Жергілікті тұрғындардың сөзінше алкогольден бас тарту бастамасын алдымен жастар көтерген. Кейін бұл идеяны ауыл тұрғындарының барлығы қолдаған. Осылайша ішімдік дүкен сөрелерінен шығарылды.
“Біздің жастар өте белсенді. Біз алкогольді пайдалануға үзілді-кесілді қарсымыз. Алкогольдік сусындардың болмауы – тыныш өмірдің кепілі. Бұл ауылдық округ құрамына 3 елді мекен кіреді. Жергілікті учаскелік инспектор қазір іс жүзінде ауылдарға бармайды”, – деді Сейфуллин атындағы ауылдың тұрғыны Нұрлан Орынбайұлы.
Учаскелік инспектор Сәкен Қартаев ішімдіктен бас тартқалы ауылда қылмыстың мүлде жоқтығын айтады.
“Соңғы жылдары бұл ауылда бірде-бір қылмыс тіркелмеген. Ауыл жастары жеке кәсіппен, мал шаруашылығымен айналысады”, – деді инспектор.
Сәкен Сейфуллин атындағы ауылда қазір барлық мерекелер ішімдіксіз өтеді. Дүкендері бар кәсіпкерлер де, тұрғындар да бұл өнімдерден өз еркімен бас тартқан.
“Есігіміз күндіз-түні ашық. Ешқандай ұрлық-қарлық жоқ. Көбі ауыл шаруашылығымен айналысады. Сондай-ақ біздің ауылдың жігіттері спортқа бейім, мықты. Жастар егін егеді. Ауылда шаруа қожалықтары көбейіп келеді. Қазір олардың саны 85”, – деді Сейфуллин ауылының тұрғыны Алданыш Әменов.
Материал: Stan.kz сайтынан алынды
Фото: көрнекілікке