Білім күнінде Азат ауылының тұрғындары ерекше қуанды. Жаңадан салынған 300 орынды мектеп оқушыларға есігін айқара ашты. Игі шараға жиналған жұртшылықтың қарасы мол. Көзайым қуаныштан ешкімнің шет қалғысы келмейді. Құшақтары гүлге толған мектеп оқушылары айналаны сұлулыққа бөлеп тұр. Әуелеген ән құлақтың құрышын қандырады. Күз келсе де күлімдеген көк аспан зеңгір көктен жаздың лебін төгеді.
Ашылу салтанатына арнайы қатысқан облыс әкімінің орынбасары Бақтияр Өнербаев аймақтағы оқу-ағарту саласының жетістіктерін атап өтті.
– Биыл – ерекше жыл. Олай дейтініміз, өркениетке бет алған жасампаз халқымыз Тәуелсіздіктің 25 жылдығын атап өткелі отыр. Осынау кезең ішінде Елбасымыз Нұрсұлтан Назарбаевтың ұстанған сара саясаты өзінің өміршеңдігін дәлелдеді. Жас ұрпақ – жаңа қазақ өсіп, ержетіп, Көк туын көкке желбіретті.
Тәуелсіздік тойына арналған бір шашу – өздеріңіз көріп отырған мынау жаңа мектеп үйі. «Нұрлы Жол» бағдарламасы аясында осындай шаралар облыста көптеп ұйымдастырылып жатыр. Қуаныштарыңыз құтты болсын, – деді Бақтияр Әлтайұлы.
Соңғы жылдары көшіп келушілер көбейіп, Азат ауылының аумағы ұлғая түсті. Сондықтан мектепте сабақты үш ауысыммен оқытуға мәжбүр болған. Оның үстіне 11 жылдық орта мектептің қажеттігі барған сайын білінді. Осыған орай ауыл тұрғындарының өтінішін ескеріп, облыс басшылығы жаңа мектеп салудың жайын ойластырды. Құрылыстың жобасы жасалып, оған 747 800,8 мың теңге қаржы бөлінді.
«Риголит» жауапкершілігі шектеулі серіктестігі құрылысты өткен жылдың мамыр айында қолға алып, оны дер кезінде аяқтады. Соның нәтижесінде Азат ауылының тұрғындары биылғы жаңа оқу жылын қуанышпен қарсы алып отыр.
Лентаны қию құрметі облыс әкімінің орынбасары Бақтияр Өнербаев пен ауданның Құрметті азаматы Қожахмет Шамахуновқа тапсырылды. Жиналғандар бұл көрініске айрықша қошемет көрсетті. Ұлттық дәстүріміз бойынша шашу шашылды. Сыңғырлаған алғашқы қоңыраудың дауысы жаңа оқу жылының басталғанын баршаға паш етті.
Мектеп директоры Шолпан Қошаханова көпшілікке мектеп ішін аралатып көрсетті. Сәулетіне нақыштары сай жаңа нысан жарқырап тұр. Сынып бөлмелерінің, ауқымды дәліздердің тынысы кең. Мәжіліс залы, спорт залы, кітапхана бүгінгі күннің талаптарын толық қанағаттандырады. Асхана туралы да осылай айтуға болады. Мектеп ішінде құрал-жабдықтар жеткілікті. «Кірсе – шыққысыз» деген теңеу осындайда айтылса керек. Қысқасы, ауыл мектебінің келбеті мен көркі қала мектебінен кем емес.
– Біздің ендігі міндетіміз – білімді, тәрбиелі, отансүйгіш азаматтарды өсіріп, баулып, түлету. Ұстаздар қауымы сондай ұлы мұраттар үшін тер төгеді. Ауылға жасалған жақсылықтың қарымтасын еңбегіміздің игі нәтижесімен көрсеткіміз келеді, – дейді мектеп директоры Шолпан Қошаханова көпшілікпен әңгімелескен бір сәтінде.
Жаңа дүниенің көрімдігі болатыны анық. Облыс әкімінің орынбасары Бақтияр Өнербаев облыс әкімдігі атынан мектеп ұжымына соңғы үлгідегі түрлі-түсті теледидар табыстады. «Басы құтты болса, жалғасы мықты болады». Бәріміз осы пікірге қосылдық.
Болат МӘЖИТ
Еңбекшіқазақ ауданы.