Оқи отырыңыз
Радиоэлектроника және байланыс әскери-инженерлік институтының курсанттары алғашқылардың қатарында Қазақстан Республикасының Президентін сайлауға қатысып, өз дауыстарын беріп үлгерді. Әскери оқу орнының аумағында курсанттар таңғы сағат 7-ден бастап сайлау құқықтарын пайдалана отырып, ел президенттігіне үміткерлердің біріне таңдау жасады.
"Президенттік сайлау – еліміз үшін маңызды қадам. Жаңа Президент жаңа бастама, тың серпін әкелетініне сенімім мол. Болашақ офицер ретінде жаңадан сайланатын Мемлекет басшысына ақтық деміміз қалғанша қызмет етеміз деп ант етемін", - деді курсант Қанат Дастан.
Әскери институттың тұрақты құрамы мен олардың отбасы мүшелері де конституциялық құқықтарының негізінде сайлауға қатысты. Аталмыш әскер институттан жалпы сайлау учаскелеріне 1500-ден астам адам келмек. "Дауыс беру Қазақстан Республикасының заңнамаларына сәйкес ұйымдасқан түрде өткізіліп жатыр. Жеке құрамның барлығы сайлауға белсенді түрде қатысуда", – деп атап өтті Радиоэлектроника және байланыс әскери-инженерлік институтының бастығы генерал-майор Асқар Мұстабеков.
Атап өтейік, сайлауға дайындық барысында институттың ақпарат тақтасына ҚР президенттігіне үміткерлер туралы мәліметтер орналастырылды.
РЭжБӘИИ баспасөз қызметі
Фото - Е.ӘЛІБАЕВ
