Алматы облысының қоғамдық-саяси, әлеуметтік-экономикалық газеті

ЖЫЛЖЫМАЙТЫН МҮЛІКТІ НОТАРИУССЫЗ ТІРКЕУ: ҚАНДАЙ ҚҰЖАТТАР ҚАЖЕТ?

Уақыты: 19.02.2021
Оқылды: 399
Бөлім: ӘЛЕУМЕТ

Қайырлы күн, оқырман! Бүгін сатып алынған жылжымайтын мүлікті нотариуссыз, яғни, Халыққа қызмет көрсету орталығы арқылы тіркеуге болатынын айтамыз. Ол қалай жүзеге асады? Оқыңыз.

Ең алдымен, ХҚО-ға кезекті онлайн брондаңыз. Бронды растау үшін ХҚО-ға 20 минутқа ерте келіңіз.

ХҚО операторына келесі құжаттарды ұсынасыз: сатып алу- сату келісімшартының 2 данасын жасатыңыз: мүліктің техникалық паспорты; мүлік меншігіне құқық беретін құжаттар (сатушы тарапынан); некеде болса, екі тараптың да жұбайының нотариус арқылы рәсімделген келісімі; егер жылжымайтын мүлік құрылыс компаниясынан сатып алынатын болса, қосымша: сату жөніндегі шешім; сатып алушы некеде болса, нотариус арқылы жұбайының рәсімделген келісімі.

Есіңізде болсын! ХҚО-ға дайын келісімшартпен келулеріңіз қажет. Келісім-шартта міндетті түрде жылжымайтын мүліктің барлық сипаттамасы (ауданы, қабаты, пәтер нөмірі, кадастр нөмірі және басқа да техникалық сипаттамалары) көрсетілуі тиіс.

Жылжымайтын мүлікті құрылыс компаниясынан алған жағдайда, ХҚО-ға компания өкілі келетін болса, келісімшартта оның аты-жөні көрсетілуі қажет. Егер олай болмаған жағдайда, келісімшартқа қол қоюшы, яғни, компания директоры, директорлыққа тағайындалғаны жайында бұйрықпен ХҚО-ға өзі келеді.

Қызмет құны (тұрғын үй үшін) - 1 202 тг.

Есіңізде болсын! Қызмет құны тұрғын үйден басқа жылжымайтын мүлік түрлері үшін (қойма, автотұрақ басқа) ауданына қарай өзгереді. Егер тұрғын үй жекежай болса, қызмет құны өзгермейді, бірақ жер телімі және басқа да жекежай аумағындағы құрылыс нысандары үшін қосымша төлем жасалады.

Қызмет көрсету мерзімі құжат тапсырған күнді есепке алмағанда – 1 жұмыс күні.

"ЖЕТІСУ-АҚПАРАТ"