Алматы облысының қоғамдық-саяси, әлеуметтік-экономикалық газеті

КАРАНТИН КЕЗІНДЕ ЖАЗҒЫ ЛАГЕРЬЛЕР ЖҰМЫС ІСТЕЙ МЕ? БАСҚАРМА ЖАУАБЫ

Уақыты: 30.05.2020
Оқылды: 446

«JETISY MEDIA» ақпараттық алаңында Алматы облыстық білім басқармасының басшысы Майгүл Омарованың қатысуымен баспасөз мәслихаты өтті. Онда сала басшысы оқу жылының қорытындысын жариялап, алда атқарылар істерді баяндады.

– Мектеп бітіруші түлектерге салтанатты түрде аттестат тапсыру маусым айының 3-і мен 4 күндеріне белгіленді. Аттестатты салтанатты тапсыру мектеп қабырғасында бір күнде шектеулі контингентпен, яғни, ағымдағы жылдың түлектері мен олардың 2-ден аспайтын ата-аналарының қатысуымен санитарлық-гигиеналық шектеулерді қамтамасыз ете отырып өткізіледі. Іс-шарада параллельді сыныптардың түлектері мен олардың ата-аналарының кездесулеріне жол берілмейді, - деді басқарма басшысы.

Брифингте белгілі болғандай, мектеп бітіруші түлектер 20 маусым – 5 шілде аралығында ҰБТ тапсырады. Облыста 16 ҰБТ тапсыру орталығы бар. Бүгінгі күні аудиториядағы балалар санын азайтып, лектер санын арттыруды жоспарланған. Яғни, аудиторияда отырған балалардың арасындағы арақашықтық сақталады. Мектеп бітірген 15256 түлектің 11589-ы (75,9 пайызы) ҰБТ тапсыру үшін базаға тіркелді.

- Өздеріңіз білетіндей, бірнеше жыл қатарынан еңбек нарығының қажеттілігіне қарай облыс әкімінің гранты беріліп келеді. 2017 жылы жергілікті бюджет есебінен 100, 2018 жылы – 106, 2019 жылы облыстық бюджеттен жалпы конкурс бойынша 150, көпбалалы және аз қамтылған отбасы балаларына – 100 және республикалық бюджет есебінен атаулы әлеуметтік көмек алатын отбасы балаларына 301 білім беру гранты тағайындалған болатын. 2020 жылы жергілікті бюджет есебінен 200 білім беру грантын тағайындау жоспарланып отыр. Ал жазғы демалысқа келетін болсақ, облыстық тауарлар мен көрсетілетін қызметтердің сапасы мен қауіпсіздігін бақылау департаментінің бас мемлекеттік санитариялық дәрігерінің 2020 жылғы 25 мамырдағы №12 қаулысына сәйкес, балаларды қабылдау және қызмет ету құқығынсыз дайындық жұмыстарына рұқсат берілді. Бүгінгі күні қала сыртындағы лагерьлерде дайындық жұмыстары жүргізілуде. Жазғы уақытта облыста қала сыртындағы 26 лагерь жұмыс істейді деп жоспарлануда (мемлекеттік-9, жеке меншік-17), – деді басқарма басшысы.

Алма ЕСЕНБАЕВА

Алматы облысы