Алматы облысының қоғамдық-саяси, әлеуметтік-экономикалық газеті

ЦИФРЛАНДЫРУ: EGOV.KZ ПОРТАЛЫНДА БЕЙНЕҚОҢЫРАУ ІСКЕ ҚОСЫЛДЫ

Уақыты: 16.05.2020
Оқылды: 252
Бөлім: ӘЛЕУМЕТ

Енді «Азаматтарға арналған үкімет» мемлекеттік корпорациясының операторлары қазақстандықтарға бейнеқоңырау арқылы кеңес бере алады. Egov.kz порталы экранындағы әрекетті бөлісу сервисін «Ұлттық ақпараттық технологиялар» АҚ мамандары жасап шығарды.

Видео арқылы кеңес беруші маманның көмегін алу үшін пайдаланушы басты беттің оң жақ төменгі бұрышындағы «Виртуалды ассистент» түймесін басуы керек. Ашылған терезеде бейнекамера белгісін таңдау қажет. Жүйе пайдаланушыдан бейнекамера мен микрофонның қосылуына рұқсат сұрайды. Бірнеше секунд ішінде ХҚО операторы клиентпен байланысқа шығады. Экрандағы әрекетті көрсету үшін қызмет алушы «Экран демонстрациясы» түймесін, содан кейін «Бөлісу» батырмасын басуы керек.

Осылайша, ХҚО операторы абоненттің мониторын көре алады және оған egov.kz порталында кез келген қызметті, оның ішінде ЭЦҚ-ны қашықтан рәсімдеуге көмектесіп, мобильді азаматтар базасына тіркей алады.

Экранды «бөлісу» сервисі оператор мен клиенттің арасындағы байланысты айтарлықтай жеңілдетті, өйткені қызметтерді ұсыну процесінде 1414 телефоны арқылы кеңес беру тиімді болғанымен, қашанда ыңғайлы емес. Бұрын біздің операторлар клиенттен қай сілтемені, қай бөлім мен қызметті ашқанын үнемі сұрап отыратын. Енді біз экранда болып жатқан барлық әрекетті көре аламыз және клиентті қандайда бір қызметті алу жолдары бойынша бірден бағыттай аламыз. Бұл сервис азаматтарымыздың цифрлық сауатын қашықтан арттыруға да мүмкіндік береді.

Естеріңізге сала кетейік, коронавирус инфекциясының таралу қауіпінің сақталуына байланысты ХҚО арқылы тек «қағаз» жүзінде көрсетілетін қызметтерді алуға болады. Egov.kz порталы арқылы қолжетімді қызметтерді үйден немесе әкімдіктерде, білім беру және медицина ұйымдарында секілді жерлерде орналасатын өзіне-өзі қызмет көрсету секторларында алу керек. Мемлекеттік қызметтерді электронды түрде алу бойынша egov.kz порталындағы виртуалды ассистент кеңесшілері және 1414 бірыңғай байланыс орталығының мамандары көмектесе алады.

Айта кетейік, қазіргі уақытта Қазақстанда мемлекеттік қызметтің 80 пайыздан астамы электронды форматта қолжетімді.

"ЖЕТІСУ-АҚПАРАТ"