«Nur Otan» партиясы облыстық филиалының ғимаратында ҚР Президенттігіне кандидат Қ.Тоқаевтың облыстық қоғамдық штабының мүшелері Жетісу жерінің белгілі ақын-жазушылары, өнер қайраткерлерімен кездесу өткізді.
Алғашқы болып баяндама жасаған «Nur Otan» партиясы облыстық филиалы төрағасының бірінші орынбасары, облыстық штабтың жетекшісі Ғалиасқар Сарыбаев Президенттікке кандидат Қасым-Жомарт Тоқаевтың сайлауалды тұғырнамасын таныстырып, ондағы басымдықтарды жан-жақты атап өтті.
– Біз өз кезегімізде дұрыс таңдау жасауымыз керек. Ел қолдап отырған, әлем мойындап отырған саясаткерді таңдауымыз қажет. Бұл тұрғыда лайықты жалғыз кандидат, әрине, Елбасымыз ел болашағын сеніп тапсырған Қасым-Жомарт Тоқаев. Ол ел келешегін кемелдендіріп, жерімізді гүлдендіріп, экономикамызды дамытып, қиюы кеткен істерді қалпына келтіреді деп сенемін, – деді өз сөзінде Ғалиасқар Төлендіұлы.
Облыстық қоғамдық штабтың мүшесі, «Өлке тынысы» ЖШС директоры Мейрам Жанәділов:
– Бүгінде экономикамыз күннен-күнге жақсаруда. Жаһандық даму зымыран жылдамдықпен алға басып келеді. Осындай кезеңде тәжірибесі мол, саясат сахнасында беделі бар, дипломат, бірнеше тілді меңгерген Қасым-Жомарт Тоқаевтың ел тұтқасын ұстағаны дұрыс шешім. Облыстық штабтың мүшесі ретінде аудан, ауылдарды аралап жүріп, халықтың «Nur Otan» партиясы ұсынған кандидат туралы жылы пікірлерін естіп жүрмін. Бәріңізді Қасым-Жомарт Кемелұлына дауыс беруге шақырамын! – десе, Қазақстан Журналистер одағының мүшесі Нұрила Бектемірова:
– Қай тұрғыдан алып қарасаңыз да ел басқаруға Қасым-Жомарт Тоқаевтың кандидатурасы келеді. Кез келген қазақстандық лайықты жалғыз кандидат екенін түсінуі керек. Елбасымыз ұсынған азамат ел ішіне ғана емес, алыс-жақын шетелдерге де есімі белгілі саясаткер, – деп сөзін түйді.
Өз кезегінде Халықаралық «Алаш» сыйлығының иегері, «Жетісу» газетінің бас редакторы Әміре Әрін:
– Әлемнің алдыңғы қатарлы елдері Қасым-Жомарт Кемелұлына жоғары баға беріп, ол туралы жылы пікір білдіріп жатыр. Ол біздің мақтанышымыз. Қуатты елдер қолдап жатқанда қазақстандықтар да қолдайды деген сенімдемін, – деді.
Кездесуде Қазақстан халқы Ассамблеясының мүшесі, еңбек ардагері Оралбек Жақиянов пен Жазушылар одағының мүшесі, ақын Жангелді Немеребаев сөз сөйлеп, «Nur Otan» партиясы ұсынған кандидаттың көзқарасын, ұстанымын қолдайтындықтарын жеткізді.
Жиын соңында елімізге танымал ақсақал Әлімғазы Райымбеков бата беріп, Сүйінбай атындағы облыстық филармонияның әншісі Бақберген Асқарбеков «Nur Otan» партиясына арналған әнді шырқады
Серік ҚАНТАЙ