Еңлік КЕНЕБАЕВА
Әлемнің жарығын сыйлаған аналарға деген құрмет әрқашанда жоғары. Тек балаларының алдында ғана емес, мемлекет алдында да үлкен еңбек сіңіріп, ел алдында абыройларын асырған алтын құрсақты аналарды Талдықорған қаласының әкімі Бағдат Қарасаев қабылдап, «Алтын алқа» және «Күміс алқа» иегерлері атанған аяулы жандарды құттықтады.
Қала әкімдігінің үлкен залында былдырлаған балалардың үні ерекше естілді. Барлығы да балдай тәтті қылықтарымен, сүйкімділігімен адам тартады.
– Бала – бауыр етің, өмірдегі ең басты бақытың. Бала – өміріңнің жалғасы. Сондықтан да барлықтарыңызға денсаулық, бақыт, береке-бірлік, отбасыларыңызға амандық тілеймін. Қазіргі таңда баланы дұрыс тәрбиелеу ең бірінші міндет. Мұны Сіздер өте жақсы білесіздер деп ойлаймын. Мәңгілік Елдің ұрпақтары ертеңгі еліміздің үмітін ақтайтын азаматтар болсын деп тілеймін. Сіздерді марапаттау мен үшін үлкен құрмет. Марапаттарыңыз құтты болсын, – деді өзінің құттықтау сөзінде қала әкімі Бағдат Қарасаев.
Өмірдегі ең үлкен ерлікті бір өздері атқарып, бала-шағасының ортасында бал-бұл жанған қуанышты сәттің басты кейіпкерлері алтыннан, күмістен алқа тағынды. Оларға қала басшысы өз қолымен сый-сияпатын ұсынып, ардақты жандарды марапатымен шын жүректен құттықтады.
Лебіздер легі
Мәрия БӨЛЕКБАЕВА,
«Алтын алқа» иегері:
– Мен ел Президентінің атынан осындай марапатқа ие болғаныма өте қуаныштымын әрі мақтан тұтамын. Барлық қазақстандық қыз-келіншекке халық санын арттыруға үлес қосыңдар дегім келеді. Еліміз аман, жұртымыз тыныш болсын деген аналық тілегімді арнаймын.
Дәрия ТҮМЕНБАЕВА,
«Күміс алқа» иегері:
– Мен үшін бұл өте қуанышты сәт. Қазіргі заманда көпбалалы ана болу, балаларыңды қатарынан кем қылмай бағып-қағып өсіру оңай емес. Дегенмен, Жаратушы балаларға жарық дүниені көруді нәсіп еткен соң оларды ризықсыз қалдырмайды. Сондықтан қазақ елінің ұрпағын көбейтуге барлық аналарды шақырмын.
Сәуле КӨЛБАЕВА,
«Алтын алқа» иегері: