Алматы облысының қоғамдық-саяси, әлеуметтік-экономикалық газеті

ТАУЛЫ ӨЛКЕДЕГІ ТОЛАЙЫМ ТАБЫС

Уақыты: 11.02.2019
Оқылды: 268
Бөлім: ЭКОНОМИКА

Өткен жыл Кеген ауданы үшін тарихи жыл болды. Елбасының Жарлығымен араға 20 жыл салып Кеген ауданы қайта қалпына келді. Осы өңірдің перзенті, аудан әкімі Талғат БАЙЕДІЛОВ осынау  есте қалар жылдың нәтижелерін егжей-тегжейлі әңгімеледі.  Жиналысқа облыс әкімінің орынбасары Айдарбек БАЙЖАНОВ қатысты.

 

Таулы өңірде өткен жылы өнеркәсіп саласында 18122,9 миллион теңгенің өнімі өндіріліп, нақты индекс көлемі 109,4 пайызды құрады. Ауданға жыл ішінде 4205,1 миллион  теңге инвестиция тартылды. Нақты көлем индексі 140,3 пайызға жетті. Ауылшаруашылығы саласы бойынша  20460,2 миллион теңгенің өнімі өндірілді. Нақты көлем индексі 103, 6 пайызды құрады. Өңірде ірі қара 51300 басқа, жылқы 28400 басқа, қой-ешкі 198200 басқа жетіп отыр. Ауданда «Тантыбай», «Дархан», «Сенім», «Құмтекей» атты асыл тұқымды қой өсіретін құрылымдар бар.

Ең қуаныштысы, биылдан бастап ауданда жаңа игіліктердің арнасы тартылып, нақты жұмыстар жүргізілуде.  «AIko Eneji» ЖШС-не қуаттылығы 15 мВт, жылына 24 мың кВт/сағат электр энергиясын өндіретін жел электр стансысының құрылысын салуға 50 гектар жер берілді. «Тұздыбастау Тау» ЖШС Қарқара ауылындағы Шөладыр учаскесінен 10 мың тонна тұз, 10 мың тонна сода өндіретін зауыт салуды жоспарлауда. Биыл құрылыс жұмыстары басталады. Осы арқылы өнеркәсіп өндірісінің жоспары өткен жылмен  салыстырғанда 500 миллион теңгеге артады.

Былтыр «Жаңа Ақтасты» ЖШС құны 900 миллион теңге болатын, 6 мың бас ірі қара малын бордақылайтын алаңның құрылысын аяқтады. Мұнда 35 адам жұмыспен қамтылған. Аталған серіктестік 1 миллиард теңге инвестиция құйып, қазіргі таңда 1000 бас ет бағытындағы  «Абердин Ангус» асыл тұқымды ірі қарасын алып келді. Биылғы жылы «Фуд Мс Агро» шаруа қожалығы Алғабас ауылдық округінен 3 мың басқа арналған мал бордақылау алаңын салу үшін жұмыс жүргізуде. Олар жыл ішінде 500 миллион теңге инвестиция салып, 20 адамды еңбекпен қамтымақ. «Руслан» шаруа қожалығы Шырғанақ ауылынан 100 басқа арналған тауарлы-сүт фермасын ашуды жоспарлап отыр. Мұның сыртында «Park Canyon» ЖШС Шарын өзенінің бойынан жаңа заманауи ойын-сауық паркін салмақшы. Биыл аталған серіктестік 700 миллион теңгенің құрылыс жұмыстарын бастайды. СПК «Талас» құрылымы Қарқара ауылдық округінен 400 басқа арналған тауарлы-сүт фермасын ашу үшін жұмыс жүргізуде. Аталған жоба іске қосылғанда аудан бюджетіне 51 миллион теңге кіріс кіріп, 50 адам жұмыспен қамтылмақ. 

Бүгінде ауданда ірі қара, қойға арналған 14 мал бордақылау алаңы ірі қара мал етінің экспорттық әлеуетін арттыру бағытында жұмыс жүргізуде. «Ұларлы» шаруа қожалығы арқылы Қыр­ғызстанға 20 тонна ет экспортқа шығарылған. Аудандағы шағын және орта кәсіпкерлік субъектілерінің жұмысы жанданып, өнім көлемі көбейіп, бюджет қор­жынына түскен салық көлемі артқан. «Бизнестің 100 жобасы» аясында  дүкен, наубайхана, көлік жуатын орын, тіс емдеу кабинеттері ашылып, 15 адам тұрақты жұмыспен қамтылған. Құрылыс жұмысы да қарқынды. Биыл Кеген ауылынан 15 жалгерлік тұрғын үй тұрғызылады деп күтілуде. 
Жиналыста аудандық мәслихаттың депутаты Сабыржан Смағұлов Қарабұлақ, Ақ­тасты, Алғабас ауылдарындағы ауызсу құбырын қалпына келтіруге көмек сұраса,  С. Серкебаев атындағы орта мектептің директоры, аудандық мәслихаттың депутаты Лара Нүсіпқожаева аудан орталығындағы №3 Кеген орта мек­тебіне, аудандық аурухана­ға күрделі жөндеу жұмыс-    та­рының жүргізілетініне қуанышын білдіріп, І. Жұмағұлов атындағы орта мектепке күрделі жөндеу жүргізу керектігін айтып өтті. 

Жиынды қорытындылаған облыс әкімінің орынбасары Айдарбек Байжановқа залдағы жұртшылықтан Нарынқол –  Кеген – Талдықорған бағытында автобус жүргізіліп тұрса, Кеген, Райымбек аудандарына «көгілдір отын» жеткізілсе, интернет желісі жақсартылса деген орынды сұрақтар берілді. Облыс әкімінің орынбасары аталған мәселелердің алдағы уақытта шешімін табатынын айтты. «Қазавтожол» мекемесінің басшысы биыл Көлсайға дейінгі жолдың бітетінін, алдағы уақытта аудан аумағынан Қарқараға дейінгі жолдардың жасалатынын жеткізді

Қанат БІРЖАНСАЛ.