Қазақстан Республикасы Парламенті Сенатының депутаттары Бірғаным Әйтімова мен Нұрлан Қылышбаев Елбасы Нұрсұлтан Назарбаевтың «Болашаққа бағдар: рухани жаңғыру» атты мақаласындағы басым бағыттарды насихаттау мақсатында Жетісу өңіріне жұмыс сапарымен келіп, елді мекендердің тыныс-тіршілігін көріп қайтты. Аралау барысында шаруа қожалықтарының иелерімен, жеке кәсіпкерлермен кездесіп, өңірде атқарылып жатқан жұмыстардың жай-күйімен танысты.
Ғалымдар ауылы
Сенат депутаттары алдымен шаруаның жайын білмекке ден қойды. Әрине, өлкеміз аграрлы аймақ болғандықтан ауылшаруашылығы дақылдарын өсіруде алдыңғы қатардан көрінеді. Әсіресе, қант қызылшасы, майбұршақ, жүгері өсіруден республикамыздың басқа өңірлерінен алда келеді. Сондықтан сенаторлар ат басын бірден Ескелді ауданына бұрды. Қонақтарды Талдықорған әуежайынан күтіп алған аудан әкімінің орынбасары Қайырғали Алыбаев оларды «Хильниченко және К» сенім серіктестігінің қант қызылшасы алқабына әкелді. Жайқала өскен жасыл желек самал желмен тербеліп, тиянақты еңбектің нәтижесін аңғартып тұр. Аудан тұрғындарының көбін тұрақты жұмыс орнымен қамтамасыз етіп отырған серіктестікке деген елдің сенімі арта түскен. Жыл сайын қыруар алқапты игеріп, аудан бюджетіне қомақты қаржы құйып отырған серіктестіктің алдағы жоспарлары да ауқымды. Сенатор Бірғаным Әйтімова сенім серіктестігінің төрағасы Виктор Хильниченкомен әңгімелесу барысында Елбасының қант қызылшасын өсіруге ерекше назар аударып отырғанын айтып, тұрғындардың қажырлы еңбегінің есебі арқылы қант импортын азайтып, қазақстандықтарды таза, отандық қантпен қамту мәселесін сөз етті.
Осыдан кейін қонақтар ғалымдар ауылы атанып кеткен Жетісу ауылына келді. Алдымен ауылдың атын аспандатқан талай ғалым мен қаламгерді, басқа да саланың озық ойлы мамандарын түлеткен Жұматай Жақыпбаев атындағы орта мектепке бас сұқты. Шалғай ауылдағы осы бір шағын ғана білім ордасындағы жан жадырататын көрініс кезінде ҚР Білім және ғылым министрлігін басқарған, елдің білім саласының қыры мен сырына қанық сенатордың ризашылығына бөленді. Жарқыраған сыныптар, заманауи жабдықтар қойылған пән кабинеттері өз ерекшелігімен өзгешеленеді. Әсіресе, мектеп ішінен ашылған мұражайда бір дәуірдің ұлылығы көрініс тапқан. Білім ордасында шет тілін оқытуға да ден қойылған. Бірғаным Әйтімова ағылшын тілі пәнінің мұғалімдерімен сол тілде сөйлесіп, білімдерін сынап көрді. Олар осындай көңіл-күймен сол ауылдың кәсіпкер азаматы Әлен Тайжановтың шаңырағына бас сұқты. Құтты қонақты қуана қарсы алған Тайжановтар отбасы жайылған дастарқаннан дәм татқызды. Сенат депутаты шаңырақ иелеріне Астанадан арнайы алып келген ноутбук пен түрлі түсті принтер сыйға тартты. Оған әулет балалары ерекше қуанды.
Келесі кезекте Текелі қаласында сапарын жалғастырған сенаторлар қала әкімі Бақтияр Өнербаевтың бастауымен құрылысы біраз жылдан бері тоқтап тұрған Орталық Азия университеті бой көтеретін аумаққа барып, университет өкілдерімен кездесті. Оның жобасымен танысқан сенатор егер жоспар ойдағыдай жүзеге асса таулы аймақтың туризмі мен білім саласының ортақ өркендейтініне сенім білдірді. Университет өкілдерінің айтуынша, Орталық Азия жоғары таулы аудандары жұртының проблемаларын зерделеумен және тиісті мамандар даярлаумен шұғылданатын университеттің құрылысы исмаилиттер қоғамдастығының мұрагер имамы, Бекзада IV Аға Ханның бастамасымен жүргізіліп жатыр. Университет пайдалануға берілген соң инфрақұрылымы дамыған шағын қала ретінде Текелі экономикалық дамудың жаңа серпініне ие болатыны анық. Текелідегі кампустың жобалық дизайнын жапондық «Арата Исозаки және серіктестер» компаниясы жасапты. Сондықтан да академиялық қалашықтың сейсмоорнықтылығына сенуге болады. Орталық Азия университеті – зайырлы ұйым, оның оқу бағдарламасына діни және дінтану пәндері кірмейді.
Сенаторлар алғашқы күнгі жұмыс сапарын осылай қорытындылады. Барған жерінің бәрінде тұрғындардың берекелі тірлігіне ризашылығын білдірген Бірғаным Сарықызы Елбасы мақаласында айтылған жайттардың басты назарға алынып отырғанына куә болды.
Көркіне көз тояттайды
Қазақстан Республикасы Парламенті Сенатының депутаты Бірғаным Әйтімова бастаған топ Талдықорған қаласындағы бірқатар нысанды аралады. Бұдан соң қалалық әкімдікте болып, жұртшылықпен жүздесті. Кездесу барысында Елбасы Нұрсұлтан Назарбаевтың «Болашаққа бағдар: рухани жаңғыру» атты мақаласы талқыланып, мақсат-міндеттері сараланды.
Талдықорған қаласы әкімдігінің үлкен жиынжайында өткен кездесуге облыстық мәслихат хатшысы Сұлтан Дүйсембінов пен облыстық мәслихат депутаттары, ардагерлер кеңесінің мүшелері, мекеме басшылары, білім және денсаулық сақтау салаларының, «Нұр Отан» партиясының, бұқаралық ақпарат құралдарының өкілдері қатысты. Жиынды ашып, жүргізіп отырған Талдықорған қалалық мәслихатының хатшысы Қайрат Бұлдыбаев сөзді Бірғаным Сарықызына ұсынды. Мінбеге көтерілген Сенат депутаты алдымен күннен күнге құлпырып, жасарып, жайнаған жасыл желекті шаһардың бүгінгі келбетіне тамсанып, таңданғанын жеткізді.
Алыстан көз тартатын, сәні мен салтанаты, сәулеті мен дәулеті жарасқан әдемі ғимараттардың көбейгеніне, құрылыс қарқынының артып, елдің әлеуметтік тұрмыс-тіршілігінің жақсарғанына қуанды. Сондай-ақ, ауылшаруашылығы саласының жанданып, мал бағып, егін егумен айналысатын жеке шаруа қожалықтары санының артқанына, кәсіппен айналысып, іс жүргізетін, өнім өндіріп, кәсіпорын ашатын іскер азаматтардың көбейгеніне ризашылығын білдірді. Осының бәрі халықтың ауызбірлігі мен жұмыла атқарған еңбегінің және Мемлекет басшысы Нұрсұлтан Назарбаевтың сарабдал саясатының арқасында қол жеткізілген тың табыстар екенін әңгіме арқауына айналдырды.
Бұдан соң Елбасының «Болашаққа бағдар: рухани жаңғыру» атты мақаласы басты тақырыпқа айналып, әсіресе білім саласына айрықша назар аударылды. Осы ретте аталмыш саланы дамытып, жетілдіруге байланысты қабылданған жаңа Заңдар мен енгізіліп жатқан өзгерістерге ден қойылып, жан-жақты түсіндірілді. Сонымен бірге жиырма бірінші ғасырда әр қазақстандықтың компьютерлік технологияны сауатты пайдаланып, шет тілдерін де меңгерулері тиіс екендігі, бұл үшін мемлекет тарапынан қолдаулар көрсетіліп жатқандығы айтылды. Халықтың әлеуметтік жағдайын, тұрмыс-тіршілігін жақсарту бағытында іске асырылып жатқан жұмыстарға да мән беріліп, денсаулық сақтау, зейнетақы, жәрдемақы төлеу, бала туу, әлеуметтік қамсыздандыру сияқты мәселелерге көңіл бөлінді. Мәдениет саласын жандандырып, спортты өркендетуде іске асырылып жатқан жұмыстар да назардан тыс қалған жоқ. Осының аясында Парламенттің жоғарғы палатасында атқарылып жатқан істер баяндалды. Онда белгілі болғандай, өткен жылы ел Сенаты сексен төрт заң қабылдапты. Олардың ішінде ең өзектілері Қазақстан Республикасы «Мемлекеттік білім беру жинақтау жүйесі» және «Міндетті әлеуметтік медициналық сақтандыру» туралы Заңдар. Бүгінде осы бойынша көптеген жұмыс жүргізіліп жатыр.
– Бұл заңдардың халық үшін әлеуметтік маңызы зор. Мен түрлі кездесулерге көп қатысамын. Бірақ, көпшілік осы мемлекеттік білім беру жинақтау жүйесі туралы ақпаратты көп біле бермейді. Бұл өте қолайлы жүйе. Сіз өз балаңызға туғаннан-ақ депозит ашасыз. Оған шамаңыз жеткенше ай сайын салым жасап отырасыз. Оған жылына мемлекет бес, жеті пайыз, банк он төрт пайыз сыйақы қосады. Кейін ұл-қыздарыңыз ер жетіп, өскен соң арнаулы немесе жоғары оқу орнына түсетін кезде сол қаражатты қолданасыз. Ал, балаңыз грантқа түссе жиналған қаражатты барлық сыйақымен қосып аласыз немесе өзге балаңыздың атына аударуға мүмкіндігіңіз бар, – деді Сенат депутаты.
Сондай-ақ, Міндетті әлеуметтік медициналық сақтандыру бойынша жасалған өзгерістер туралы да айтылды.
– Соңғы кездегі қаржылық дағдарыс пен елдің макроэкономикасындағы жағдайларға байланысты міндетті медициналық әлеуметтік сақтандыру жүйесінде салым пайыздары азайтылып, бағдарламаның орындалу мерзімдері ұзартылды. Мәселен, осыған дейін 2018 жылдан бастап, әр азамат жалақысының төрт пайызын Міндетті әлеуметтік медициналық сақтандыру қорына аударуы керек болса, біз мақұлдаған заңда оның мөлшері 3,75 пайызға түсірілді. Жұмыс берушілер бірінші шілдеден бастап міндетті әлеуметтік медициналық сақтандыру жүйесіне екі пайыз аударуы керек еді, ол бір пайызға қысқартылды. Жалпы, азаматтардың әлеуметтік жағдайын жақсарту үшін үлкен жұмыстар атқарылып жатыр, – деп атап өтті депутат.
Кездесудің соңында қала тұрғындары көкейінде жүрген сауалдарын қойып, депутаттардан тұшымды жауап алды. Депутаттар қалалық көпсалалы аурухананың тыныс-тіршілігімен де танысып, атқарылып жатқан жұмыстарға көңіл тоғайтты. Оқушылар сарайын да көріп, жаңа ғимараттың ішін аралады. Мамандардың айтуынша, қазір бұл жерге үш мыңнан аса бала келеді. Олар үшін би, актерлік шеберлік, информатика, домбыра, хореография, бейнелеу өнері, шахмат, дойбы, қолөнер шеберлігі, вокал, театр, қолданбалы өнер, робот техникаларын құрастыру, жас тілші, көркемсөз шеберлігі сияқты алпыстан аса үйірме жұмыс істейді. Қосымша ашылып жатқандары да бар. Әр жасөспірім қарым-қабілетіне қарай үйірмені өзі таңдайды. Ғимаратты тамашалаған депутат жас жеткіншектердің пайдалы іспен шұғылданып, бойларындағы қарым-қабілетті арттыруға мүмкіндік туғызған шарапатты шаруаға марқайып қайтты.
– Талдықорған қаласының бүгінгі дамуы жаман емес. Шаһарда салынған жаңа саябақтар мен демалыс орындары көз жауын алады. Көгалдандыру мәселесіне де ерекше көңіл бөлінген. Мұндай жұмыстарды жандандыруға Елбасының өзі көңіл бөліп, осыған байланысты міндет жүктеген болатын. Міне, сол тапсырмалардың нақты жүзеге асырылып жатқанын көріп отырмыз. Бұл Талдықорғанның өсіп-өркендегенін аңғартады. Әсіресе, «Көктем Гранд» деп аталатын жаңа қонақүйдің ерекшелігін айрықша атап өткен жөн. Қаладағы көпсалалы аурухана, Жастарға қызмет көрсету орталығы, Оқушылар сарайы сияқты әлеуметтік нысандар да заман талабына сай бой көтеріпті. Заманауи үлгіде салынып жатқан көп қабатты тұрғын үйлер де алыстан көз тартады. Осының бәрі соңғы жиырма бес жыл ішінде жүзеге асырылған мемлекеттік бағдарламалардың жемісі деуге болады. «Нұрлы жол», «Нұрлы жер» бағдарламаларының да сәтті іске асырылып жатқандығы байқалады.
Сондықтан Жетісу өлкесінің болашағы зор, келешегі кемел деуге негіз бар, – деп ойын жеткізген Бірғаным Сарықызы облыс орталығының бүгінгі дамуына жоғары бағасын беріп қайтты.
Жылы жүздесу
Халық қалаулылары Сарқан ауданына сапарлап келді. Өңірге келген депутаттар өз сайлаушыларымен кездесіп, жылы жүздесу өткізді. Жыл бойы Парламент қабырғасында талқыланған түрлі Заң турасында жұртшылыққа тарқата айтып, ойымен бөлісті. Мұндай дидарласуларда әсіресе қарапайым халық көкейдегі сауалдарын тікелей қоюға мол мүмкіндік алады.
Осы ретте ауданға арнайы келген Қазақстан Республикасы Парламенті Сенатының депутаттары Бірғаным Әйтімова, Төлеубек Мұқашев, Нұрлан Қылышбаев және облыстық мәслихат хатшысы Сұлтан Дүйсембіновпен болған кездесуде бірқатар көкейкесті сұрақтар қойылды. Жиынды ашқан аудандық мәслихат хатшысы Қадыр Абдрахманов алғашқы сөзді Сенат депутаты Бірғаным Әйтімоваға берді. Бірғаным Сарықызы негізгі үш мәселе төңірегінде сөз өрбітті.
Онда Мемлекеттік білім берудің жинақтаушы жүйесі және Міндетті әлеуметтік медициналық сақтандыру және Қазақстан Республикасының кейбір заңнамалық актілеріне әлеуметтік қамсыздандыру бойынша өзгерістер мен толықтырулар енгізу туралы әңгімеленді. Аталмыш мәселелер бойынша жан-жақты тарқатып айтып, олардың тиімді тұстарын түгендеген баяндамашы сонымен бірге Сенат депутаттары тарапынан жыл көлемінде жасалған жұмыстан хабардар етті.
Баяндамашыдан соң аудандық ардагерлер кеңесінің төрағасы Қадыл Жанасбеков, аудандық «Жастар» ресурстық орталығының жетекшісі Аслан Күбентаев сөз алып, өз ойларын ортаға тастады. Жиында халық қалаулыларына өңірдегі шекарамен шектесетін елді мекендердегі әлеуметтік жағдайға баса назар аударылса, мемлекеттік сатып алу заңына өзгерістер енгізілсе, құрылысы ұзақ жылға созылған аудандық орталық аурухананың қосымша ғимаратына қаржы бөлінсе деген өтініштер айтылды. Депутаттардың сапары Қапшағай қаласы мен Талғар ауданында жалғасты.
Айгүл Байбосынова,
Қажет Андас.