Басқа тұрақтаған азғантай бақытқа масаттанып кетеміз-ау кейде. Ал қос қабаққа сәл ғана кірбің түссе өмірдегі ең мұңлы жандай жабырқап қалатынымыз бар. Алайда біздің реніш, кейісімізден Күлзипа ананың қайғысы басымырақ. Тіпті, бір халықтың трагедиясын кеудесіндегі жұдырықтай жүрегіне сыйдырып жатыр. Осы бір ақиқаттың астарын Бикен Римова атындағы облыстық драма театрының 42-ші маусымының ашылуына барған жетісулық көрермендер терең ұғынғандай.
Көңілге мұң орнатып, өмірге жеңіл қарамауға үндеген қойылымның жалпы мазмұны бүгінгі қоғамдағы келеңсіз жағдайларды көз алдыңа келтіреді. Пьесаның бас кейіпкері Күлзипа қартайған шағында жалғыз ұлынан жапа шегіп, қарттар үйін саялауға мәжбүр болады. Талай қызды босағасынан аттатпаған көреген ананың талғамшылдығынан жеріген Алдан ақыр соңында туған шешесін үйінен аластап, желіккен қызбен тұрмыс құруды мақсат еткен. Бұл ақылсыздықтың, өрескел шешімнің астарында адам санасын улап, дүниеге жеңіл-желпі қарауға бастайтын ішімдік пен есірткінің тұрғаны да көрермен назарынан тыс қалмады. Осындай өкінішті халде күн кешкен Күлзипа ана – жалғызының шаңырағына сыймаған бір мұңлық.
Қойылымдағы екінші мұңлық Гүлбарам (Бибіорамал) атты Күлзипаның қатарласы. Ол да баспана мәселесімен шенді-шекпенділерді жағалап, олардан оң жауап ала алмаған бейбақ. Туған балалары мен немерелеріне сыймай, қартайғанда баспана үшін басын бәйгеге тіккен Гүлбарам да қарттар үйіне баруды намыс көріп, көшеде түнеп, ішінде бұғып жатқан өкінішін Күлзипаға ашқысы келмеген намысшыл да бейшара ана. Міне, осындай қос мұңлықтың тағдырын параллель сахналаған өнер ұжымы көремендердің жанарын жасқа толтырып, өнеріне тәнті еткізді.
«Хас сұлудың көз жасындай мөлдір өнер – театрдың» отымен кіріп, күлімен шыққан Бикен Римова шабыты маздап тұрған шағында драматургияға қалам сілтеп, «Қос мұңлықты» тудырған. Осындай тамаша пьесамен көрермен жүрегіне жол тартқан өнер ордасының кезекті ашылуында алғашқы болып сөз алған Бикен Римова атындағы облыстық драма театрының директоры Ғалия Темірбаева:
– Қымбатты көрермен! Бүгін біз Бикен апамыздың есімін арқалаған өнер ордасының 42-ші маусымын ашқалы отырмыз. Көптен бері көріспегендіктен де біз өз көрерменімізді, сіздерді сағынып қалыппыз, – дей келе аталмыш театрдың барша өнерпаздары атынан алғысын жеткізді. Сонымен қатар, алдағы уақытта көрерменді жақсы қойылымдармен қуантатындарын тілге тиек етті.
Осындай жылы лебізбен басталған қойылымның соңы да жетісулық көрермендер үшін қуанышпен аяқталды. Өйткені, өз ұлының қолынан мерт болған Күлзипа ананың тағдырының солқылдақтығы талай жүректі тулатып, жанарға жас алып келгенімен санаға сақталар өмірлік сабақ болғандай.
Асыл СҰЛТАНҒАЗЫ