Жақында облыс әкімі Амандық Баталов Алматыдағы өкілдігінде бірқатар әдебиет және өнер қайраткерлерін қабылдады. Олардың ұсыныс-пікірлеріне ден қойды. Емен-жарқын отырып кеңінен әңгімелесті.
– Сіздердің еңбектеріңіз ұлтымыздың рухани саласын нығайтуға зор үлес қосқаны белгілі. Сол арқылы оқырмандарыңызды, көрермендеріңізді елдік пен ерлікке баулыдыңыздар. Адамгершілікке тәрбиеледіңіздер. Шығармашылықтарыңыз мемлекет тарапынан лайықты бағаланды. Тәуелсіздікпен бірге ержеткен жаңа ұрпақтың ұлттық танымына оң әсер етіп жатырсыздар. Мұның бәрі аз жұмыс емес.
Сіздерге сәлем беру, сіздерді іздеу – біздің парызымыз. Сіздермен дидарласу үшін Алматыға келгеніміз де сондықтан, – деді Амандық Ғаббасұлы.
ҚР Мемлекеттік сыйлығының лауреаты, көрнекті ақын Марфуға Айтқожина облыс әкімінің мұндай ықыласты қабылдауына ризашылығын білдірді. Егемендіктің арқасында еркін сөйлеуге мүмкіндік алған жыр жолындағы бүгінгі ізбасарларына қызыға қарайтынын айтты. Тәуелсіздік аясында қазақ поэзиясы жан-жақты жетіліп, жаңғыра беретініне сенім білдірді.
Сонымен қатар, 80 жылдық мерейтойының жақындап қалғанын да құлаққағыс етіп, облыс басшысына өзінің шығармалар жинағын сыйға тартты.
Қазақстанның халық әртісі Сәбит Оразбаевты да әкім зор құрметпен қарсы алды. Қазақ театр өнеріндегі ол кісінің сіңірген еңбегін атап көрсетті. Көрнекті актердің өнегесі кейінгі толқын үшін де ескірмейтін үлкен мектеп. Кешегі алыптар тобының көзін көрген ардагер ағаның жолы да, жөні де бөлек.
Облыс әкімі бұдан кейін Қазақстанның халық жазушысы, көрнекті ақын Мұхтар Шахановпен әңгімелесті.
Арқалы ақын өлең мен қарасөзді кезек толғап, ұлтқа деген сүйіспеншілігі мен жанашырлығын паш етті. Өтпелі кезеңнің алмағайып сәттерінде сындарлы оқиғалардың ортасында болған кезеңдерін еске түсірді. КСРО Жоғары кеңесіне Алматы облысынан депутаттыққа түскенін, жетісулықтардың оны ерекше қолдағанын тебірене әңгімеледі. Ұлтын сүю – Отанын сүюдің басты белгісі екендігін айтты. Өйткені анасын қадірлеген перзент барлық халықтың бауыры.
Әңгіме барысында облыс басшысы ақын шығармаларының кітап болып басылып шығуына уәде берді.
Қазақстанның халық әртісі, Мемлекеттік сыйлықтың лауреаты, әйгілі әнші Нұрғали Нүсіпжанов халық шығармашылығындағы ұлттық бояуларды сапалы жаңғырту – бүгінгі толқынның басты міндеті екеніне тоқталды. Осылай деумен қатар, өзі туып-өскен Кербұлақ ауданында алма бақ өсіргенін тілге тиек етті. Соған қолдау көрсетсе деген ұсынысын алға тартты.
– Елбасымыз Астана маңын жасыл желекке айналдырды. Сол ну ормандардың арасымен жүрген сәтте бойыңды ерекше сезім билеп, шабытыңа шабыт қосылады. Сол сияқты, мен де туған жерімде алма бақ отырғызуды қолға алған болатынмын. «Атадан мал қалғанша, тал қалсын» деген жақсы сөз бар. Шамам келгенше, сол өсиетті орындап жүрген жайым бар, – деді Нұрғали аға.
Арнайы келген бұл сапарында облыс әкімі әдебиет пен өнер қайраткерлерінің ұсыныс-тілектері мен орамды ойларын ықыласпен тыңдап, руханият әлемінің көшбасында жүрген аға буынға зор денсаулық, шығармашылық табыс тіледі.
Болат МӘЖИТ