АСҚАР МАМИН: "ӨТКЕН ЖЫЛ СЫН-ТЕГЕУРІНДЕРГЕ ТОЛЫ ЖЫЛ БОЛДЫ"

Уақыты: 14.01.2021
Оқылды: 1161
Бөлім: ЭКОНОМИКА

ҚР Премьер-Министрі Асқар МАМИННІҢ төрағалығымен өткен Үкімет отырысында еліміздің 2020 жылғы әлеуметтік-экономикалық дамуының және республикалық бюджеттің атқарылуының қорытындылары қаралды. Селекторлық режимде өткен жиынға Алматы облысынан аймақ басшысы Амандық БАТАЛОВ та қатысты.

Экономиканың, банк саласының жай-күйі, республикалық бюджеттің атқарылуы, мемлекеттік сатып алудағы жергілікті қамту туралы Ұлттық экономика министрі Руслан Дәленов, Ұлттық банк төрағасы Ерболат Досаев, Қаржы министрі Ерулан Жамаубаев, Индустрия және инфрақұрылымдық даму министрі Бейбіт Атамқұлов және Энергетика министрі Нұрлан Ноғаев, Ауылшаруашылығы министрі Сапархан Омаров баяндады.

Жиын барысында өткен жылы өңдеу өнеркәсібін, құрылысты, ауылшаруашылығын қоса алғанда, нақты сектордағы өсім мемлекетіміздің ұлттық экономикасы тұрақтылығының негізгі факторына айналғаны айтылды. Мәселен, өңдеу өнеркәсібінде 3,9 пайызға, оның ішінде металлургия өндірісінде 2,6 пайызға, азық-түлік өнімдері өндірісінде 4% пайызға, фармацевтикада 47 пайызға, машина жасауда 16,3 пайызға, оның ішінде автомобиль жасауда 52,5 пайызға, сондай-ақ, жеңіл өнеркәсіпте 15 пайызға байқалады. Одан бөлек, құрылыс көлемі 11,2 пайызға, тұрғын үйді пайдалануға беру 16,8 пайызға ұлғайды. Ауылшаруашылығында 5,6 пайызға  тұрақты өсім қамтамасыз етілді. ҚР алтын-валюта резервтері мен Ұлттық қордың активтері 2020 жылғы 31 желтоқсанда $94,4 млрд.-ты құрап, бір жыл ішінде $3,6 млрд.-қа ұлғайды.

Экономиканың тұрақтылығы жұмыссыздық деңгейін 5 пайызға дейінгі диапазонда ұстап тұруға және халықтың нақты кірістерінің айтарлықтай төмендеуіне жол бермеуге мүмкіндік берді. Үкіметтің қазіргі дағдарыс жағдайында экономиканың тұрақтылығын қамтамасыз ету жөніндегі шараларының тиімділігін алдыңғы қатарлы халықаралық қаржы институттары, рейтингтік агенттіктер мен консалтингтік компаниялар бірнеше рет атап өтті.

Сондай-ақ, коронавирус инфекциясы кезіне ел экономикасының даму деңгейі де айтылды. Эпидемиологиялық жағдайдың тұрақтануы аясында қызмет көрсету секторында қызмет біртіндеп қалпына келтірілу үстінде. Желтоқсан айында қарашамен салыстырғанда қызмет сауда (+1,4 пайыз) және байланыс (+0,2 пайыз) салаларында одан әрі қалпына келтірілді.

Өз кезегінде Ақмола, Ақтөбе, Алматы, Шығыс Қазақстан, Жамбыл, Қостанай, Солтүстік Қазақстан және Түркістан облыстары және Нұр-Сұлтан, Шымкент қалалары негізгі 7 көрсеткіштің 5-уі бойынша әлеуметтік-экономикалық даму өсімін қамтамасыз етті. 4 көрсеткіш бойынша Қарағанды, Маңғыстау, Павлодар облыстары мен Алматы қаласы оң динамикаға ие.

– 2020 жыл сын-тегеуріндерге толы жыл болды. Уақытылы қабылданған шаралардың арқасында біз оларды еңсере алдық. Еліміздің тұрақты әлеуметтік-экономикалық дамуын одан әрі қамтамасыз ету және халықтың тұрмыс сапасын арттыру мақсатында «Nur Otan» партиясының сайлауалды бағдарламасын тиімді іске асыру қажет, – деп атап өтті Үкімет басшысы Асқар Мамин.

ҚР Президенті Қасым-Жомарт Тоқаевтың төрағалығымен өтетін Үкіметтің кеңейтілген отырысында әлеуметтік-экономикалық даму қорытындылары мен алдағы кезеңге арналған міндеттер егжей-тегжейлі қаралатыны мәлімделді.

Еңлік АРЫҚБАЙ