Оқи отырыңыз
«Нұр Отан» партиясының ХVIII съезінде партия Төрағасы Нұрсұлтан Назарбаев «Әлеуметтік қамқорлық» бағдарламасын әзірлеуді тапсырды. Аталған бағдарлама халықтың аз қамтылған топтарының табысын арттыруға, тұрғын үй мәселесін шешуге, білім беру мен денсаулық сақтау саласын жақсартуға бағытталған. Жүктелген міндеттің Жетісу аймағында орындалу деңгейімен облыс әкімінің орынбасары Ақан Әбдуәлиев брифинг барысында таныстырды.
Алматы облысы әлеуметтік картасы міндеттерімен таныстырған А. Жылқышыбайұлы:
– Жетісу өңірінде 40 409 көпбалалы отбасы 165 мың бала тәрбиелеп отыр. Өткен жылы 238 мың адамға 10,5 млрд. теңге көлемінде әртүрлі көмек көрсетілді. Облыс әкімінің тапсырмасына сәйкес, жыл басында облыстың «Әлеуметтік картасы» дайындалды. Бұл бағытта жергілікті бюджеттен 3,4 млрд. теңге бөлінді. Оның ішінде «7-20-25» бағдарламасы бойынша 1 млн. теңгеден тұрғын үй сертификаттары үшін барлығы 300 млн. теңге жұмсалды, – деді.
Аз қамтылған және көпбалалы отбасыларына жыл сайын жоғары оқу орындарына түсу үшін 100 грант бөлінеді. Осы мақсатта 44,3 млн. теңге қарастырылған. Бүгінде барлығы 206 білім алушы жергілікті бюджет қаражаты есебінен оқуда. Одан бөлек, көпбалалы және аз қамтылған отбасынан шыққан балалар 100 пайыз ыстық тамақпен қамтылған.
А.Жылқышыбайұлы брифинг барысында балалар мен жасөспірімдердің жазғы демалысы, сауықтыру шаралары туралы:
–1521 сауықтыру лагері мен алаңдар жұмыс істейтін болады. Сауықтырумен 354,4 мың бала қамтылмақ. Ағымдағы сауықтыру маусымында облыстың 40 мың жетім және көпбалалы, аз қамтылған отбасы балалары жазғы демалыспен тегін қамтылатын болады. Биыл алғаш рет санаторийлер мен демалыс үйлерінде 100 көпбалалы анаға балаларымен отбасылық демалыс ұйымдастырылады. Бұл үшін демеушілер мен меценаттардың қаражатын тарту жолдары қарастырылуда, – деді. Сондай-ақ, бүгінде облыс бойынша барлығы 300,0 млн. қаржыға әлеуметтік көмек көрсетіліп, көпбалалы отбасы 60 тұрғын үймен қамтамасыз етілгендігін жеткізді.
Өз кезегінде облыстық жұмыспен қамтуды үйлестіру және әлеуметтік бағдарламалар, құрылыс, энергетика және тұрғын үй коммуналдық шаруашылық басқармасының басшылары мен Талдықорған қаласы әкімінің орынбасары Сәуле Арзанбекова сала бойынша қолға алынған жұмыстарға тоқталды.
Соңынан баспасөз өкілдері тарапынан әлеуметтік көмек алу мәселесіне қатысты сауалдар қойылды. Оған:
– Биылдың өзінде 672 пәтер көпбалалы аналарға беріледі. Алғашқы пәтер кілті 1 маусымнан бастап табысталады. Биыл 155 коттеджді үйдің құрылысы аяқталып, оның 70-і көпбалалы отбасына табысталады. Осы бағыттар бойынша жұмыс атқарылуда. Үй берілген адам әлеуметтік көмек ала алмай қалмайды ма деген сауал жиі туындауда. Оның бір-біріне ешқандай қатысы жоқ. Реті келіп тұрса, мұқтаж жан мемлекеттен көмекті алуға құқылы. Жыл аяғына дейін көптеген игі істер жүзеге асырылады, – деп жауап берген А.Жылқышыбайұлы облыс орталығынан бөлек, аудандарда да пәтер кілті табысталатындығын жеткізді.
Еңлік ҚАБДЕШ
Фото - Аслан ҚАЖЕКЕ
