Оқи отырыңыз
Өңірімізде алғашқы рет орманшылар мерекесі аталып өтті. Аталмыш шараға осы салада ұзақ уақыт еңбек еткен ардагерлер мен бүгінгі кезде жұмыс істеп жүрген орманшылар шақырылды. Сонымен қатар, игілікті шараға ҚР Парламенті сенатының депутаты Нұрлан ҚЫЛЫШБАЕВ, облыс әкімінің орынбасары Серікжан Бескемпіров арнайы қатысып, көпшілікті мерекесімен құттықтады. Ал облыстық табиғи ресурстар және табиғатты пайдалануды реттеу басқармасының басшысы Айбек Қонақбаев баяндама оқып, өңіріміздегі табиғатты қорғау, табиғи ресурстарды сақтау саласында атқарылып жатқан жұмыс ауқымын айтып өтті.
Оның айтуынша, облысымызда бүгінгі таңда 4,1 миллион гектардан астам орман қоры бар. Оның ішіндегі орманмен қапталған аумақ 1,73 миллион гектардан асады. Осыншама аумақтағы орманды қорғау, күзету, өсіру және орманды ұтымды пайдалану жұмыстарын 14 орман шаруашылығы мекемесіндегі 961 маман мен қызметкер атқарады. Өңірімізде орман динамикасы жылдан-жылға өсіп отыр. Айталық, республика бойынша орман көрсеткіші 4 пайыз болса, облысымызда 8,6 пайызға жетіп, ел бойынша төртінші орында тұр. Демек, осындай жетістікке жетудің өзі орманшылардың тынымсыз еңбектенуінің арқасы.
Орман шаруашылығын нығайту үшін мемлекет тарапынан да қолдау көрсетілуде. Айталық, былтыр республикалық бюджеттен 175,0 млн. теңге қаржы бөлініп, бес орман шаруашылығы мекемесіне, биыл 197,0 млн. теңгеге 6 орман шаруашылығы мекемесіне орман орналастыру жұмыстары жүргізілген. Келер жылы орман орналастыру жұмысы барлық мекемеде толықтай аяқталады. Осы салаға биыл облыстық бюджеттен 1,4 млрд. теңге бөлініп, жабдықтар мен техника сатып алынды. Бұл бойынша біздің өңір республикада алдыңғы орында тұр. Биыл 96,0 млн. теңгеге орман шаррушылығын және өрт сөндіру жолдарын қалпына келтіруге арналған үш қуатты шынжырлы трактор, 38,0 млн. теңгеге 7 патрульдік автокөлік, 50 млн. теңгеге бір орманшы кеңсесі сатып алынды. Келесі жылы 4 өрт сөндіру техникасын сатып алу жоспарланып отыр.
Қазіргі таңда орманшылардың жалақысын көтеру жоспарланған. Осы мақсатта бюджеттен 117,0 млн. теңге бөлініпті. Маусым айының бірінен бастап 4 айдың жалақысы қайта есептеліп, қыркүйек айында қосылып беріліпті. Келесі жылы орманшылар жалақысы тағы да 25 пайызға артады. Сондай-ақ, орман күзеті кордондармен, киім-кешек, жер телімдерімен, басқа да қажетті құралдармен қамтамасыз етіледі.
Өңірдің орман саласында бұдан басқа да жетістік көп. Бұл туралы жарыссөз кезегінде ардагер орманшылар егжей-тегжейлі айтып берді. Сондай-ақ, бір топ орманшы мерекелік медальмен, облыс әкімінің Құрмет грамотасымен, басқарма басшысының Алғыс хатымен марапатталса, жиналысқа қатысқандардың бәріне арнайы дайындалған сый-сияпаттар үлестірілді. Шараның соңы ақ дастарқан басындағы тілектермен жалғасты.
Келешекте облыста Орманшылар күні жыл сайын қазан айының үшінші демалыс күні мерекеленіп отырмақ.
Қажет АНДАС
Алматы облысы
