Оқи отырыңыз
Биыл ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің облыстық департаменті мен облыстық Кәсіпкерлер палатасы өзара бірлесіп «Жол картасы» бағдарламасы аясында бірқатар іс-шара өткізді.
Осыған орай Кәсіпкерлер палатасының ғимаратында өткен арнайы семинарға облыстық Кәсіпкерлер палатасының өкілдері, әділет департаментінің, ауылшаруашылығы басқармасының, табиғи ресурстар және табиғатты пайдалануды реттеу басқармасының, кәсіпкерлік және индустриялық-инновациялық даму басқармасының мамандары, облыстық мәслихаттың депутаттары қатысып, атқарылған жұмыстың қорытындысымен танысты.
Атап айтқанда, сәуір айында Қазақстан Республикасының Инвестициялар және даму министрлігі техникалық реттеу және метрология комитетінің облыстық департаментінде сыбайлас жемқорлық тәуекелдеріне жүргізілген сыртқы талдау бойынша 17 сыбайлас жемқорлық белгісі анықталғаны белгілі болды. Осыған орай сыбайлас жемқорлық жасауға ықпал ететін себептер мен жағдайларды жою жөнінде тиісті шаралар қабылданды. Сондай-ақ, 2016-2017 жылдары жергілікті атқарушы органдардың нормативтік-құқықтық актілеріне, мәслихаттардың нормативтік-құқықтық шешімдеріне, әкімдіктердің нормативтік-құқықтық қаулыларына, әкімдердің нормативтік-құқықтық шешімдеріне жүргізілген түгендеу жұмыстары бойынша облыстық кәсіпкерлік және индустриялық-инновациялық даму басқармасына тиісті ұсыныстар енгізілді. Одан бөлек, кәсіпкерлердің құқықтары мен заңды мүдделерін бұзған және материалдық шығын келтірген лауазымды тұлғаларды қылмыстық, әкімшілік және тәртіптік жауапкершілікке тарту тәжірибесіне талдау жүргізілді. Талдау қорытындысы бойынша ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің облыстық департаменті Қазақстан Республикасының қолданыстағы азаматтық және қылмыстық заңнамасын жақсарту бойынша ұсыныстарды тиісті органдарға берді.
Сонымен қатар, Қазақстан Республикасының «Ақпаратқа қол жеткізу туралы» Заңының 16-бабына сәйкес мемлекеттік мекемелердің ақпараттық жүйелерінің ашықтығы мен қол жетімділігіне және мемлекеттік мекемелердің ресми сайттарына жасалған сараптама бойынша облыстың көптеген мемлекеттік мекемелерінің заңда көрсетілген талаптарды сақтамағаны анықталды. «Ақпаратқа қол жеткізу туралы» ҚР Заңының 16-бабының 14-тармағына сәйкес мемлекеттік мекемелердің интернет-ресурстағы ақпараттары қазақ және орыс тілдерінде берілуі тиіс. Алайда, көптеген мемлекеттік мекемелердің сайттарындағы ақпараттың қазақ және орыс тілдеріндегі нұсқалары өзара сәйкес келмейтіндігі белгілі болды. Осыған байланысты мемлекеттік мекемелерге тиісті шаралар қабылдау ұсынылды.
Сымбат Исрапулова,
ҚР Мемлекеттік қызмет істері және
сыбайлас жемқорлыққа қарсы іс-қимыл агенттігінің
облыстық департаментінің баспасөз хатшысы
