Алматы облысының қоғамдық-саяси, әлеуметтік-экономикалық газеті

ҚАЗАҚ ӘЙЕЛІ "МЕЙІРБАН АНА" ОРДЕНІМЕН МАРАПАТТАЛДЫ

Уақыты: 25.06.2019
Оқылды: 240
Бөлім: ӘЛЕУМЕТ

Әлемдегі біртуар әйелдерге ғана берілетін «Деде Горгуд» ұлттық қоры мен «Азербайжан дүниясы» журналы тағайындаған «Mehriban Ana» халықаралық орденіне Әлия ӘБСЕМЕТОВА ие болды.

Құрметті қонақтарды қарсы алған аудан әкімі Бағдат Әлиев екі ел арасындағы туыстық, достық қарым-қатынастың маңыздылығын атап өтіп, ерекше ілтипат танытты.

– Әзербайжан мен Қазақстан халықтарының арасындағы қарым-қатынастың тамыры тереңнен бастау алады. Әзербайжан біз үшін бауырлас ел, достығымыз жарасқан мемлекет. Сондай-ақ, Кавказ өңіріндегі басты серіктестеріміздің бірі. Екі ел арасында ежелден достық қарым-қатынас қалыптасып, қазірде ол достығымыз беки түскен. Арамызда ешқашан саяси кикілжің туындаған емес. Ал түрік әлеміндегі мұндай аса мәртебелі марапатқа біздің ауданның тұрғыны ие болғаны біз үшін нұр үстіне нұр. Әлия Әбсеметова жұбайы екеуі жеті баланы балалар үйінен өз қарамағына алып, қамқорлық танытып отырған ана. Ол бүгінде тоғыз баланың анасы атанған. Батыр ана өзінің еңбекқорлығының арқасында қоғамдық жұмыстардан да қалыс қалмайды. Түрлі әлеуметтік-қоғамдық іс-шаралардың белсенді қатысушысы. Қазақстан Журналистер одағының мүшесі, ерікті, Қазақстан халқы Ассамблеясының XXVII съезінің делегаты, облыстық Ассамблея жанындағы аналар кеңесінің мүшесі. Осындай аналарымыз көп болсын, – деді аудан әкімі.

Шара барысында аталған қор президенті, «Әзербайжан дүниесі» халықаралық журналының бас редакторы Эльдар Исмаилов пен қоғам қайраткері, әлем халықтары Жазушылар одағының мүшесі, «Түркі әлемі» қорының мүшесі Насиха Кенжина Жамбыл ауданының әкімі Бағдат Әлиевке құрмет дипломын табыстады. Эльдар Исмаилов болса, өздерін құшақ жая қарсы алған аудан әкіміне алғыс айтып, екі ел арасындағы қарым-қатынастың тарихы жайлы сөз қозғады.

– Гейдар Алиевтің басшылығымен Әзербайжан қарқынды түрде дами түсті. Ал Қазақстан болса, Елбасы Нұрсұлтан Назарбаевтың ерен еңбегінің нәтижесінде дамудың жаңа деңгейіне көтерілді. Кезінде ТМД елдері Гейдар Алиевті өте дана әрі көреген басшы, ақсақал ретінде құрметтеп, оның пікіріне құлақ асатын. Кейін мұндай құрметке Нұрсұлтан Назарбаев ие болып отыр. Түрік жұрты мен бүкіл әлем елдері Нұрсұлтан Әбішұлын өмірлік, саяси тәжірибесі мол, өз халқы мен елінің жағдайын жақсартып, бейбіт өмір сыйлаған тұлға ретінде ерекше сыйлайды. Біз түбіміз бір, түркілердің ұрпағымыз. Ал қазір бізді достық пен ынтымақтастық байланыстырып отыр. Әзербайжан халқының басына бұлт үйіріліп, қасірет шеккенде, қуғын-сүргін кезінде қазақ халқы бізге демеу болып, үлкен қолдау білдірді. Сол үшін қазақ еліне мың алғыс. Ауданыңыздың тұрғыны Әлия Әбсеметова секілді жүректі аналардың арқасында тағдыр тауқыметін тартқан қаншама бала отбасылы болып жатыр. Осыған орай, балалар тағдырына бейжай қарай алмай, үлкен жауапкершілікті өз мойнына алғаны үшін батыр анаға орден табыстауды жөн көрдік. Алғыс ретінде біз Жамбыл ауданына келіп, Бағдат Байшалұлы мен Әлия Маратқызын марапаттасақ деп шештік, – деп сөзін түйіндеді Эльдар Исмаилов.

А.ӘДІЛ
Жамбыл ауданы