ПАЙЫЗЫ ТӨМЕН: БАНК САЛЫМШЫЛАРЫНА 500 ПӘТЕР ҰСЫНЫЛАДЫ

Уақыты: 04.01.2020
Оқылды: 979
Бөлім: ӘЛЕУМЕТ

2020 жылы Алматы облысында «ТҰРҒЫН ҮЙ ҚҰРЫЛЫС ЖИНАҚ БАНКІ» салымшыларына 500 пәтер ұсынылады. Дәл осындай хабармен Қапшағай қаласында банк қызметкерлері брифинг өткізді.

Аталған баспана «Тұрғын Үй Құрылыс Жинақ Банкінің» «Өз үйім» атты бағдарламасы аясында салынады. Жалпы, облыста 10 нысанды пайдалануға беру жоспарланған. Олардың ішінде 128 пәтерлі екі көпқабатты үй Қапшағай қаласында орналасқан. Бұл «DIFT GROUP» ЖШС-нің TENIZ TOWERS тұрғын үй кешені және жеке кәсіпкер Светлана Субалованың «BALSU LUX» тұрғын үй кешені. Бұл үйлердің құрылысы бүгінде қызу жүріп жатыр.

Шара аясында журналистер қаладағы салынып жатқан тұрғын үй нысандарын аралап көрді. Олар алдымен «Ивушка» ықшамауданы мен Степная көшесі, № 4 жер телімінде салынып жатқан 60 пәтерлі 5 қабатты үйдің құрылыс жұмыстарымен танысты. Бас мердігер болып табылатын «DIFT GROUP» ЖШС директоры Жамбыл Баятар құрылыс материалдарының сапасына, дыбыс өткізбес қабырғалары мен орналасу жерінің қолайлылығына мән беріп отырғандарын айтты.

– «Өз үйім» бағдарламасы «Тұрғын Үй Құрылыс Жинақ Банкінің» салымшыларына жаңа ғимараттардан бірегей жағдайларда тұрғын үй сатып алуға мүмкіндік береді. Пәтерлер нарықтық бағадан арзанға сатылады. Бағдарлама басқа жылжымайтын мүліктің болуына мүмкіндік береді. «Өз үйім» бағдарламасына қатысу үшін ең төменгі төлем тұрғын үй құнының 50 пайызын құрайды. Несие мөлшерлемесі жылдық 7% құрайды, содан кейін 5% дейін төмендейді. Мысалы, TENIZ TOWERS-тен пәтер сатып алған кезде несие бойынша ай сайынғы төлем орташа есеппен 58 333 теңгені құрайды, – деді Алматы облысы бойынша ТҮҚЖБ бизнесті дамыту бөлімінің басшысы Дәурен Есембеков.

«Өз үйім» бағдарламасы бойынша пәтерлерді әскери қызметкерлерге «Әскери баспана» бағдарламасы аясында алуға болады. Тұрғын үй жәрдемақысын алушыларға несиелеудің келесі кезеңі 2020 жылдың бірінші жартыжылдығында басталады. Әскери қызметкерлер жеке баспанаға тұрғын үй жинақ жүйесіне қатысу арқылы ие бола алады. Оларға арналып төлем қабілеттілігін растау рәсімі жеңілдетілді. Тұрғын үй құнынан 15% минималды алдын ала төлем, несие мөлшерлемесі жылдық 8% құрайды. Несие ай сайынғы тұрғын үй төлемдері есебінен төленеді, әскери қызметкерлер кірістерінің көп бөлігін қарызды төлеуге жұмсамайтынын айтты.

«Тұрғын Үй Құрылыс Жинақ Банкінде» депозит ашқаннан кейін салымшылар жеңілдетілген шарттармен несие алу мүмкіндігіне ие болып қана қоймай алғашқы жарнаны төлей алады. Бұған мемлекет пен банктің өзі жыл сайын 2% мөлшерлеме салым салу арқылы көмектеседі. Ол жыл сайын салымшылардың шоттарына 20% сыйлықақы төлейді. Бұл бонус 200 АЕК немесе 505 000 теңгеден аспайтын мөлшерде болмақ. Мəселен, жыл соңына дейін 505.000 теңге шотыңызға салсаңыз, 101.000 теңге сыйлықақы түседі. Осы орайда «Отбасылық пакет» өте тиімді. Отбасының əр мүшесіне 2 млн.теңгені төрт бөліп шотқа салса, 404.000 теңгеге қаражаты ұлғаймақ. Сондықтан, ТҮҚЖБ клиенттері үшін сыйлықақының максималды мөлшерін алу үшін 2019 жылдың 31 желтоқсанына дейін депозитті толтырып үлгергендер ұтты.

Осындай мағлұматтарды алған қала тұрғындары алғашқы жарна, жеңілдетілген несие, шоттарына төленетін сыйлықақы мөлшері жайлы ақпараттармен толықтай танысты.

Мақпал МЫСА

Қапшағай қаласы