымен мемлекет тарапынан қаржыландырылады. Бір қолмен беріп, бір қолмен алу саясаты әлсіреп тұрғанын осыдан-ақ байқаймыз. Бір кездері телеарналарда түрік сериалдары қаптағанда, ондағы интрига, меланхолия және трагедияның мөлшерден асып кеткендігін айтып, қайраткерлер Мәжілісте мәселе көтерген. Мұның бәрі халықтың рухани дамуына кері әсерін тигізетінін, келешек үшін үлкен қауіп туғанын айтып, шырылдаған еді. Қоғам қайраткерлерінің байбаламы түрік сериалдарына тыйым жасағанымен, оның орнын үнді сериалдары басты. Неге десеңіз түріктің, кәрістің, үндінің арзан киноларын алу әлдеқайда оңай әрі жеңіл. Бейресми ақпараттарға сүйенсек, үнді фильмдерін тамашалайтын негізгі аудитория – осы елдегі миллиондаған кедей адам болғандықтан, барлық дерлік кинотуындылардың сценарийі бірізді бағытта өрбиді: төменгі әлеуметтік таптан шыққан қарапайым адам әділетсіздік пен зұлымдыққа қарсы күресіп, түбінде жеңіп шығады. Әлбетте, бұған көптеген музыка мен бидің түр-түрі, ұлттық киімдер қосылып, нәтижесінде тек үнді фильмдеріне тән атмосфера жасалады. Үнді режиссерлерінің тағы бір ұтқырлығы – киноға сән әлемінде табысқа жеткен сұлу қыздарды көптеп тарту. Айталық, әр жылдарда әлем аруы атағын иеленген Айшвария Рай, Лара Датта, Приянка Чопра секілді танымалдар арқылы көрерменді өздеріне баурап алады.
Елімізде жүргізілген сауалнама нәтижесінде үнді фильмдеріне біздің жастарымыз тез ұйитындығы дәлелденген. Тез еліктейтін де біздің елдің жастары болғандығы да анықталған. Қазіргі таңда кришнаизмге кіріп кеткен жастар аз емес. Үнді сериалдарын ұдайы көру адамның, әсіресе буыны бекімеген, бұғанасы қатпаған жас ұрпақтың санасын жаулап алатыны белгілі. Сонда біз өзге елдің діні мен ділін өз ұрпағымыздың бойына мықтап сіңіріп жатқан жоқпыз ба? Осыны ойлаған телеарна басшылары бар ма екен? Күні ертең Қазақстан жастарының белгілі бір буыны кришнаизмге топырлап кіріп жатса кімді кінәлаймыз? Болары болып, бояуы сіңген соң ғана айналып келіп ата-анадан одан қалды мектептің жүрегіне айналған ұстаздар қауымына кінә артудан тайынбасымыз анық. Алысқа бармай-ақ, кәрістерді алайық. Оңтүстік Корея бұл күнде протестанттық ағымға толық ден қойды. Олар өздерінің ежелгі діни ұстанымынан тез айырылып қалды. Ал осыған сол елдегі телеарналар тікелей ықпал етпеді деп айта аламыз ба? Сол кәріс сериалдарын қызыға тамашалап отырған қазақ жастары діни ұстанымдарын өзгертіп жатса қайтеміз? Сол секілді қазіргі үнді фильмдері еліміздің рейтінгін бастап тұр. «ҚАЗАҚСТАН» ұлттық арнасында жүріп жатқан «Келін» фильмін айтудың өзі ұят. Бір ғана ұлттық арна осы туынды арқылы қаншама ұрпақты улап жатыр десеңізші? Соңында ұлттығымыздан айырылып қалмасақ игі. Сол фильм басталғалы бүлдіршіндер «Ананди», «Жагдишия» болса, үлкендеріміз «Каляни» атануда. Соған еліктеп, өздерін дәл солай тәрбиелеп алды. Осы төңіректе біраз ойланайық. Жоғарғы жақтан баяу әрекет болып жатса да әрбір ата-ана балаларын тіпті, ең алдымен өздерін осы «киномания» дертінен арылтса деген ойымыз бар.
БАЛАҢЫЗ
КІМ БОЛЫП ЖҮР?
«Мен – Ананди, сен – Ганга, Бекжан – Жагдишия болады. Мен сенен Жагдишті яғни, өз махаббатымды тартып аламын», – деген бес жасар Жадыра басына ұзын матаны байлап, Анандидің жүрісіне салып көпшілікті қыран-топан күлкіге қалдырды. Айтып отырғанымыз «Келін» телесериалының кейіпкерлері. Бұл – қазіргі балалардың ойыны, яғни теледидар арқылы мықты идеологиялық құралдың міндетін атқарып отыр. Осыдан біраз уақыт бұрын ғаламтор бетінде қазақ отбасының үш қызы үнді елінің ұлттық киімін киіп, табаққа от жағып, қолдарына ұстап, бірінің басынан бірі айналдырып, үй ішіне гүл шашып ойнап жүргендерін көпшілік көрді. Оны байқап отырған ата-ана үнсіз күліп отырды. «Тәйт» деген сөз ауыздарынан шықпады. Ғаламторға тарағасын бұл оқиғаға әркім әртүрлі пікір айтты. Бірі мақтады, екіншісі даттады. Нәтижесі еш өзгеріссіз қалды. Бұл бір ғана отбасында орын алған оқиға. Ал елімізде қаншама үйлі-баранды жан бар. Әрбір бала өз үйінде осылай ойнаса біздің «үнділеніп» бара жатқанымыз белгілі болады. Ұлтқа төнген нағыз фобия осы.
Студенттік кезімізде жатақханада тұрған қыздардың басы қосыла қалса бәрі тыпырлап бір ноутбуктың ішіне еніп кетердей корей фильмдерін тамашалайтын. Таңды таңға ұрып, солармен бірге жылап-сықтаған қыздардың қуанышы мен қайғысын бір кісідей-ақ көрдік. Тіпті, бір құрбымыз өзіне сол актерлерге ұқсайтын жігіт табылмайынша тұрмысқа шықпаймын деп жүріп, түбінде кәріс жігітінің аяулы жары атанды. Тен деген текті алып, өмірге шекесі торсықтай, көзі сығыр кәрістің ұрпағын алып келді. Анасының қаны қазақ болса да ұрпақтың болмысы, жаны, қаны басқа. Ол жеті атасын жаттап, ұлт үшін қайғыратын ұрпақ емес. Бізді алаңдататыны да осы. Студенттік жылдарының тәтті кезін киноға арнаған тағы да бір бикеш тіпті, сабақтан қалып тұрып, орнынан тапжылмай солардың өмірлерімен танысатын. Қалта телефонын ала қалсақ, қаптаған сығыркөздердің суреттерінен шатасатынбыз. Оқу бітірісімен Кореяға кетемін деген арманы алға жетелеп, корей курсына жазылды. Сол елдің мәдениетін біліп, ұлттық тағамдарын дайындап, талай мәрте таяқшамен тамақ жеген кездері де болған. Алайда ол уақытта бұл оқиғаға осыншама қабырғам қайысқан емес. Ол мен үшін жай ғана күлкі болған.
Бұл – қыздардың басынан кешірген оқиғасының бір парасы ғана. Ал Отан қорғау жолында сап түзеп, әскер қатарында тұруға тиісті сайдың тасындай біздің айбынды, намысшыл, жігерлі жігіттерімізге де бұл кино айтарлықтай әсер етті. Мәселен, олар шашын қызыл-ала қылып бояды. Бір жағын қырқып, екінші жағын ұзартты. Желпілдеп жүру үшін «кекілді жігіттер» қаптады. Үстіне кең көлемді жейделер мен жемпірлер ілді. Тырысқақ, жыртық келген шалбарларға құмартты. Бетіне опа, далабын жағып, құлағын тесіп нағыз корей жігіттерінің рөлін айнытпай сомдады. Сомдап қойса жақсы ғой олар дәл сондай образды қалыптастырды. Оны нақты мысалмен келтіретін болсақ, осыдан 4-5 жыл бұрын отандық телеарналардан «F4» атты корей фильмі көрсетілді. Сонда басты рөлдегі актер Ку Джун Пхё бастаған төрт жігітке бесіктен белі шықпаған қыздарымыз ғашық болып, естері кетті. Тіпті, олардың үлкен форматтағы суреттері әр шаңырақта орын алғаны да рас. Оны сан мәрте көзбен көрдік. Жастарымыз соларға қарап еліктеп, киінуді, шаштарын түзеуді шығарды. Сөйлеу мәнерінен бастап, іс-қимылына дейін көшіріп алды. Кәріс актерлері кумирларына айналды. Жоғары сыныпта оқитын қыздардың арасында кәріс жігіттеріне тұрмысқа шығуды ойлап, корей елінде тұрақтап қалуды мақсат еткендері де болды. Сол кезде мұның теріс екенін оқушы қыздарға түсіндіріп жеткізу, санасына құю мүмкін емес еді. Өйткені олар өмірді кинодағыдай елестетіп, тәтті қиялға берілді. Бұл бір қарағанда, өткінші нәрседей болып көрінуі мүмкін, бірақ мұның астарында жас адамның психикасын өзгертіп, өзге елдің мәдениетіне бойұрып кетушілік қалыптастыратын идеология жатқанын түсіну қиын емес.
ҮЛГІ БОЛАР
ҮЛКЕНДЕР ҚАЙДА?
Алдыңғы арба қалай жүрсе, артқысы да солай жүреді. Қазекем айтқан әрбір сөз өмірге ауадай қажет. Айтылған философиялық ойды сәл ғана қопсытып көрсек, тарам-тарам жол ашылады. Бірақ ол жолмен көбісі жүргісі келмейді. Айтылған сөзге құлақ асатындар саны тым аз. Біз өзімізді кейінгі дөңгелек деп есептесек, жол көрсетер, бағыт-бағдар беретін алдыңғы буын өкілдері қайда? Осы сұрақ төңірегінде бір мезгіл ойланып, өзімізге-өзіміз қойып көрейікші. Бізді яғни, бүгінгі елдің саналы ұрпағын тәрбиелейтін үлкендеріміздің өзі таңның атысынан күннің батысына дейін телміріп теледидардың пультін қолынан бір минутқа түсіргілері келмей отырады. Егер өтірік десеңіз, мұны тәжірибелік жолмен тексеріп көріңіз. Ерте тұрып, балаларына, немерелеріне дене жаттығуын жасатып, кеште ертегі айтқылары келмейді. Мұндай том-том кітаптың көлеміндей көп жұмысты істеуге олардың уақыты жоқ. Бірақ теледидарға телміруге уақыт бар. Кей сәтте үлкендерге айтар наздың да ара-тұра бас көтеретін тұсы болады екен. Бірақ барлық ағай мен апайды осы санатқа қосып отырғанымыз жоқ.
Көбіне үлкендер жағы жастарға көңілі толмай жатады. «Қазіргінің жастары сөз ұқпайды. Тәрбиеден жұрдай. Үлкенді сыйламайды. Айтқан тілді алмайды. «Не істейсің маған?» дегендей бажырайып бетіңе сескенбей тік қарайды» дегендей сөздерді жиі айтады. Мүмкін мұндай жас шыбыққа бағдаршам болып, оның болашақта тік әрі жайқалып өсуіне жағдай жасап жіберу де керек шығар? Міне, осы тұста үлгі болар үлкендердің көмегіне зәру екеніміз байқалады. Мәселен, кешкі уақытта малын жайғап болған соң, емін-еркін шайын ішіп отырып, киноның қызығы мен шыжығына беріледі. Тіпті, қорасынан қойы ұрланып, сиырын айдап кетіп, жылқысынан айырылған кезеңді де бастан кешірді. Елге белгілі бір журналист өзінің жеке парақшасында: «Өткенде бір құдағиымыз қан қысымы кенеттен көтеріліп, құлап қалыпты деп естідік. Тіпті, қан қысымы ми тамырларын зақымдап, бір қолы жансыз болып қалыпты. «Ойбай-ау, дені сау, кеше ғана шауып жүрген кісі емес пе еді? Бұған аяқ асты не боп қалды?» деп таңданып, қал-жағдайын сұрастық. Сөйтсек, құдағиымыздың қан қысымының көтерілуіне сериал себеп болыпты. Құдағи әдеттегідей «Қыз ғұмырын» тамашалап отырған («Астана» арнасында болған үнді фильмі). Ича көлік апатына ұшыраған сәтте, құдағиымыз да бірге құлап бара жатыр дейді. Сериалға қатты беріліп кетсе керек» деп жазады. «Естімеген елде көп», демекші жуырда ғана ғаламтордан бір әженің Ичаны (әлгі кейіпкерді) жоқтап, «бейшара, бала-шағасының қызығын көре алмай кетті» деп жылағанының да куәсі болғанбыз. Бірін құлатып, мүгедек етсе, бірін зар жылатқан бұл сериалдың құдіреті не? Айдаладағы үнді қызының (оның өзі сериалдың кейіпкері) мұңына қайғырған көңілшек әжелердің бұл тірлігіне бас шайқаудан басқа ештеңе істей алмайтынымыз анық. Мүмкін, жүйке жұқартудың жаңа тәсілі шығар. Дегенмен кинодағы кейіпкерлердің жылап-сықтағанына бола жүректерін қан жылатқанша, ер жетіп, күн санап құлпырып келе жатқан бойжеткендердің ойнап жүріп от басуына жол бермеуді ойлағаны жөн еді.
Ұрқия НҰРЛЫБАЙҚЫЗЫ, зейнеткер:
– Келінім ақ босағамды оң аяғымен аттағаннан-ақ «Ананди» деп ат қойдым. Үйде де солай атап, шақырамын. Айтқаныңды екі етпейді. Үлкенге құрметін, кішіге ізетін көрсетіп, бәріміздің жағдайымызды ойлап отырады. Ешқайсымыздың бетімізге тіке қарап сөйлемейді. Келінді солай ұстау керек. Үнді фильмдерінің ішіндегі ең жақсысы осы болып тұр ғой бізге. О бастан-ақ келінге қалай қарау, оны дұрыс тәрбиелеу, атаны «аташым», енені «апашым» деп айтқызуды да осы киноң үйретіп жатқанын қанша жасырсақ та ақиқаты менмұндалап айғайлап тұрғанын жасыру әсте қиын. Ондай қаталдық танытпасаң біздің жақтың келіндері өз дегендерін істеуден тайынбайды. Сәл еркіндік берсең білгенін істеп, сені сыйлаудан қалады. Оларға дәл Каляни сияқты ене керек. Міне, сол себепті де мен отбасылық өмірімнің негізгі қағидаттарын осы кино арқылы орнаттым десем асыра айтқаным емес.
Бағила ӘСКЕРБЕКҚЫЗЫ, қала тұрғыны:
– Өзінде жоқтың өзгеге телмірумен күні өтеді. Түрік, корей сериалдарынан құтылған сәттегі қуаныш көп өтпей-ақ су сепкендей басылды. Экранда – үнді сериалдары. Байқауымша, бұл сериалдар біздің қоғамның санасын 15-20 жылға кері сүйреп тастады. Қыз-келіншектер кемсеңдеп отырып көретін «Изаура күң», «Байлар да жылайды», «Қарапайым Мария» деңгейіндегі сериалдардың заманы қайта туды. Дәл сондай сүреңсіз, шұбалаңқы, сиырқұйымшақ сюжеттер. Бірақ «Қарапайым Мария» қазіргі «Келінге» қарағанда жақсы, сапалы. Өткенде балаларым 31-арнадан «Уәде беремінді» көріп отыр. Жандарына жайғасып мен де қарадым. Бес-ақ минутқа шыдадым. Бұл сериал – микрокөріністер жиынтығы екен. Жарқ-жұрқ, жылт-жылт... Көзім ауырды. Егер осы сериалдарды біраздан бері көріп жүргендер болса, көз дәрігеріне қаралуға кеңес беремін. Өзім үйдегілерге үнді сериалдарын көруге тыйым салдым. Өз сериалдарымызды түсіруіміз керек. Сценарийлерге ашық байқау жарияланса деймін. Туындыны түсіру таныс-тамырға емес, қолынан іс келетін азаматтарға тапсырылса. Сонда «қазақ сериал түсіре алмайды» деп өзгелерді сағалағанды жақсы көретін, экранды қазақшасы шала дүниелермен толтырып жүрген керауыздардың әуселесі байқалар.
Ескермес АҚАНОВА, қала тұрғыны:
– Қырық жылға жуық мектепте қызметте болдым. О тұста теледидар қол жеткеннің үйінде ғана болды. Қаншама тағылымды дүниелер көрсетілді. Қазір сол уақытты сағынамын. Мәселен, мультфильм дегеніңіздің өзі аптасына бір-ақ күн болатын. Балаларымыз келесі мультфильмді көру үшін зарығып күн санайтын. Сонысымен ол бүгінгі аға, кешегі баланың есінде мәңгі сақталып қалды. Құндылық дегеніңіз осы. Ал қазір ше? Іздегеніңнің бәрі бар. Ол жаман емес. Бірақ тым көп дүние қолжетімді болған сайын оның сапасы, мазмұны, мәні құнсызданады. Сол секілді қазіргі телеарналарда толассыз жүріп жатқан телехикаяларды айтуға болады. Кез келген телеарнаны аша қалсаңыз шүлдірлеп кәрісіңіз, былдырлап үндіңіз, одан қалды өз ағайындарымыз шыға келеді. Амал жоқ көреміз. Кейінгі уақытта өзіміздің туындылар да арагідік менмұндалап жүр. Бірақ біз үшін әлі талай жұмыс жасау керектігі көрініп тұратынын жасыру қиын. Бірақ тоқтаусыз еңбек ету керек. Жақсы дүние болса көруге дайынбыз. Жақсымыз аз болғандықтан өзгенің қаңсығын таңсық қылып отырғаннан басқа амал жоқ бізге.
P.S: Қазір екінің бірі еліміздің тарихын, тіпті Мемлекеттік рәміздердің авторларын білмеуі мүмкін. Есесіне, үнді, түрік, тіпті корей ұлтының пайдасынан көрі зияны басымырақ фильміндегі әрбір актердің тұқым-тұқиясын жеті атасын білгендей біледі. Күнделікті ас-суын айыра алмай отырса да сериалға телміруге, әсіресе, нәзікжандылар құмар.
Имам Бухариден жеткен хадисте: «Адамдардың көбісі қолдан жіберіп алған екі нығмет бар: бірі – денсаулық, екіншісі – бос уақыт» деп бекер айтылмаса керек. Сол сериал көруден мүйіз шықса ендігі шығар еді-ау. Ең алдымен, ұлттық идеологияға әсері. Үнді сериалдары үнді мүддесін көздейтіні белгілі. Болливудтың кез келген фильмі өз ұлтының әдет-ғұрпы мен салт-дәстүрінен алыс кетпейді. Ұлттық бояуы қанық киімдері мен дәстүрлі музыкасын, ұлттық биін, салтын насихаттауды бірінші кезекке қояды. Бізде қалай? Үнді сериалдары көрсетіле бастағалы бері қазақ көрермендері, керісінше, үнді болуға айналды. Үндінің киімдерін иыққа іле бастадық. Өкінішті-ақ.
Сериалдағы қандай факторлар адамдарға қаншалықты әсер етеді деген сауалға жауап іздегендер мынадай қорытынды шығарыпты: 21 пайыз адамдар қастандық жасауды үйренсе, 14 пайызы меланхолияға шалдығады. Сериалдың музыкасының адамдарға әсер етуі 26 пайыз болса, сценарийдің әсер етуі 6 пайыз ғана екен. Ұшы-қиыры жоқ киномен жанымыз ауырғанша ұлтымыздың ертеңіне алаңдайықшы.
Еңлік КЕНЕБАЕВА