Тәртіп сақшыларының төл мерекесі – Полиция күнінің құрметіне Талдықорған қаласындағы «Жастар» саябағында салтанатты жиын өтті. Жылына бір келер айтулы күнде ақ тілектер ағылып, белсенді қызметкерлер марапатталды.
Облыстық ішкі істер департаментінің ұйымдастыруымен өткен шараға ішкі істер органдарының басшылары, ардагерлері, жеке құрамы және қызмет бабында қаза тапқандардың туыс-туғандары қатысты. «Құрметті ішкі істер органдарының қызметкерлері мен ардагерлері, сіздерді кәсіби мерекелеріңізбен шын жүректен құттықтаймын! Осы мереке күні әрқайсыңыз таңдаған мамандықтарыңыздың қоғамдық маңыздылығын сезініп, мақтан тұтасыздар. Полиция қызметкерлері өздеріне жүктелген жауапты міндетті абыроймен атқаруда. Сіздердің әрқайсыңыздың өздеріңіздің кәсіби және азаматтық борыштарыңызды адал өтеуге әруақытта да дайын екендеріңізге сенімдімін», – деп лебізін білдірген облыс әкімі Амандық БАТАЛОВ тәртіп сақшылары жұмысының маңыздылығын сөз етіп, Елбасы Нұрсұлтан Назарбаевтың бастамасымен құрылған жергілікті полиция қызметінің құқықбұзушылықты тежеу жолында аянбай тер төгіп жүргендерін тілге тиек етті. Шара барысында облыс басшысы ішкі істер мекемелерінің техникалық базасын нығайту мақсатында 25 жаңа автокөлік пен бірнеше адамға пәтер кілтін табыс етті.
Әрмен қарай марапаттау рәсімі орын алып, құқық қорғау саласында қызметін адал атқарып, жақсы нәтижелерге қол жеткізген бірқатар тәртіп сақшылары Амандық Ғаббасұлының Құрмет грамотасына ие болды. Осы салада талмай еңбек етіп жүрген өзге де қызметкерлерге шен беріліп, арнайы Алғыс хаттар табысталды. Өз кезегінде, ішкі істер органдарының материалдық-техникалық базасын нығайтуға қосқан үлкен үлесі үшін облыс әкімі Амандық Баталов ішкі істер органдарының «Ардагер» медалімен марапатталды.
Қуанышты еселей түскен облыстық ішкі істер департаментінің басшысы, генерал-майор Мұрат Ұрұмханов «Халықтың өмірі мен денсаулығын сақтау жолында жан тапсырған әріптестеріме және олардың барша туыстарына басымды иемін. Олардың құрметіне ІІД-нің ауласына ескерткіш тақта орнатылып, есімдері жазылды. Уақыт өткен сайын оларға деген құрметіміз артып, есімдерін мәңгілік жүрегімізде сақтаймыз», – дей келе жас қызметкерлерге тәрбие беруде өз үлестерін қосып жүрген ардагерлерге ерекше алғыс айтты.
Салтанатты жиын концерттік бағдарламамен жалғасын тауып, оған өнер жұлдыздары Жолбарыс Сейфуллин, Медеу Арынбаев, «Нұрмұқасан» тобы және басқа да өнерпаздар ән шашуларын шашып, жиналғандарға мерекелік көңіл-күй сыйлады. Сонымен қатар Рамазан айына дөп келген мерекеге орай «Иман» мешітінде 400-ден астам адамға ауызашар беріліп, лебіздерге құлақ түрілді.
Мәулен Әнербай