"МУЗЕЙ ҚАЖЕТ": ҚАПШАҒАЙЛЫҚТАР ӘКІМ ЕСЕБІНДЕ ОСЫНДАЙ ҰСЫНЫС ТАСТАДЫ

Уақыты: 25.01.2020
Оқылды: 1020
Бөлім: ЭКОНОМИКА

Қапшағай қаласының әкімі Талғат ҚАЙНАРБЕКОВ өткен жылғы атқарылған шаруаларды бағамдап, ел алдында есеп берді. Аталмыш жиынға облыс әкімінің орынбасары Серікжан БЕСКЕМПІРОВ қатысты.

– Қапшағай өңірінде 2019 жылдың қорытындысы бойынша әлеуметтік-экономикалық дамудың оң серпіні байқалады. Бұл жөнінде: "Мемлекеттік бюджетке 23330,1 млн.теңге түскен. Негізгі капиталға 33,8 млрд.теңге инвестиция тартылып, өткен жылдың тиісті кезеңімен инвестиция көлемі 5,3 млрд.теңгеге өскен. Ал, өнеркәсіп өнімінің көлемі 75,5 млрд. теңгені құрады. Мәселен, «Эневерс Кункуат», «Samruk-Green Energy» ЖШС жұмысын бастады. «Кербұлақ ЖЭС» ЖШС, «Кербұлақ ЖЭС-2» ЖШС  9 МВт жел электр стансысының құрылысы аяқталды. Одан бөлек, 12 жел генераторы орнатылды", – деген өңір әкімі Талғат Қайнарбеков өндіріс саласында жеткен жетістіктерге тоқталды. 

Жыл басынан өнеркәсіп және ауылшаруашылығы саласында жаңа ашылған кешендер мен кеңейту жұмыстарының есебінен 300 жаңа жұмыс орны ашылған. Өз кезеңінде ағымдағы жылы «Солар Пауэр Капшагай», «Техно Базальт», «Кумсуат Фарм» зауыты, «Бағашар Мекен», «Маревен Фуд Тянь-Шань», «KazOrganic», тағы да басқа көптеген өнеркәсіп орындары өндіріс аймағын кеңейтпек. Жалпы сомасы 34,0 млрд. теңге инвестиция тарту жоспарда. Нәтижесінде 740 тұрақты жұмыс орны құрылады деп күтілуде.

Ауылшаруашылығы саласында да қарқын жаман емес, 16,9 млрд.теңгеге өнім өндірілді. Жоспар бойынша жобаларды іске асыру және жылыжай кешендерін кеңейту есебінен жалпы өнім көлемі 18,0 млрд. теңгені құрап отыр. Сондай-ақ, «Ақылды қала» немесе «Smart Qapshagay» жобасы енгізілуде. Мұндай жолмен ендігіде қала тұрғындары су құбырын, жарық жүйесін бақылап, коммуналдық қызметтері үшін төлемдерді де қадағалап отырады. «Ақылды қала» жобасына 73,0 млн.теңге бөлінді.

Қапшағай – Алматы облысындағы өзіндік орны бар жас қала. Бүгінде көшелер абаттандырылып, жолдар түзеліп, аулалар қалыпқа келіп, балаларға арналған ойын, футбол алаңдары салынып, көркейе түсуде. Соңынан тұрғындар тарапынан 50 жылдық мерейтой қарсаңында қала мұражайы ашылса деген тілек, ұсыныс айтылды.

Жиын соңында облыс әкімінің орынбасары Серікжан Бескемпіров облыстың әлеуметтік-экономикалық даму жоспарын қысқаша баяндады. Оған Қапшағай қаласының да үлес қосып жатқанын тілге тиек етті. Сонымен қатар, қала әкімі тұрғындарды жеке сұрақтары бойынша қабылдады.

Мақпал МЫСА

Қапшағай қаласы