Әр өңірде сырт көзге мақтанышпен көрсететін, тұрғындарының бірлік – берекесі үстем, азаматтары еңбекқор, өндірісі өрге жүзген елді мекендері болады. Ұйғыр ауданындағы шырайлы Шарын осындай айдарлы ауылдардың бірі. Қазіргі таңда 6200-ден астам адам тұратын бұл ауылда екі орта мектеп, бір бүлдіршіндер орталығы, 25 сауда орыны, тағы көптеген тұрғындарға мәдени, әлеуметтік қызмет көрсететін кәсіпорындар бар. Ауыл тұрғындары 530 ЖШҚ құрып, 5 мың гектарға жуық жерге жыл сайын егін егеді.
Кеңес кезеңінде Еңбек Қызыл Ту орденді Свердлов атындағы ұжымшар жүгері өндірісін өркендетіп, еңбекқор адамдары атақ-даңққа кенелген. Сол кезеңде 1965 жылы осы ауылда балабақша салынып, ол ұзақ жылдар бойы ауыл бүлдіршіндерінің алтын ұясына айналған. Өкінішке орай бұл балабақша нарыққа өткен кезеңде жабылып, қараусыз қалған. Ауыл тұрғындарының сұрау салуының нәтижесінде биыл көне балабақша ғимараты «Балапан» мемлекеттік бағдарламасымен күрделі жөндеуден өткізіліп, Білім күні мерекесінде салтанатты жағдайда пайдалануға берілді.
Шарындағы қазақ тілді бүлдіршіндерге тарту етілген 25 орынды «Бәйтерек» балабақшасының ашылу салтанатында алдымен сөз сөйлеген аудан әкімі Алимжан Тоқтасунов ел Тәуелсіздігінің 25 жылдық мерекесі қарсаңында, ауыл тұрғындарының риясыз қуанышына негіз болған істі, Елбасының саралы саясатының жергілікті жерде орайлы жүзеге асуының көрінісі деп түйіндеді. Жиында округтегі ақсақалдар алқасының төрағасы Мұңдаш Сасиқов, ұлын осы мекемеге тәрбиелеуге берген Гүлжазира Сатымбекова ауылдастарының ақжарма қуанышын жеткізді. Өздеріне ұсынылған жақсылыққа бүлдіршіндер де балауса өнерімен үн қосты. Көне ғимаратты зманауи үлгіде қайта қалпына келтірген «Құрылыс-индустрия» компаниясының директоры Самат Ахман балабақшаның символдық кілтін мекеме меңгерушісі Саламат Ашимоваға құрметпен ұсынды.Аудан басшысымен бірге ауылдың құрметті қариялары бүлдіршіндер үйінің ашылу лентасын қиып, ақ жаулықты аналар қуанышқа шашу шашып, жиналған жұрт жаңа ғимараттың іші-сыртын аралап тамашалап тарасты.
Мырзағали НҰРСЕЙІТ
Ұйғыр ауданы.