Оқи отырыңыз
Мемлекет басшысы коронавирус індетінің таралуына қарсы күрес шаралары жөнінде кеңес өткізді. Бейнебайланыс режимі арқылы өткізілген жиынға Үкімет мүшелері, бірқатар мемлекеттік органдардың басшылары, қалалар мен облыстардың әкімдері қатысты. Бұл туралы "Ақорда" мәлімдеді.
Қасым-Жомарт Тоқаев өз сөзінде дер кезінде жарияланған қатаң карантин шаралары уақыттан ұтып, эпидемияның қатты өршіп кетпеуіне мүмкіндік бергенін атап өтті. Өкінішке қарай, Төтенше жағдай режимі тоқтатылғаннан кейін барлық карантин шаралары босаңсып кетті.
– Биылғы 11 мамырда шектеулер алынғаннан кейін вирустың таралуы 7 есе өсті. Бұл көп жағдайда бірқатар мемлекеттік органдардың жұмысындағы кемшіліктерге байланысты болып отыр. Мемлекеттік басқару жүйесінің орталық және жергілікті органдары Төтенше жағдай режимі тоқтағаннан кейінгі кезеңде тиімді жұмыс істеуге дайын болмағанын атап өту қажет. Ведомствоаралық комиссия өзіне жүктелген міндетті атқаруға шамасы жетпеді. Мұны ашық мойындау керек. Денсаулық сақтау министрлігі орталық және жергілікті билік органдарының жұмысын үйлестіре алмады, – деді Мемлекет басшысы.
Президенттің айтуынша, жергілікті жерлерде тиісті жұмыстар дер кезінде атқарылмай, тиімділігі аз шаралардың қабылдануы салдарынан еңбек ұжымдарында, ірі өндіріс орындарында жаппай вирус жұқтыру ошақтары пайда болды. Атырау облысындағы Теңіз кен орны індет жұқтырудың орталығына айналды. Онда дертке шалдыққан 1222 адам тіркелді. Алматы қаласында тұрғындардың ғана емес, медицина қызметкерлерінің арасында да науқастанғандар өте көп. Елордадағы көптеген мекемелер карантин жағдайының өзінде санитарлық талаптарды сақтамаған. Өңірлердегі ауруханаларда науқастар жататын орынға, медицина кадрларына, дәрі-дәрмекке, медициналық құрал-жабдықтарға тапшылық қатты байқалады.
– Жұмысына салғырт қарағаны үшін Нұр-Сұлтан қаласының әкімі А.Көлгіновке, Алматы қаласының әкімі Б.Сағынтаевқа ескерту жасаймын. Шымкент қаласының әкімі М.Әйтеновке, Ақтөбе облысының әкімі О.Оразалинге, Павлодар облысының әкімі Ә.Сқақовқа және Ведомствоаралық комиссияның төрағасы Е.Тоғжановқа сөгіс жариялаймын. Атырау, Қостанай, Батыс Қазақстан облыстарының әкімдеріне өңірлердегі ахуалды реттеу қажеттігін ескертемін. Аталған мәселе барлық облыстың басшыларына да қатысты. Тиімді ақпараттық жұмыстың өз деңгейінде жүргізілмеуі де жағдайды ушықтыра түсуде. Біздің халықпен арадағы диалогымыз өз деңгейінде нәтиже бермеді. Ақпараттар легі теріс пікірлердің ықпалында кетіп, дәрігерлердің ерлікке пара-пар еңбектері көрінбей қалды, – деді Қасым-Жомарт Тоқаев. Сонымен қатар, Цифрлық даму, инновациялар және аэроғарыш өнеркәсібі министрі Асқар Жұмағалиевке цифрландыру саласындағы жұмыстарға салғырт қарағаны үшін ескерту берілді.
КЕМЕДЕГІНІҢ ЖАНЫ БІР
Серік НҰРҚАДІРОВ,
"Nur Otan" партиясы Алматы облыстық филиалы төрағасының орынбасары:
- Әлемнің алпауыт мемлекеттерінен бастап енді ғана етек-жеңін жиып, дамып жатқан елдердің барлығының басына бұлт үйірілді. Күтпеген жайт төбеден суық су құйғандай әсер қалдыруда. Аты жаман індет үлкен-кішіге қарамай жайпап келеді.
Барлығының басына түскен сын біздің жас мемлекетімізге де әсер етпей қоймады. Мемлекет басшысы Қасым-Жомарт Тоқаевтың тапсырмасымен дер кезінде төтенше жағдай енгізіліп, сақтық шарасы күшейді. Соның арқасында аурудың алдын алдық. Алайда төтенше жағдай аяқталған соң, карантиндік режим толық сақталмай, індеттің таралауы күрт өсті.
Бұл өте қауіпті әрі күрделі жайт. Дәрігерлердің өзі осы ауруға шалдығуы көңілге қорқыныш орнатты. Қасым-Жомарт Кемелұлы коронавирус індетінің таралуына қарсы күрес шаралары жөнінде кеңесте кеткен қателіктерді жіпке тізгендей айшықтап берді. “Биылғы 11 мамырда шектеулер алынғаннан кейін вирустың таралуы 7 есе өсті. Бұл көп жағдайда бірқатар мемлекеттік органдардың жұмысындағы кемшіліктерге байланысты болып отыр. Мемлекеттік басқару жүйесінің орталық және жергілікті органдары Төтенше жағдай режимі тоқтағаннан кейінгі кезеңде тиімді жұмыс істеуге дайын болмағанын атап өту қажет. Ведомствоаралық комиссия өзіне жүктелген міндетті атқаруға шамасы жетпеді. Мұны ашық мойындау керек”, - деген сөзі барлығымызға ой саларлық тұжырым.
Жауапты тұлғаларға ескертпе, сөгіс беруі бекер емес. Сондықтан, Мемлекет басшысының айтқанына құлақ асып, сақтық шарасын одан әрі қамтамыз етуіміз керек. Сонда ғана аурудың алдың алып, жақындарымызға қауіп төндірмейміз. Қазақ “Кемедегінің жаны бір” дегенді берек айтпаған. Сол себепті көрінбейтін күрес пен мылтықсыз майданда әрқайсымыздың өз орнымыз бар. Бір жеңнен қол, бір жағадан бас шығарып, еңбек ететін күн туды. Сақтықта қорлық жоқ, ағайын!
КАРАНТИНДІ КҮШЕЙТУ КЕРЕК
Симузар КУРБАНОВА,
Азамат істері жөніндегі облыстық сот судьясы:
- Еліміздегі эпидемиологиялық жағдайға байланысты Мемлекет басшысы Қасым-Жомарт Тоқаев өткізген жиында маңызды мәселелер қозғалды. Айтылғанның барлығымен толық келісемін. Мысалы, карантиндік режим уақыты мен кейінгі кезеңді салыстырсақ, регресс байқалады. Адамдардың барлығы көше-көшеде, орталық базарларда толып жүр. Онымен қоса өзара жиындар мен басқосулар да жиі-жиі өткізіліп кетті.
Мемлекет тарапынан бекітілген сақтық шаралары мен талаптарды барлығы дерлік орындамағаны белгілі. Соның салдарынан эпидемиологиялық жағдай ырыққа бағынбай кетті. Бұл туралы Президент жиын барысында да қадап айтты. Оны Қасым-Жомарт Кемелұлының: «Биылғы 11 мамырда шектеулер алынғаннан кейін вирустың таралуы 7 есе өсті», – деген сөздерінен аңғаруымызға болады.
Өз басым балам екеуіміз оқшауланып, үйдегі карантиндік режимді ұстандық. Барлығы да осылай істеп, өз денсаулығы өзінің қолында екенін есінен шығармаса, ахуал басқаша болар ма еді деген сауалда қаласың.
Ойлап қарасақ, біреуі оқшауланып, екіншісі жиын өткізіп, той тойлап жүрсе, жағдайды қалай реттестіреміз? Сондықтан, Мемлекет басшысының күшейтілген карантиндік режимді енгізуге байланысты берілген тапсырмасы өте орынды. Ереже мен тәртіп бар жерде ғана ахуал реттеледі.
ЖАҚСЫ КҮНДЕ КЕЗДЕСЕЙІК
Дина НҰРҒАЛИЕВА,
Алматы облыстық ақсақалдар кеңесінің президиум мүшесі, облыстық әжелер кеңесінің төрайымы:
- Әлемді әбігерге салған індет ел аман, жұрт тынышта, төрт құбылдамыз түгенделіп, етек-жеңімізді түре бастаған тұста алаңдаушылық тудырды. Елбасы, Президенттің басшылығында қатаң шара қабылданып, оған тұрғындардың атсалысуымен өзге елдердегідей өзекті өртейтін жағдайға жетпедік. Әрине, осы сырқатты жұқтырып, ем алып жатқан, тіпті, осы дерттің салдарынан қатарымыздан алыстап кеткендердің саны да азаймай тұр. Десе де, дамыған, өркениетті елдермен салыстырғанда керегесін енді бүтіндей бастаған жас мемлекеттің осыншама қиындықты еңсергенін жеңіспен пара-пар деп бағалаймын.
Жарты жыл бойы індетке қарсы елімізде ересен істер атқарылып, төтенше жағдай жарияланды, карантин енгізілді. Сол барыста қауіпсіздік шараларын сақтай отырып, елдің экономикасы, әлеуметтің әлеуетін арттыру жолындағы жұмыстар ақсап қалған жоқ. Осыған дейін Елбасы жұртты сабырға шақырып, үндеу жолдаса, Президент Қасым-Жомарт Тоқаев бірнеше рет мәлімдеме жасап, елдің індетпен күресіне бастамашы болды. Алғы шепте жүрген әр мамандарының да еңбегі өз деңгейінде бағалануда. Жоспарлы жұмыстардың нәтижесінде елдің экономикасы тоқырап, әлеуметтік жағдай тым мүшкіл халге түспеді. Індеттің бірінші толқынын міне, осындай жақсы дайындықтармен ауыздықтай алды.
Осы қауіпті түп-тамырымен жеңіп шығу үшін тағы да мығым дайындық, белсенді жұмыс керек. Президент Қасым-Жомарт Тоқаев қауіпті аурудың салдары мен одан сақтану жолдарын түсіндірген кеңес өткізді. Онда Мемлекет басшысы қазіргі ахуалға баға беріп, азаматтардың денсаулығын сақтаудың сапасын арттыруға бағытталған шараларды жариялап, экономиканы қолдау және халықты әлеуметтік қорғау мәселесіне айрықша тоқталды. Ақпараттық жұмыстың ақсап жатқанын да жасырмады. Қызметіне салғырттық танытқан облыс әкімдеріне, ведмостова басшыларына сөгіс жариялап, жауапкершілікті күшейтуді қатаң тапсырды. Мемлекет басшысының алдағы жоспарларын әлеуметтік желіден оқып, бәріміз бір ниетте жұмылсақ, осы апаттан аман-есен шығатынымызды түсіндім.
Иә, мен биыл сексенге келдім. Осы ғұмырымда ашаршылық, құғын-сүргін, соғыстың зобалаңы, тәуелсіздіктің алғашқы жылдарындағы қиындықтың бәрін көрдім. Халқымыз соның бәрін береке-бірлік, төзімділік, бірауыздылығы арқылы жеңіп отырды. Сондықтан, «Алтау ала болса, ауыздағы кетеді» деген өткеннің ескертуін ескеріп, бір жұдырықтай Президент пен ел азаматтарының айналасына топталғанда ғана жақсы күндерде басымыз аман, бауырымыз бүтін кездесетін боламыз.
Мемлекет басшысы Ведомствоаралық комиссияның шұғыл әрі қатаң үйлестіру жұмыстарын қамтамасыз етуге, оның орындалуына мониторинг жүргізуге және бақылауға қауқарсыз болып отырғанын айтты.
– Пандемиямен күрес жөніндегі барлық шешімдерді, оның әлеуметтік және экономикалық теріс әсерлерін жоюды Премьер-Министр басшылық ететін тиісті Мемлекеттік комиссия аясында пысықтауды тапсырамын. Мемлекеттік комиссия ең маңызды деген ресурстардың таралуын бір орталықтан бақылауды қамтамасыз етуі тиіс. Қазіргі эпидемиологиялық ахуалды тұрақтандыру үшін шұғыл шаралар қабылдау мақсатында Мемлекеттік комиссияға екі күннің ішінде биылғы наурыз-мамыр айларындағыдай қатаң карантин режимін енгізу мәселесі бойынша маған ұсыныс әзірлеп, енгізуді тапсырамын, – деді Қазақстан Президенті. Сонымен қатар, Қасым-Жомарт Тоқаев лабораториялық зерттеулердің тиімділігін арттыруды, реагенттер мен жұмсалатын материалдардың үздіксіз жеткізілуін шешуді, ПТР-лабораториялардың саны мен қуаттылығын арттыруды тапсырды.
– Тұрғындардың лабораториялар маңындағы кезектің көптігіне, санитарлық нормалардың сақталмауына қатысты шағымдануы әділетті. Мұның бәрі тікелей ауру жұқтыру қаупін күшейтеді. Сондықтан вирус жұқтырудың алдын алу және бір орталықтан таратуды қамтамасыз ету, сондай-ақ, есепке қою мақсатында ПТР сынамаларын тапсыруды онлайн жазылу немесе Call орталық арқылы жүргізу қажет. Індет ошақтарындағы жұмыстар үшін, әсіресе ауылдық жерлерде мобильді лабораторияларды ұйымдастыру және мобильді қызметті одан әрі дамыту үшін қаржы бөлу аса маңызды, – деді Мемлекет басшысы.
Қасым-Жомарт Тоқаев азаматтарды қажетті дәрі-дәрмектермен қамтамасыз етіп, емдеудің маңыздылығын атап өтті. Осы ретте проблемаларды шешу үшін Үкімет пен өңірлердің әкімдеріне барлық қаржылық және инфрақұрылымдық ресурстарды жұмылдыру тапсырылды.
– Пандемияның екінші толқынын ескере отырып, шілденің соңына дейін жұқпалы дертке шалдыққандарға арналған төсек орындарын 50 пайызға арттыруды тапсырамын. Бұл үшін өңірлер барлық резервті, соның ішінде, жеке және ведомстволық медицина орталықтарын пайдалануы керек. Үкіметке дәрі-дәрмектермен қамтамасыз ету мәселесін бес күннің ішінде шешуді тапсырамын, – деді Президент.
Қасым-Жомарт Тоқаев мемлекеттік органдардың коронавирусқа қарсы күрес жөніндегі жүргізіп жатқан ақпараттық жұмыстарының маңыздылығын айрықша атап өтті. Оның айтуынша, бұл жұмыс бастапқы кезеңде жақсы ұйымдастырылды. Бірақ мемлекеттік органдар соңғы кезде бұл істі босаңсытып жібергендей әсер қалдырады.
– Әкімдер мен министрлер қарапайым халықпен байланыс орнатуды қойды. Олардың арыз-шағымдарына дер кезінде жауап бермейді. Сондықтан тұрғындардың көпшілігі қайда барарын білмей, торығуда. Өкілетті қызмет орындарынан дұрыс жауап ала алмаған тұрғындардан шағымдар көп түсіп жатыр. www.coronavirus2020.kz сайтына қырық мыңға жуық сұрақ келіп түсті. Қазіргі таңда оның үштен біріне ғана жауап берілді. Мұндай қарым-қатынастың нәтижесінде теріс әрі жалған ақпараттар өршіп тұр. Бұл біздің жұмысымызды одан сайын қиындатуда, – деді Мемлекет басшысы.
Қазақстан Президенті ақпараттық жұмыстарға қатысты тәсілді түбегейлі өзгерту қажет екенін айтты. Жауапты тұлғалар өткізетін тұрақты брифингтерді жолға қойып, індет жұқтырған кездегі іс-әрекеттердің алгоритмі жөнінде халықты нақты әрі сапалы ақпаратпен қамтамасыз ету жөнінде тапсырма берді.
– Телеарналарда тікелей эфир арқылы дәрігерлерден кеңес алып, тұрғындардың сұрақтарына нақты жауап беретін бағдарламалар ұйымдастыруға не кедергі? Азаматтарға емделудің протоколы мен алгоритмін жеткізу керек. Дәрі-дәрмектер мен оны пайдалану жөнінде түсіндіру қажет, – деді Қасым-Жомарт Тоқаев.
Әкімдер мен министрлерге бюджетті қайта қарау және конференция, дөңгелек үстел, салтанатты шаралар, консалтингтік және PR-қызмет секілді қажетсіз шығындардан бас тарту жөнінде тапсырма берілді. Бұл қаржының барлығы эпидемиямен нақты күреске бағытталуы керек. Сонымен қатар Мемлекет басшысы бағаны тұрақтандыруға, азаматтарды қажетті азық-түлікпен, жұмыспен қамтамасыз етуге, экономикалық белсенділікті арттыруға және цифрлық технологияны дамытуға қолдау көрсету қажеттігін атап өтті. Экономикалық өсімді қайта қалпына келтіру жөніндегі кешенді жоспар жүйелі әрі толыққанды орындалуы тиіс. Бұл мәселе әрбір әкімнің ерекше бақылауында болуы қажет.
Қасым-Жомарт Тоқаев Үкіметті шұғыл шаралар қабылдаумен қатар, коронавирус пандемиясының ұзаққа созылуына дайын болуға шақырды. Осыған байланысты орта мерзімді перспективаға арналған Қазақстандықтардың өмірі мен денсаулығын сақтау жөніндегі ұлттық жоспарын әзірлеуді тапсырды.
– Иә, бұл – қауіпті ауру. Оны емдейтін вакцина әлі жасалған жоқ. Бірақ оны қауіпті екен деп байбалам салып, үрейге бой алдырмау керек. Сондай-ақ, жөнсіз әрекетке барып, дәрігерлерге тіл тигізіп, санитарлық режимді бұзуға жол берілмейді. Ал науқастанып қалғандар сарыуайымға, пессимизмге салынбағаны жөн. Ем алумен қатар, ағзаның күші, адамның көңіл-күйі оның құлантаза айығып кетуіне ықпал етеді. Денсаулық сақтау министрлігі және санитарлық дәрігерлердің ұсынымдары мен талаптарын естен шығармауды сұраймын. Мұның бәрі мемлекеттің ең басты игілігі – сіздердің, Қазақстан Республикасы азаматтарының өмірі мен денсаулығын қорғауға арналған, – деді Мемлекет басшысы.
Кеңес барысында Денсаулық сақтау министрі Алексей Цой, Нұр-Сұлтан қаласының әкімі Алтай Көлгінов, Алматы қаласының әкімі Бақытжан Сағынтаев, Шымкент қаласының әкімі Мұрат Әйтенов, Шығыс Қазақстан облысының әкімі Даниал Ахметов сөз сөйледі.
Президенттің осы жиында сөйлеген сөзімен толық танысам десеңіз, мына сілтемеге өтіңіз.
"ЖЕТІСУ-АҚПАРАТ"
