"ӘБДЕН ҚОРҚЫТҚАН": ПАНФИЛОВ АУДАНЫНДА 21 ЖАСТАҒЫ МҰҒАЛІМ СУИЦИД ЖАСАДЫ

Уақыты: 21.01.2020
Оқылды: 1200
Бөлім: ҚҰҚЫҚ-ЗАҢ

Алматы облысында бүтін бір отбасы қызымызды суицидке итермеледі деп полицияда жұмыс істейтін күйеубаласын және оның жақындарын айыптап отыр. Бұл жайында "Tengrinews" "КТК" телеарнасына сілтеме жасап хабарлады.

Телеарна мәліметінше, 21 жастағы мұғалім Гүлмайса Жақыбаева Жаркенттің шетіндегі үйде өз-өзіне қол жұмсап, асылып қалған күйі табылған. Жас келіншек күйеуімен жанжалдасып қалған соң төркініне келіпті. Ал келесі күні таңда өзіне қол салған. Жақындары дереу "Жедел жәрдем" шақырғанымен, 21 жастағы келіншекті ажалдан арашалап қалу мүмкін болмады. Мұғалімнің отбасының айтуынша, Гүлмайса Жақыбаеваны күйеуі мен ата-енесі қорқытып, 13 миллион теңге ұрлықты мойнына алуға мәжбүрлеген. Тіпті, сәбиінен бас тартқызған.

Осыған қорланған 21 жастағы келіншек төркінінің үйінде өз-өзіне қол жұмсаған. Бейнеүндеу жазып, әлеуметтік желіге таратқан марқұмның анасы жергілікті полицияның тергеуді әділ жүргізетініне де сенбей отыр.

Марқұм осыдан бір жарым жыл бұрын Жанат есімді полицей жігітке тұрмысқа шыққан. Ата-анасының айтуынша, оны суицидке итермелеген жағдай бір апта бұрын болған. Сол күні күйеуі Жанат Қуанышбаев келіншегін сотқа апарып, өзгенің қылмысын мәжбүрлі түрде мойындатқан көрінеді.

- Мұны әбден қорқытқан, өзі де бұрыннан қорқады екен ғой. Бізге білдіртпей жүрген. Қағазды жазғызған. Ол қағазға: "Мен 13 миллион теңге ұрладым, ұрлағаным рас, мойындаймын", - деп жазғызған, - дейді марқұмның анасы Ардақ Жақыбаева.

Одан бөлек, күйеуі "Бес айлық баламнан бас тартамын" деп жазғызған. Марқұмның әбден қорқып тұрғанын көріп, соттағылар қағазды қабылдамаған. Ал күйеуі қолхатты қыздың ата-анасына көрсетіпті. Қыздың ата-анасы болған жағдайға полицей күйеубаласын ғана емес, оның отбасын да кінәлайды. "Жазбаның бәрін өзгертпекші болған ғой, сот-медициналық сараптаманы. Өйткені, мына жерде электрошокпен күйдірген ізі бар дейді, қолы көгерген", - дейді марқұмның әпкесі Кәмшат Жақыбаева.

Телеарна мәліметінше, Гүлмайса Жақыбаеваның өліміне байланысты "Өзiн-өзi өлтiруге дейiн жеткiзу" бабымен қылмыстық іс қозғалыпты. Ал Жанат Қуанышбаев денсаулығына байланысты демалысқа кеткен.

- Қазір күдікті болып танылған жоқ. Қорғануға құқығы бар адам ретінде, куә ретінде жауап алынған. Сотқа дейінгі тергеп-тексеру енді басталды. Біз қажетті сараптамаларды тағайындадық. Солардың қорытындысын ала келе, заңды шешім қабылдаймыз, - дейді Панфилов аудандық полиция бөлімі бастығының орынбасары Айдар Әбдірахманұлы.

"ЖЕТІСУ-АҚПАРАТ"

Панфилов ауданы

Алматы облысы