Кездесу барысында еңбек ресурстарының басқарылатын ағыны жөніндегі жол картасына қол қоюмен қатар шетелдік жұмыс күшін тарту жөні түсіндірілді.  Күн тәртібіндегі мәселе бойынша баяндама жасаған Б. Жақсыбаева технологиялық жаңғырту мен экономиканы цифрландыру пайдасына жасалатын құрылымдық өзгерістер қызметкерлерді мәжбүрлі жұмыстан босатуға алып келетінін айтып өтті. Сондай-ақ, бұл дәстүрлі салаларға тән (ауылшаруашылығы, құрылыс, өңдеу өнеркәсібі) екенін атап өтті. Өңіріміз аграрлы-индустриалды аймақ болып табылатындықтан, жұмыстан босатылатын еңбек ресурстарын келешегі бар салаларға таныстыру керектігін де әңгімеледі.

"Индустрия 4.0" элементтерін енгізуге байланысты жұмыстан жаппай босатылуға жол бермеу мақсатында Жетісуда 500-ден астам жұмыскері бар 18 ірі кәсіпорынмен Жол картасына қол қою белгіленген. Аталған кәсіпорындарда 13171 адам жұмыс істейді. Биыл 1 қыркүйекте жаңғырту мен цифрландыру жұмыстарын жүргізу күтілетін 16 ірі кәсіпорынның басшыларымен Жол картасына қол қойылған. Аталмыш орындарда 11866 адам жұмыс істеп,  кәсіпорындардың қамтылуы 90 пайызды құрап отыр. Сонымен бірге, «Жол картасы – компанияның қызметкерлерін қолдауға және еңбек нарығындағы тұрақтылықты сақтауға бағытталған әрекеттерді үйлестіру үшін қарастырылған. Әлеуметтік басқарма басшысының орынбасары Жол картасы жұмыстан босатылу жағдайында қысқартылатын қызметкерлерді бос жұмыс орындарына ауыстыруды (компания ішінде), жаңа кәсіптерге қайта оқытуды, ұқсас кәсіпорындарға орналастыруды, кәсіптік бағдар жүргізуді қоса алғанда жұмыспен қамту орталықтары арқылы жұмысқа орналастыруға ықпал етуді, ерікті қоныс аударуға жәрдемдесуді, кәсіпкерлікке ынталандыруды, субсидияланатын жұмыс орындарын ұйымдастыруды қарастыратынын жеткізді. Сөз соңында жиынға қатысқан кәсіпорындарды Жол картасына қол қоюға шақырып,  "Еңбек" нәтижелі жұмыспен қамтуды және жаппай кәсіпкерлікті дамыту бағдарламасы аясындағы атқарылып жатқан істерге тоқталып, қызметте электрондық еңбек биржасы және "Е-лицензиялау" мемлекеттік деректер қоры" ақпараттық жүйесі арқылы жұмыс істеу неғұрлым тиімді екенін  түсіндірді.

Кездесу барысында Г. Еңсебаева мен Г. Мусинова шетелдік жұмыс күшін тартуға рұқсат беру тәртібі мен шарттары Қазақстан Республикасы Денсаулық сақтау және әлеуметтік даму министрінің «Жұмыс берушілерге шетелдік жұмыс күшін тартуға рұқсат беру және (немесе) ұзарту, сондай-ақ, корпоративішілік ауыстыруды жүзеге асыру қағидалары мен шарттарына» және тиісті әкімшілік-аумақтық бірліктің аумағында немесе корпоративішілік ауыстыру шеңберінде еңбек қызметін жүзеге асыру үшін жұмыс берушілерге шетелдік жұмыс күшін тартуға рұқсат беру және ұзарту мемлекеттік көрсетілетін қызмет стандартына сәйкес реттелетініне тоқталды. Бүгінгі күні шетелдік жұмыс күшін тартуға арналған рұқсатты алу үшін құжаттар электрондық түрде "Е-лицензиялау" мемлекеттік деректер қоры"  ақпараттық жүйесі арқылы қабылдануда.

Осы мазмұндағы кездесу Ұйғыр ауданының жеке кәсіпкерлік субъектілері өкілдерімен де өтті. Басқарма қызметкерлері кездесулер барысында қойылған сұрақтарға жауап беріп, қорытындысында сындарлы диалог жүргізілді. Шара соңында қатысушы мекемелерге шетелдік жұмыс күшін тартуға рұқсат беру жөніндегі мемлекеттік көрсетілетін қызмет туралы жадынамалар таратылды.

Құралбек СӘБИТОВ

Панфилов, Ұйғыр аудандары