Білім күні еліміздегі барлық мектептің есігі айқара ашылды.
Оқушылар үш ай бойы алаңсыз тынығып, сағына күткен білім шаңырағына оралып, тың күш-қуатпен оқуға ден қоймақ. Ауданымыздағы күрделі жөндеуден өтіп, сәні мен салтанаты астасқан І. Есенберлин атындағы орта мектебінің шәкірттері де алтын ұясына келіп, ұстаздарымен қуана қауышты. Осынау шаттыққа толы күнде облыс әкімінің орынбасары Серікжан Бескемпіров, аудан әкімі Қайрат Бисембаев, Үштөбе қаласы әкімінің міндетін атқарушы Қуат Оңғаров, аудандық білім бөлімінің басшысы Қайрат Қасымов балалар қуанышына ортақтасты.
Білім күнінің салтанатты жиыны ел Тәулсіздігінің 25 жылдығына және Конституция күніне арналды. Бұл күні еліміздің барлық мектебінде алғашқы білім беру сабағы «Мен өз Отанымның патриотымын» тақырыбында өтті. Білім ордасына ата-аналарымен бірге ере келген тұлымшағы желбіреген кішкентай бүлдіршіндер ұстаздарына гүл сыйлап, қуанышқа бөледі. Еліміздің Гимні асқақтата шырқалып, мектеп табалдырығын аттаған балдырғандар Отан алдындағы жауапкершілікті сезінгендей күй кешті. Мектеп – кеме, білім – теңіз. Аса ыждағаттылық пен еңбекті талап ететін білім нәрімен сусындауға шәкірттердің құштарлықтары байқалып тұрды. ҚР мемлекеттік Туын алып жүру құрметі 11-сынып оқушысы, аудандық пән олимпиадаларының жеңімпазы Әди Шәріпқалиев, 9-сынып оқушылары Дариға Құрманғали және Ләззат Нұрмұхамбетоваға берілді. І. Есенберлин атындағы орта мектебінің директоры Назгүл Мұратбаева сөз алып, балаларды жаңа оқу жылымен құттықтады. Биыл аталған мектепте 267 оқушы білім алатын болса, соның 37-сі білім шаңырағының табалдырығын жаңа аттаған бүлдіршіндер.
Облыс әкімінің орынбасары Серікжан Бескемпіров көпшілікке кезінде 8 жылдық оқу орны болған осы мектепте балалық шағы өткенін, жақсы білім алғанын сағынышпен еске алып, киелі шаңырағында оқушылардың қуанышына ортақтасу зор мәртебе екенін жеткізді.
Осыдан соң аудан әкімі Қайрат Бисембаев жаңарып, заманауи құрал-жабдықтармен қамтылған мектепте оқушыларды жақсы білім алып, еліміздің айтулы азаматты болып қалыптасуларына тілектестік білдіріп, игі лебізін жолдады. 11-сынып оқушысы «Алтын белгіге» үміткер Махаббат Тәңірбергенова мен 1-сынып оқушылары Ермұрат Жұмаш және Айша Олжасқызы алғашқы қоңырауды соғып, балалар мектепке асыға кіріп, жаңа парталарға жайғасты. Бұдан соң көпшілік мектеп ішін аралап, жаңарған әрі соңғы үлгідегі құрал-жабдықтармен қамтамасыз етілген мектепке оң бағасын берді.
Асхат Өмірбаев.
Қаратал ауданы.