Іле аудандық әкімдігінің мәжіліс залында «Ислам – тәуелсіз елдің рухани тірегі» атты республикалық ғылыми-практикалық конференция өткізілді. Мешіт имамдары, прокуратура, құқық қорғау органдарының, жастар ресурсы орталығының, әкімдік аппаратының қызметкерлері, қоғамдық кеңес мүшелері, аудандық мәслихат депутаттары, ұстаздар қауымы қатысқан алқалы жиынды аудандық ішкі саясат бөлімінің басшысы Сұлтан Жарқынбеков ашып, жүргізіп отырды.
Жиында Қазақстан Мұсылмандары діни басқармасының шариғат және пәтуа бөлімі меңгерушісінің орынбасары, теология ғылымдарының кандидаты Сансызбай Құрбанұлы, «Нұр-Мүбарак» Египет ислам мәдениеті университетінің оқытушысы Жүсіпбек Жасұлан, облыстық дін істері басқармасының «Дін саласындағы мәселелерді зерттеу орталығы» коммуналдық мемлекеттік мекемесінің бөлім басшысы Тимур Нүсіпханов, Іле ауданының бас имамы Мұхтар Әбсаматов кезекпен сөз алып, еліміздегі діни ахуалға қатысты өз ойларын ортаға салды. Олардың ойы бір арнаға тоғысып, Ислам дінінің Қазақстандағы тармағы Ханафи мәзхабын сырттан енетін сәлафилік және уаххабилік секілді жат ағымдардан сақтандыру жолдарын әңгімеледі. Анықтама үшін айта кетер болсақ, бүгінгі күні сәлафилік ағым Пәкістан, Сауд Арабиясы, Индонезия, Үндістан секілді елдер мен Орта Азия және Солтүстік Кавказда кең таралып отырса, уаххабилік ағым Сауд Арабиясының ресми идеологиясына негіз болып отыр. Сондықтан да соңғы уақыттарда Ақтөбе, Алматы қалаларында орын алған шетін оқиғалар қоғамда қызу талқылауға түсіп, дін мамандары арасында алаңдаушылық тудырғаны жасырын емес. Шындығында барша мұсылманның қасиетті кітабы Құран Кәрімді дұрыс түсініп, дұрыс ұғыну әркімнің қолынан келе бермейді. Оны теріс тәпсірлейтін әртүрлі мектептер мен ағымдардың жетегіне ілескен жастар өздерінің адасқанын ұғына алмайды. Осыны халыққа дұрыс жеткізу, жастарға түсінікті тілмен ұғындыру имамдардың, дін ғалымдарының міндеті. Ол үшін мобильді әлеуметтік желілерді, интернет желісін кеңінен пайдалану керек.
Жиында сөз алған Іле ауданының аға прокуроры Мейрамбек Дүйсенбаев Орта Азия және Ресейдегі мұсылмандар ұстанатын дәстүрлі исламдағы теріс ағымдардың жолын кесу үшін қолданыстағы заңнамаға өзгерістер мен толықтырулар енгізу керектігін атап өтті. Одан бөлек, көпшілік өздерін толғандырған сауалдардың жауабын алып, бүгінгі Исламға қатысты өзекті мәселелермен танысты.
Мәди АЛЖАНБАЙ
Іле ауданы.