Алматы облысының қоғамдық-саяси, әлеуметтік-экономикалық газеті

ТАЛДЫҚОРҒАНДЫҚ ОҚУШЫЛАР АБАЙ ӘНДЕРІН ҚОБЫЗБЕН ОРЫНДАЙДЫ

Уақыты: 11.02.2020
Оқылды: 359
Бөлім: РУХАНИЯТ

Үйірменің балаларға үйретері мол. Сабақтан тыс уақытта түрлі үйірмеге қатысып, өнер, спортта шыңдалған баланың болашағы да жарқын болмақ. Міне, сондай үйірменің түр-түрі Оқушылар сарайында бар. Солардың ішінде ҚР Мəдениет қайраткері, қобызшы Айнаш Қабыкенова ашып, жетекшілік  етіп жүрген қобыз үйірмесінің орны бөлек.

Өнерді сүйіп өскен баланың бойынан жаман қылық табылмайтыны бесенеден белгілі. Осы орайда Айнаш Жақсылыққызы балаларды өнерді сүюмен қатар адамгершілікке, жоғары мәдениеттілікке, сезімталдыққа, талғампаздыққа тәрбиелеп жатқан ұстаз. Ұлттық аспабымыз – қобыз үнін шәкірттердің бойына дарытып, музыка әліппесін меңгертіп жүрген жан.

Музыкадан еш хабары жоқ, алайда үйренуге деген талабы зор шәкірттерге қобызды қалай ұстап, ойнау керектігіннен бастап, одан шығатын әрбір дыбысқа мән бергізіп, оны жүрекке жеткізіп, мұнымен қатар музыкалық білімнің де негізін қалап, нотаны меңгерту оңай іс емес. Ол нағыз шебер маман, ұстаздың ғана қолынан келеді. Айнаш Жақсылыққызының сондай бір сабағы Абай Құнанбайұлының 175 жылдығына орай «Абай әндері» тақырыбында өтті. Сабағын: «Абай Құнанбайұлы – ғұлама, ойшыл, ақын, ағартушы, қазақ әдебиетінің негізін қалаушы, аудармашы, композитор ретінде ел тарихында өшпес із қалдырған тұлға. Оның өлеңдері мен қара сөздерінде ұлт болмысы көрініс тапты. Кейіннен Абай әлемі бірегей құбылыс ретінде бағаланды, – деп бастаған ұстаз ақынның лирикалық туындыларына тоқталып өтті.

Абайдың «Көзімнің қарасы», «Айттым, сәлем, Қаламқас» атты әндерін оқушылармен бірге орындап, оның тарихына үңілді. Қобыз аспабы туралы да сыр шертті.

– Қорқыт ата туралы аңызға жүгінсек, ұйықтап кетіп, “егер өлімді есіңе алмасаң, мәңгі өмір сүресің” деген аян естиді. Өзінің жүйрік желмаясына мініп, халқы бақытты өмір сүретін жерұйықты, мәңгілік өмір сырын іздеп дүниенің төрт бұрышын кезеді. Бірақ қайда барса да, алдынан көр қазып жатқан адамдарды жолықтырады. “Кімнің көрі?” деген сауалына “Қорқыттың көрі” деген жауап естиді. Ақыр аяғында «жер кіндігін тапсаң, тірі қаласың» деген аян естіп, туған жері Сыр өңіріне оралады. Содан мәңгі өмір тек өнерде деген ойға келіп, қобыз аспабын ойлап шығарады. Қорқыт бабамыздан жеткен қылқобыздың үні қоңыр, әуезді. Онымен көбіне ұлттық нақыштағы күйлер орындалады. Кейіннен оркестрге арналып байытылған сым қобыз аспабымен халықтық, классикалық шығармалар орындалуда, – деді.

Бүгінде қобыз сырын меңгеріп жүрген шәкірттер Алина Зарипханова, Самал Сағи, Толғанай Мейірхан, Әмина Болат, Аружан Мұқаш, Айым Әуесхан, Сымбат Досбайдың аспапта ойнау шеберліктері қалыптасып қалған. Сондықтан да олар Абайдың сазды әндерін жүрекке жеткізіп орындап берді. Қобызшылар ансамблінің түрлі байқау, концерттерге қатысып, топ жарып жүруі де ұстаздың қажырлы еңбегі мен жас өрендердің ізденісінің арқасы. Қорқыттан жеткен қоңыр үнді жалғап жүрген қозбызшы қыздар өнердің талай биігінен көрінері хақ.

Алма ЕСЕНБАЕВА

Алматы облысы