Оқи отырыңыз
Бүгін біз мыңғыртып мал өсіріп отырған Барлыбек Сырттанов ауылындағы «Дарина» шаруа қожалығы жайлы айтамыз.
Қожалық жетекшісі Бауыржан Баймұханов еті тірі жігіт. Ырысты дала бүгін Бауыржанның тіршілігіне тыныс беріп жатқандай сезілді бізге. Ақсу өзенінің бір тармағын бауырына алып, көсіліп жатқан кең өріс мал басын қанша өсіруге тарлық етпейтіні белгілі. Бірақ Бауыржан мал басын көбейткеннен гөрі, өнімі жоғары сүтті және етті бағыттағы асыл тұқымды мал өсіруді қолға алыпты. Шаруасын бастағалы көп болмаса да қорасындағы асыл тұқымды ірі қараның саны 294-ке, жылқы 96 басқа жетіпті. Жыл сайынғы мал төлінің аналық басын сақтап қалып, асыл тұқымды бұқаларын саудалаудан түскен қаржыны шаруашылықтың керекті құрал-жабдығын толықтауға жұмсап келеді. Қазірдің өзінде шаруашылықтағы үш «Беларусь» тракторы, қосымша агрегаттар соның есебімен алынған.
– Дәл осы шұрайлы өңір жергілікті малдың басын мыңғыртып өсіруге қолайлы. Оны жерсіндіру, бағып-күту, азық-түлігін қамдау да жеңіл. Алайда, онымен мемлекеттік бағдарламаларға қатысу қиындау. Есесіне, асыл тұқымды мал өсіру, оны жерсіндіру, төлін жетілдіру оңай емес. Көбірек тер төгуді талап етеді. Бірақ шаруаңды бір ізге түсіріп алсаң пайдаға шаш етектен кенелесің. Мысалы, өткен жылы 148 бас сиырға 8 бас «Әулиекөл» асыл тұқымды бұқа қосып, 2 миллион 680 мың теңге демеуқаржы алдым. Бұл шаруашылықты одан ары көлемдендіруге көп қолдау болып отыр, – дейді қожалық жетекшісі Бауыржан Баймұханов.
Кейінгі жылдары Ақсу өңірінде қант қызылшасына деген ұмтылыс та арта түскен. Оған Ақсу қант зауытының қайта іске қосылуы түрткі болды. Өткен жылы ақсулықтар 2020 гектар жерге қант қызылшасын сеуіп, гектарынан 356,4 центнерден өнім алып, 72 мың тонна шикізат жинады. Бұл өз кезегінде «Дарина» шаруа қожалығының да жұмысына серпін берді. Олар өткен жылы 15 гектар жерге қант қызылшасын сеуіп, күтіп баптауға байланысты агротехникалық шараларды уақытында жүргізіп, әр гектарынан 450 центнерден барлығы 675 тонна өнім алыпты.
– Өткен жылдан бері қант қызылшасына ден қойдық. Былтыр қант қызылшасынан 12 млн. теңге таптым. Бұл алдағы уақытқа деген құлшынысымызға жігер берді. Биыл қант қызылшасы алқабын 20 гектарға жеткізіп, 900 мың тонна өнім алуды жоспарлап отырмыз, – дейді шаруашылық жетекшісі. Мұнымен қоса «Дарина» шаруа қожалығы өңірдегі шағын және орта бизнесті өркендетуге белсенді үлес қосып келеді. Бизнес және халыққа қызмет көрсету субъектілері тұрғындардың көңілінен шығып, ауылддастарын жұмыспен қамтуға үлес қосуда. Сондай-ақ, салық түсімдерін уақытылы төлеп, өңір экономикасының еселенуіне көп көмегін тигізіп келеді.
Қажет АНДАС
Ақсу ауданы
