Алматы облысының қоғамдық-саяси, әлеуметтік-экономикалық газеті

"САЛҒЫРТ ҚАРАҒАН": Қ.ТОҚАЕВ БІРНЕШЕ ЛАУАЗЫМДЫ ТҰЛҒАНЫ ҚЫЗМЕТІНЕН БОСАТТЫ

Уақыты: 10.02.2020
Оқылды: 354
Бөлім: САЯСАТ

Мемлекет басшысы Қасым-Жомарт ТОҚАЕВ Қордай оқиғасына байланысты бірнеше лауазымды тұлғаны жауапкершілікке тартуды және қызметінен босатуды тапсырды. Оның ішінде, облыс әкімінің орынбасары, аудан әкімі және полиция департаментінің бастығы да бар. Бұл туралы "Ақорда" хабарлады.

«ҚР Президенті Қасым-Жомарт Тоқаев Жамбыл облысының әкімі А.Мырзахметовке Жамбыл облысы, Қордай ауданында кісі өліміне, тұрғын үйлердің қирап, азаматтардың дүние-мүліктерінің бүлінуіне әкеп соқтырған оқиғаға байланысты облыс әкімінің әлеуметтік мәселелер жөніндегі орынбасары С.Құрманбекованы және Қордай ауданының әкімі Б.Байтөлені жұмыстарына салғырт қарағаны үшін қызметінен босатуды тапсырды. Сонымен қатар, Мемлекет басшысы ҚР Ішкі істер министрі Е.Тұрғымбаевқа Жамбыл облысы полиция департаментінің бастығы А.Оразалиевті және Қордай аудандық полиция бөлімінің бастығы А.Айқымбековті қызметінен алуды тапсырды», - делінген Ақорда сайтында.

Еске салайық, 7 ақпан күні Жамбыл облысының Қордай ауданындағы Масанчи ауылының тұрғындары арасында жаппай төбелес болды. Президент Қасым-Жомарт Тоқаев бұзақылық сипаттағы жаппай төбелесті арандатушылар өз пайдасына қолданбақ болғанын мәлімдеді. Сондай-ақ, вице-Премьер Бердібек Сапарбаевтың төрағалығымен үкіметтік комиссия құрылатынын, қаза болғандарды жерлеу, зардап шеккендерге көмектесу жұмыстары ұйымдастырылатынын, қоғамдық тәртіпті бұзғандар анықталып, қатаң жауапқа тартылатынын мәлімдеген еді. Бас прокуратураға, Ұлттық қауіпсіздік комитетіне тиісті тапсырма берілді. Тәртіпсіздіктер кейін Қордай, Ауқатты, Сортобе елді мекендерінде де болған.

8 ақпан күні Ішкі істер министрі Ерлан Тұрғымбаев пен Ақпарат және қоғамдық даму министрі Дәурен Абаев оқиғаға қатысты елордадағы Орталық коммуникациялар қызметінде баспасөз мәслихатын өткізді. Мәлім етілгендей, жанжалға басқа ауылдардан келген 300-ден астам адам қосылған. Екі жақ бір-біріне тас лақтырып, таяқпен ұрып, қару қолданған. Оқиға орнында 8 адам, ауруханада 2 адам көз жұмды. 9 ақпан сағат 11.00-дегі мәлімет бойынша, медициналық көмекке 165 адам жүгінген. Тұрғылықты жері бойынша медициналық ұйымдарға - 140 адам, Қырғызстандағы медициналық ұйымға - 25 адам жеткізілді.

Қазіргі таңда Қазақстандағы ауруханаға жатқызылғандардың ішінде ауыр жағдайда 30 адам, ал аса ауыр жағдайда 8 адам бар. Қайтыс болғандардың саны – 10. Оқиға орнында 8, ал тағы 2 адам медициналық мекемеде қайтыс болған. Қазір 8 адам жансақтау бөлімінде жатыр.

Жанжалдарға қатысы бар деген күдікпен 47 адам ұсталып, полиция бөліміне жеткізілді. Олардан екі аңшы қаруы тәркіленді. Кейін олардың 44-і босатылды. ҚР Қылмыстық кодексінің 272-бабы (жаппай тәртіпсіздікті ұйымдастыру және соған қатысу) және 99-бабы (кісі өлтіру) бойынша сотқа дейінгі тергеу амалдары жүргізілуде.

Қордай ауданында төтенше жағдай жарияланды. Бердібек Сапарбаев басшылық еткен үкіметтік комиссия аудан тұрғындарымен кездесті, Қордай ауданында түнгі қауіпсіздіктің қамтамасыз етілуін тексерді, этно-мәдени бірлестік басшыларымен жүздесті, қаза тапқандардың үйіне барып, көңіл айтты.

Зақымдалған нысандарды қалпына келтіру жұмыстары басталды. Ішкі істер министрлігі мәліметінше, Қордайдағы жаппай тәртіпсіздік көршілес екі ауыл тұрғындары арасында басталған.

- Әу баста, яғни 5 ақпанда екі ауылдың тұрғындары ұстасып қалған. Тұрмыстық қақтығысқа қатысқандардың бірі қазір ұсталып, қалғандары ауданнан шықпайтыны жөнінде қолхатпен босатылды. Ауыр жүк көлігі үйден шығып келе жатқан кезде жолда келе жатқан автокөлікпен жолға таласып қалған. Көліктерде үш-үш адамнан болған. Ақыры өзара жанжал соңы төбелеске ұласып кеткен, - деді ІІМ орынбасары Алексей Калайчиди. Сондай-ақ, ол жол үстінде төбелескен алты кісінің арасында егде жастағы адамның болғанын растады. «Ол төбелес кезінде зардап шеккен. Жалпы қазір біз барлық тараған ақпаратқа талдау жүргізіп отырмыз. Ол жерде жүзге тарта адам болған. Олардың әрқайсысының сол жерге келу мотивін зерттеп жатырмыз», - деді ол.

"ЖЕТІСУ-АҚПАРАТ"