Мемлекет басшысы Нұрсұлтан Назарбаев өткен жылдың 30 маусымында қол қойған «Қазақстан Республикасының азаматтарына, оралмандарға және Қазақстан Республикасында тұруға ықтиярхаты бар адамдарға олардың мүлікті жария етуіне байланысты рақымшылық жасау туралы» Заңы 2014 жылдың 1 қыркүйегінен бастап қолданысқа енгізілді.
Осы заңды жүзеге асыру мен заң талаптарын орындау мақсатында Қапшағай қаласының әкімі Сәтжан Кикимов арнайы қаулы шығарған болатын. Қалалық атқарушы органдардың жанынан заң талаптарына сай құрылған комиссия қазіргі таңда бұл бағыттағы жұмыстарын тыңғылықты жалғастыруда. Бұл жөнінде мүлікті жария ету жөніндегі комиссия төрағасының орынбасары, қалалық қаржы бөлімінің басшысы Ермек Қожахметов түсіндірді.
Негізі мүлікті жария ету акциясы бойынша үйді заңдастыру тегін жүргізіледі. Ешқандай алым алынбайды. Бірақ заң талабы бойынша төмендегідей қағидаларды сақтау қажет. Біріншіден, жердің құжаттары толық болуы тиіс. Жер телімі нысаналы мақсатына сай қолданылуы керек. Екіншіден, тұрғындар жылжымайтын мүлік орталығынан үйдің техникалық төлқұжатын алуы керек. Осы ретте техникалық төлқұжатты алуға қатысты шығындарды тұрғындар өздері төлейді. Сондай-ақ, сейсмикалық қорытынды алудың шығынын да өздері өтейді. Техникалық төлқұжатты әзірлеу мерзімі жылжымайтын мүлік нысанының түріне байланысты жасалады. Атап айтқанда, жеке тұрғын үйлерге төлқұжат беріліп, оның бағасы шаршы метріне, аумағына байланысты белгіленеді. Жылжымайтын мүлік орталығының қызметкерлері өтініш берушімен келісе отырып, техникалық зерттеу жүргізу үшін нысанға барып, техникалық құжат әзірлейді. Одан соң сейсмикалық қорытынды алуға болады. Ол құжаттардың барлығы ретке келтірілген соң оны мүлікті жария ету комиссиясына тапсырады. Егер жылжымайтын мүліктің барлық құжаттары сай болса, онда комиссия қол қойып, үй заңдастырылады.
Қала әкімінің орынбасары Ілияс Сүгіров төрағалық ететін комиссияға бүгінгі күнге дейін 891 өтініш келіп түскен. 861 адамның талабы қанағаттандырылып, мүлік жарияланды. Жалпы сомасы 2 миллиардтан асады. 16 адамның құжаты заңға сәйкес келмеуіне байланысты иелеріне қайтарылған. Ал, 10 өтініш комиссия қарауында тексеріліп жатыр. Мүлікті жария ету бойынша өтініштер осы жылдың желтоқсан айына дейін қабылданады. Комиссия төрағасының орынбасары Ермек Қожахметов тұрғындарға қапы қалмас үшін бұл мүмкіндікті пайдаланып қалу керектігін айтады.