Оқи отырыңыз
Панфилов ауданына қарасты Әулиеағаш ауылында тұратын Қойбағаровтар отбасы бүгінде 14 баланы тәрбиелеп отыр. Өзінің 7 баласымен бірге қазақ, ұйғыр, неміс, кәріс, орыс ұлты өкілдерінің балаларын бауырына басқан Сәбит Қойбағаровты өңір тұрғындары ерекше құрметтейді.
Сәбит Қойбағаров өзі де көпбалалы отбасында өскен. Бүгінде зайыбы Аманхан Байбураева екеуі 14 баланы ержеткізіп, немере сүйіп отыр. Қазір үлкен балалары медицина саласында, мал шаруашылында еңбек етуде. Әкелерінің ісін жалғастырып, мал өсіріп, қымыз, ет сатумен айналысады. Осы шаңырақтан мейірім тапқан балалардың алды қазір 27-ге толса, арты – 21 жаста.
Жүрегі кең азамат балаларды алаламай, барлығына бірдей қарауды және ақылмен тәрбиелеу қасиетін өз әкесінен сіңіргенін айтады.
– Бала күнімде әкеммен егістік басында жүргенде балалар үйінің тәрбиеленушілерін көрдім. Сонда әкем әрдайым мұндай балаларға қамқор болу керектігін айтатын. Сол кездегі айтқан ақылы күні бүгінге дейін жадымда. Ең алғаш 2009 жылы кәріс ұлтының баласын асырап алдық. Өз баламыздай көріп, тәрбиелеп, барлығын үйреттік. Қазір Алматы қаласында еңбекке араласты. Негізінен жұмыстың қыр-сырын үйретіп, жақсы тәрбиелесең, өздері өмір сүріп кетеді. Кейін неміс, ұйғыр, орыс, қазақ балаларын бауырыма бастым. Өз балаларыммен бірге тұрып, бірге еңбек етуде. Ұл-қыздарымды қазақы дәстүріне сай тәрбиелеудеміз. Ең бірінші осы балаларға қарап өзіңді тәрбиелейді екенсің. Содан кейін балаларды тәрбиелейсің, – дейді көпбалалы әке.
Бұл отбасының көршілері өмірдің қиын жағдайында қалған азаматтарға қол ұшын созып, үйлеріне паналатып, жағдайын түзеуге қолдан келген көмегін беріп, қатарға қосып жіберген сәттердің көп болғанын айтады. Сәбит Қойбағаров темірден түйін түйетін ұсталыққа да үйір. Ауласына темірден түрлі бұйым, мүсіндер, тұрмысқа қажетті дүниелер жасап қойған. Тіпті, отбасылық шағын мұражайлары да бар.
– Иә, біз әртүрліміз, әр ұлттың өз ерекшелігі бар, бірақ біз бір шаңырақ астында ортақ Отанымыз – тәуелсіз Қазақстанда өмір сүріп келеміз. Сондықтан, біздің тілек-мақсатымыз бір деп білемін, – дейді Сәбит Қойбағаров өзінің ізгі тілегін жеткізіп.
Панфилов аудандық әкімдігінің хабарлауынша, Қойбағаровтар отбасы – өңірдегі үлгілі шаңырақ. Мал шаруашылығының дамуына атсалысып, қайырымдылық шараларымен де белсенді айналысады. Індет өршіген шақта бейжай қалмай, жерлестерінің денсаулығын нығайтуға ықпал ету мақсатында қымызды тегін таратыпты.
Алматы облысы әкімінің баспасөз қызметі
