АШЫҚ ӘҢГІМЕ ӨРБІДІ

Уақыты: 15.02.2019
Оқылды: 1080
Бөлім: РУХАНИЯТ

Талдықорғандағы «Жастарға қызмет көрсету орталығының» мәжіліс залында «Біздің міндет – мемлекеттік қызметті кәсібилендіру және сыбайлас жемқорлықтың алдын алу» атты диалогтық алаң форматында жиын өтті. Әдеп жөніндегі уәкілдер, Әдеп жөніндегі кеңес мүшелері, арнайы мониторингтік топтың, мемлекеттік қызмет көрсетулер бойынша ведомствоаралық жұмыс тобының мүшелері, облыстық басқарма, департамент басшылары, мемлекеттік қызметкерлер және БАҚ өкілдері – барлығы 350-ге жуық адам қатысқан жиын екі бөліммен өткізілді.

 

Бірінші бөлімде атқарған жұмысты қоғам көзімен саралап, облыс бойынша құрылған арнайы мониторинг тобының мүшелері, бұқаралық ақпарат құралдарының өкілдері мен қоғам белсенділері пікір алмасып, қоғамның жегіқұрты – сыбайлас жемқорлықтың алдын алуға қатысты ойларын ортаға салды. Талдықорған қалалық кәсіпкерлік кеңесінің төрағасы, тұтынушылар құқықтарын қорғау және жемқорлыққа қарсы іс-қимыл кеңесінің төрағасы Баниямин Файзуллин аталған мониторинг тобының жетекшісі ретінде топ мүшелерінің былтыр жасаған жұмыстары жайлы баяндап, мемлекеттік қызметкерлердің жалақысын көтеріп, парақорлықпен ұсталғандарды еңбек кітапшасына көрсету керектігін ұсыныс ретінде ортаға салды. Одан соң «Жетісу» газетінің заң және саясат бөлімінің меңгерушісі, журналист Мәди Алжанбай сыбайлас жемқорлыққа қарсы мәдениет қалыптастырудағы БАҚ-тың рөлі, мемлекеттік мекемелердің «төртінші билік» өкілдерімен қарым-қатынасы туралы сөз қозғап, мемлекеттік қызметтер өз деңгейінде көрсетіліп жатқанына тоқталды. Дегенмен, халыққа парамен, сыбайластықпен ұсталғандар туралы айтқаннан гөрі оның алдын алу, жою жолдарын насихаттаған дұрыс. Осы тұрғыда көпшіліктің санасында қалыптасып қалған қағиданы өзгертіп, ішкі мәдениетті қалыптастыруды қолға алу қажеттігін тілге тиек етті. Келесі кезекте сөз алған «Время» газетінің тілшісі, блогер Сандуғаш Дүйсенова мемлекеттік қызметкерлерге әлеуметтік желіде белсенділік танытып, халықтың және БАҚ өкілдерінің алдында қызметін ашық ұстауды, олармен тығыз байланыс орнатуды ұсынса, Үштөбе қаласының әкімі Рүстем Бекбосынов департамент бастамасымен Қаратал ауданында құрылған «Сервистік әкімдіктің» қызметі жайында баяндады.

Жиынның екінші кезеңі қалыптасқан ресми бөлім негізінде жалғасты. Алматы облысы әкімі аппараты басшысының орынбасары Мұрат Мәдіғұлов жалақы мөлшерін өсіру жайында қойылған сұрақтарға жауап беріп, дайындықтың қалай жүріп жатқандығы жайында ақпарат берді. Сондай-ақ, Талдықорған қаласы әкімінің орынбасары Сәуле Арзанбекова мен «Құрмет» орденінің иегері Гүлжиян Сүлейменова мансаптық өсу жайлы сөз қозғап, өздерінің қызметтік тарихын таныстырды.

Отырыстың негізгі спикері ретінде Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігінің Алматы облысы бойынша департаментінің басшысы Серікбай Нұрғисаев мемлекеттік қызмет пен сыбайлас жемқорлыққа қарсы іс-қимыл жұмыстарының жаңа механизмдерін әңгімеледі. Сонымен қатар, мемлекеттік қызмет сапасын арттыру мәселесіне, мектептердегі ақша жинаудың алдын алу мен қоғамда сыбайлас жемқорлыққа қарсы мәдениет қалыптастыру жұмыстарын жандандыруды ұсынды. Өз сөзін:– Ең бірінші – жемқорлыққа қарсы іс-қимыл, екінші – мемлекеттік қызмет көрсету, ал үшінші кезек те мемлекеттік қызметте қалай өсу керек, қалай жүру керек деген сияқты бұл саланың қыр-сырын үйрету бағытында жұмыс істеп келе жатырмыз, – деп бастаған басшы халықпен бірлесе жұмыс істеу қажеттігін алға тартты. Жыл басынан 179 адам тестілеуге қатысып, оның жартысы түгелдей заң сұрақтарына жауап бергенімен  психологиялық 150 сұрақтан тұратын екінші тесттен 65%-ы құлап қалды.

Жиын соңында облыс кәсіпкерлерінің құқықтары мен заңды мүдделерін қорғау, әкімшілік кедергілерді жою және сыбайлас жемқорлық тәуекелдерін азайту мақсатында құрылған «Protecting Business and Investments» инвестициялық бастамаларды сыбайлас жемқорлыққа қарсы қолдау жобасы бойынша департамент басшысы Серікбай Нұрғисаев пен «Oi–Qaragai Lesnaya Skazka» ЖШС және «АгроМелиоСтрой» ЖШС басшылары үшжақты келісімге қол қойды.

Әсем ЖҰМАҚАН