Алматы облысының қоғамдық-саяси, әлеуметтік-экономикалық газеті

ЗЕЙНЕТАҚЫ ЖИНАҒЫН ШЕШІП АЛУҒА ҚАТЫСТЫ ЖАҢА ЗАҢҒА ҚОЛ ҚОЙЫЛДЫ

Уақыты: 03.01.2021
Оқылды: 543
Бөлім: ӘЛЕУМЕТ

Мемлекет басшысы «Қазақстан Республикасының кейбір заңнамалық актілеріне экономикалық өсуді қалпына келтіру мәселелері бойынша өзгерістер мен толықтырулар енгізу туралы» Қазақстан Республикасының Заңына қол қойды. Заңның мәтіні газет бетінде жарияланады. Бұл туралы "Ақорданың" ресми сайты хабарлады.

"Қазақпарат" аталған Заңға кеңінен тоқталып, түсіндіріп өтті. Атап айтқанда, Қазақстан азаматтары енді Бірыңғай зейнетақы жинақтаушы қорындағы қаражатының бір бөлігін пайдалана алатын болады.

Заңға сәйкес, 2021 жылдан бастап қазақстандықтарға зейнетақы жинақтарының бір бөлігін пайдалану құқығы беріледі. Зейнетақы жинақтарының бір бөлігін нақты қажеттіліктерге пайдалану құқығын келесі азаматтар пайдалана алады:

- жұмыс істейтін, тиісті жаста зейнетақы жинақтары «жеткіліктілік шегінен» асатын азаматтар;

- сақтандыру компанияларымен БЖЗҚ-да қалған зейнетақы жинақтарының сомасы шегінде өмір бойы аннуитеттік төлемдерді қамтамасыз ететін зейнетақы аннуитеті шарттарын жасасқан адамдар;

- зейнеткерлікке шыққан азаматтар - БЖЗҚ-да қалған зейнетақы қаражатының 50 пайызынан аспайтын шекте. Егер олардың зейнетақысының жиынтық мөлшері (жасына байланысты немесе еңбек сіңірген жылдары үшін зейнетақыны, базалық зейнетақыны қоса алғанда) жоғалған табысты халықаралық стандарттарға сәйкес келетін деңгейде (кемінде 40 пайызға) алмастыруды қамтамасыз еткен жағдайда.

Белгілі бір жастағы салымшы үшін оның табысынан БЖЗҚ-ға алдағы 10 пайызы тұрақты зейнетақы жарналарын (ең төменгі жалақыдан аз емес) ескере отырып, ең төменгі зейнетақы мөлшерінен аз болмайтын зейнетақы төлемдерімен қамтамасыз етуге мүмкіндік беретін зейнетақы жинақтарының ең төменгі қажетті сомасы «жеткіліктілік шегі» ретінде қарастырылады. «Жеткіліктілік шегі» әйелдер мен ерлер үшін бірдей белгіленеді және әрбір жас үшін есептеледі. Бұл ретте ол қалыптасқан параметрлерге (кірістілік, инфляция, ең төменгі төлем мөлшері және басқалар) сүйене отырып, жаңа алушылар үшін қайта есептелетін болады.

Алдын ала есептеу бойынша, мысалы, 30 жастағы азамат үшін «жеткіліктілік шегі» 2 млн.518 мың теңгені құрайды. Осы сомадан қалғанын олар жоғарыда көрсетілген қажеттіліктерге қалауы бойынша жұмсай алады. Мұнымен қоса, 35 жас үшін – 2 млн.961 мың теңге; 40 жас үшін – 3 млн.437 мың теңге; 45 жас үшін – 3 млн.947 мың теңге; 50 жас үшін – 4 млн.495 мың теңге; 55 жас үшін – 5 млн.084 мың теңге; 59 және одан үлкен жас үшін 5 млн.586 мың теңге қажет. Яғни, бұдан асқан соманы өз еркімен алуға құқылы.

Айта кетейік, Президент Қасым-Жомарт Тоқаев Жаңа жылдан кейін тағы бірнеше Заңға қол қойды.

"ЖЕТІСУ-АҚПАРАТ"