Оқи отырыңыз
Алматы облысында учаскелік инспекторлар 100 мыңға жуық тұрғынды аралап шықты. Бұл туралы Алматы облысының полиция департаменті хабарлады.
Алматы облысының полицейлері "Учаске" шарасының аралық нәтижесін шығарды. 7 қыркүйектен бері құқық қорғау органдары тұрғын үйлерді аралау шараларын 98803 рет ұйымдастырған, оның ішінде, кездесулер мен әңгімелесулер 30994 пәтер, 64775 жеке үй және 7568 саяжай тұрғындарымен өткізілген.
- Іс-шара нәтижесінде белгілі тұрғылықты жері жоқ 33 адам анықталып, 317 кәмелетке толмаған азамат ұсталды, оның ішінде, алкогольдік ішімдіктер ішкені және қоғамдық орындарға мас күйінде келген 7, заңды өкілдерінің еріп жүруінсіз ойын-сауық мекемелерінде болған 15, қаңғыбастық жасаған 5 адам бар. Олардың барлығы бейімдеу орталықтарына орналастырылды. Сонымен қатар, қоғамдық тәртіпті бұзғаны үшін 284 жасөспірім ұсталды. Тіркелген атыс қаруларының иелері де назардан тыс қалмады. Берілген рұқсатқа сәйкес қару иелеріне қатысты 190 құқықбұзушылық дерегі анықталды, оның ішінде, 143 дерек - қаруды сақтау қағидаларын бұзуға байланысты, ал 47-сі қайта тіркеу қағидаларын бұзу дерегі. Заңсыз сақталған 70 ойық ұңғылы қарудың патрондары және 83 атыс қаруының ұңғылары тәркіленді, олар анықталған кемшіліктер жойылғанға және салынған айыппұлдар төленгенге дейін полицияда қалатын болады, - деп атап өтті Алматы облысы полиция департаменті жергілікті полиция қызметі басқармасының бастығы, полиция полковнигі Бағдат Әшімов.
Барлық анықталған және әкімшілік жауапкершілікке тартылған құқықбұзушылардың жалпы саны 15858 адамды құрады. Олардың қатарында отбасы-тұрмыстық қатынастар саласындағы құқыққа қайшы әрекеттер, ата-аналардың балаларды тәрбиелеу жөніндегі міндеттерді орындамауы, тауарлармен немесе өзге де заттармен заңсыз сауда жасау, белгіленбеген орындарда сауда жасау, ұсақ бұзақылық, жалпы пайдалану орындарын ластау, алкогольдік ішімдіктер ішу немесе қоғамдық орындарға масаң күйде келу, тіркеусіз тұру, көші-қон заңнамасын бұзу секілді құқықбұзушылықтар бар.
- Бұл алдын алу іс-шарасы, басқалар сияқты, ең алдымен, криминогендік жағдайды жақсартуға бағытталған. Біздің міндетіміз - қылмыстың жасалуының және ауыр зардаптардың туындауының алдын алу және болдырмау. Полицияның белсенділігі, заңсыз әрекеттер үшін туындайтын жауапкершілікті көрсету халықты тәртіпке келтіреді және көптеген азаматтар осы процеске қатыса отырып, полиция қызметкерлеріне қоғамдық тәртіпті сақтауда белсенді көмектеседі, - деп толықтырды Бағдат Әшімов.
Іс-шара ағымдағы жылдың 1 желтоқсанына дейін жалғасады.
"ЖЕТІСУ-АҚПАРАТ"
