Оқи отырыңыз
Жер кодексіне енгізілген өзгерістер мен толықтырулар туралы түсіндірме жұмыстарын жүргізу үшін құрылған арнайы жұмыс тобы Алматы облысының елді мекендерінде кездесулер өткізуді жалғастыруда. Аталмыш жиындар бұған дейін Көксу, Алакөл, Ескелді, Кербұлақ аудандарында өткізілген болатын. Ал бұл жолы жұмыс тобы Текелі қаласында болып, тұрғындар мен кәсіпкерлермен кездесті. Басты мақсат – жер заңнамасындағы өзгерістерді түсіндіру, жергілікті халықтың, шаруалардың көзқарастарын біліп, ұсыныс-пікірлерін назарға алу.
Жиында әуелі облыстық жер қатынастары басқармасының басшысы Жолан Омаров Жетісу өңіріндегі ауылшаруашылығының ахуалы туралы баяндап берді.
– Елбасы ұсынған «100 нақты қадам» Ұлт жоспарының 35, 36-қадамдарын іске асыру мақсатында Жер кодексінің бірқатар баптарына өзгерістер енгізілген болатын. Мемлекет басшысының 6 мамырдағы Жарлығымен заңның қоғамдық резонанс тудырған нормаларына жылдың аяғына дейін мораторий жарияланды. Қазіргі кезде елімізде жер мәселесі бойынша Ұлттық комиссия жұмыс істеуде. 1434 нөмірлі бірыңғай республикалық Call-center құрылды. Облыста да жұмыстар атқарылуда. Аудан, қала тұрғындарымен кездесудегі мақсатымыз заңды талқылау ғана емес, сіздердің ұсыныстарыңызды орталыққа жіберіп, ой-пікір бөлісіп, ауылшаруашылығы мақсатындағы жерлерді пайдалануда кедергілер, шешілмеген мәселелер болса, дұрыс шешілуіне ықпал ету. Жер заңнамасының оңтайлы жақтарын да көпшілік білуі керек. Жер – елдің байлығы. Сондықтан оны ұтымды пайдаланған жөн», – деді ол.
Өз кезегінде кәсіпкерлер палатасының директоры Ләззат Шыңғысбаева жер мәселесі сияқты өзекті проблемаларды талқылау мен шешу диалог арқылы іске асырылуы керек екеніне назар аударды. Онда Ләззат Шыңғысбаева: «Шешілмейтін мәселе болмайды. Бұндағы басты сауал – проблеманы шешу жолында. Ал қазіргі таңда кез келген мәселені, сұрақты осындай талқылау арқылы, «дөңгелек үстел», жиындар ұйымдастыру арқылы ғана шешу тиімді әрі нәтижелі екенін қазіргі жағдай көрсетіп отыр. Сондықтан, бүгінде келісті диалог жүргізу басты құралымызға айналу керек», – деп өз пікірін жеткізді.
Одан соң жиын сұрақ-жауап бөліміне алмасты. Тұрғындар мен кәсіпкерлердің сауалдарына облыстық жердің пайдаланылуы мен қорғалуын бақылау басқармасы басшысының орынбасары Бөлтірік Жақыпов, облыстық жердің пайдаланылуы мен қорғалуын бақылау басқармасының бөлім басшысы Медет Орманбетов жауап берді.
Жергілікті тұрғындар тарапынан да толғағы жеткен мәселелерді оңтайлы шешу жайлы пікірлер айтылып, орамды ойлар қозғалды. Мәселен, кәсіпкер Ертай Дүйсебаев жерге күтім керек екенін атап айтты. «Жермен көп уақыттан бері айналысып келе жатқан кәсіпкер ретінде айтарым, жеріміз бос жатпай, жемісін беру керек. Жерге инвестиция салып, игілігін көруіміз қажет. Кәсіпкерлерге пайдаланып отырған жерлерін жеңілдетілген жолмен он жыл ішінде сатып алуға мүмкіндік беріліп отырғаны да құптарлық жай», – деді ол. Шаруа қожалықтарының басшылары мен жиналғандар тарапынан жер шетел азаматына жалға берілген күнде жұмыс күші сырттан әкелінбей, жергілікті азаматтар жұмыс істесе, топырақтың құнарлығын сақтау, түрлі химикаттарды пайдалану қатаң қадағаланса, Текелідегі орман шаруашылығының қарамағындағы алма бақтарының күтімсіз қалуына байланысты істің көзін білетін шаруаларға жалға берілсе деген сипатта ұсыныстар айтылды. Жалпы бұл басқосуға жиналғандардың орамды ойлары жерімізді тиімді пайдаланып, игілігін көру мәселесіне келіп саяды.
Шора БАТЫРБАЕВ.
Текелі қаласы.
