Оқи отырыңыз
Биыл Кеңес әскерлерінің Ауғанстан жерінен шығарылғанына 36 жыл толды. Сол кездегі жас өрендер соғыстың қатеріне бел буып, абыройлы борышын өтеп, жанқиярлық ерліктің ерен үлгісін көрсете білді. Ауған жеріне алғашқылардың бірі болып аттанған – Марат Темірғалиев.
Кейіпкеріміз 1962 жылы Шығыс Қазақстан облысы, Күршім ауданы, Теректібұлақ ауылында дүние есігін ашыпты. Сол елді мекеннің орта мектебінде 10-сыныпты 1979 жылы аяқтап, 2 жыл әскер қатарына шақырылғанға дейін отбасы жағдайына байланысты малшы болады. Кейін әскери комиссариатқа шақырып Аякөз қаласына жіберілген. Сол қаладағы әскери бөлімге түсіп, 3 ай жауынгерлік дайындықты өткереді. 1981 жылы Аякөзден Алматыға келіп, Ауғанстан жеріне аттанған ол 1983 жылғы сәуірге дейін Ауғанстанда автожөндеу батальонында жүргізуші болады. «Біздің міндет – атылған, жарылған әскери техникаларды жөндеп, қатарға қосу болатын. Батальонымыз Шындант қышлағында орналасты. Жөндеуге жарамды техниканы оңдап, жарамсызын сүйреп апарып тастайтынбыз. Әрине, әскери көлік болғаннан кейін ішінде құрал-жабдығымыз сай болатын», – дейді өткен күндерге көз жіберген ардагер.
1983 жылы аман-есен елге келіп Саратов ауылшаруашылығы техникумын (қазіргі Саратовка ауылындағы Шығыс Қазақстан көпсалалы колледжі) тамамдап, 10 жыл кеңшарда веттехник болып істеген. Кеңес одағы тарап, кеңшар мен ұжымшарлар құрдымға кеткеннен кейін Жетісу облысы, Сарқан қаласына келіп орналасады. Ақпан айынан бері зейнет демалысында.
Қазіргі таңда Марат Тұрсынғалиұлы Ауған соғысы ардагерлері ұйымының мүшесі ретінде аудандағы қоғамдық шараларға, жастарға патриоттық тәрбие беру жұмыстарына белсене араласып келеді.
Марат ағамыздың зайыбы Орал Шабденова ұзақ жыл білім беру саласында жас ұрпақ тәрбиелеген ұстаз, қазіргі уақытта зейнет жасында. Ардагер ағамыз зайыбымен бірге отбасында 1 қыз, 1 ұл тәрбиелеп өсіріп, 4 немере сүйіп отырған ардақты ата мен әже.
Өскелең ұрпаққа үлгі болған ардагерлерді қадірлеп, құрметтеу біздің борышымыз. Елімізде өсіп келе жатқан болашақ ұрпақ осындай батыр ағаларымызға қарап, бой түзеп өссе дейміз.
Жақсылық ЖОМАРТҰЛЫ
Сарқан ауданы
