Талай Олимпиаданы көрдім. Бірақ дәл мынадай сорақыны көргенім осы. Оны өздеріңіз де сезіп отырған боларсыздар. Әңгіменің ауаны кім, не жайлы екенін. Осы жайындағы сөзім жалаң болмас үшін бокс құрамасының бас бапкері Мырзағали Айтжановпен арадағы сұхбатты назарларыңызға ұсынбақпын. Одан бұрын өз ойымды ортаға салайын. Іштегі шерді ақтарып, сырыммен бөлісейін.
Мені толғандыратын мына мәселе – күндердің күнінде төрт жылда бір келетін Олимпиада ойындарының қызығы кетіп, тіпті сағына күтетін жарысқа ешкімнің қатысқысы келмей көптеген мемлекеттің бәсекеден бас тартуы мүмкін, жанкүйерлердің келмей қалатын қаупі де жоқ емес. Дәл осылай жалғаса берсе. Тарихтан белгілі, Олимпиаданың түбіне жеткен тұлғалар болған. Бір мәрте жерге жығылып барып қайта түрегелген доданың болашағы бұлыңғыр болып бара ма, қалай? Әлемді жаулаған допинг, коммерциялық үрдістер Олимпиаданың түбіне жетпей қоймайтын секілді. Сол кезде спортшы мен спорт тілшісінің арманы – Олимпиада дуына қосыламыз деген мақсатын да желге ұшырамыз-ау.
Ия, енді жарыстың соңғы күнінде көрген оқиғаға көшейін. Қазақстан мемлекеті үшін маңыздысы бокс спорты екенін жақсы білесіздер. Құдайға шүкір, топқа түскен боксшыларымыз ауыз аштырып, көз жұмдыратын өнерін көрсетіп жатыр. Жарыс күн сайын ширығып, қызығы мен қиындығын көрсетіп келеді. Пышақтың қырында жүрген спортшылардың жеңісіне сүйініп, жеңілісіне күйіну біздер үшін де, сіздер үшін де оңайға соғып тұрған жоқ. Неге десеңіз, Олимпиадалық ойынға спортшылар ғана емес, сырттағы адамдардың да араласа бастағаны жиырма жылдың мәселесі болып қалды. Егер допинг мәселесін сонау 1996 жылы Хуан Самаранч дүниеге әкелді, соны шектеуге, тоқтатуға күш салып, арнайы комитет ашып берді дейтін болсақ, Олимпиадаға жекелей адамдардың қол сұққанына, яғни ұйымдастырушылармен жең ұшын жалғастырған делдалдарға да осынша уақыт болды. Өкінішке қарай бұл шындық, оны ешкім де жасыра алмайды. Дәл қолынан ұстап алған адамдар да бар. Естеріңізде болса, сонау 2002 жылы Солт лейк ситиде өткен қысқы Олимпиада ойындарының қарсаңында ағылшынның «ВВС» компаниясы Олимпиада өткізетін жерлерді, өткізу құқығын олимпиадалық комитет өзі сатады екен деген сөзді естіп тәжірибе жасаған болатын. Олар біреулер арқылы Олимпиаданы бәленше елге сату туралы ұсыныс енгізген әдейі. Ал өздері сыртынан осының барлығын жазып жүрген. Сол кезеңде халықаралық олимпиадалық комитеттің бір мүшесі басқалармен ақылдаса отырып, бұл уәжге көнген. Қанша ақша алатынына дейін айтқан. Сөйтіп, компания оларды ұстап, еш жаққа бұлтартпайтын дәлелдермен анықтап, ақыры үлкен шу жасаған еді. Сөйтіп тұтылған адам қуылып, тиісті жазасын алған болатын. Бірақ мұнымен бүтін комитет тазалана қалған жоқ. Сол жегідей жейтін құрт жең ұшымен жалғасып бүгінгі күнге дейін келе жатқан секілді. Тіпті тереңдей түскен десек артық айтпағанымыз.
Жарайды, ол өзге тақырып. Біздің айтпағымыз бүгінгі сынға түскен боксшыларымыз жайында. Әрине, қуанышы мен реніші көп болып тұр. Сенім артқан серкелерімізді жарыстан шығарып тастап жатыр. Әуелі алақанымызда тұрған алтынды жұлып алып, көпе-көрнеу басқаның қолына ұстатқаны үлкен қиянат. Жүлдеміз жоқ деуге болмайды. Бүгінгі күнге дейін тоғыз медаль бар. Бірер жүлде көз жанарымызда тұр. Оның қандай болатынын уақыты келгенде айтатын боламыз. Ал жігіттеріміздің өкініші кімді болса да бей-жай қалдырмады. Оны әлем мойындап отыр. Мен соны дәл алдында өз көзіммен көрдім. Зығырданым қайнап, күйіндім. Қаным басыма шауып, аузымнан жүрегім шығып кете жаздағандай күй кештім. Жұдырығымды түйгенде уысымда тұрған қаламсап үгітіліп жерге түсті. Мені мен сіздер осындай күй кешкенде бас бапкердің жаны не болды? Қазақтың қара баласы намыстан тұтығып кетті. Өкініштен бармағын шайнады. Ренжіді, намыс тапталып бара жатқанын көрді. Қолында тұрған жеңісті әділетсіз түрде жұлып алып басқаға бергенде айтарға сөз таппады. Атып шығып дау жасауға дәрмені жоқ, заңдылығы бойынша құқығы жоқ. Ақыры іштей тынды. Оны сырттан тұрып бақыладық, көзімізбен көрдік, іштей сездім. Осыдан кейін бапкерді сырласуға тарттым. Ия, одан бұрын тағы мәселені айта кетейін. Левиттің кездесуі аяқталғаннан кейін баспасөз мәслихатында айтқан жауабын баяндай кетейін. Мәслихатта ең бірінші сұрақты мен қойдым. Айналайын Вася, ең алдымен сені Олимпиаданың күміс жүлдесімен құттықтаймын! Енді финалдық бәсекеден кейін сенің жүрегіңде қандай да бір ой қалды ма дедім. Левит сабырлы, салмақты азамат екен. Ешкімге топырақ шашуға тырысқан жоқ. «Мен бұл тағдырыма ризамын – деп бастады. – Олимпиаданың күміс жүлдегері атандым. Финалдағы шайқасымды өздеріңіз көрдіңіздер. Оған баға беретін мен емес. Бағаны мамандар мен сіздер бересіздер» деді. Одан кейін Ресейдің боксшысы Евгений Тищенкоға бір орыс журналисі сұрақ қойды. «Финалдың нәтижесін біз әділетсіздік деп ойлаймыз. Сіз өзіңіз қалай қарайсыз?» деді. Женя да өте білімді, салауатты жігіт екен. Сөзінде «Мен шаршы алаңда болдым. Сондықтан да екеуміздің кездесуіміздің нәтижесін, кімнің жеңгенін тап басып айта алмаймын. Оған менің қақым да жоқ. Бес жақта отырған төрешілер, одан кейін жюри мүшелері бар, солар шешті. Егер олар жеңіс менікі деп шешкен болса, яғни себептері болған шығар» – деді. Содан біздің журналист сұрақ қойды. Осы әділетсіздік емес пе, әділеттілікке қашан жетеміз деп. Бұл сұраққа Евгений Тищенко «Егер бәсекенің шешімі дұрыс шықпаса онда мен жеңісті қолдан берген Василий Левиттен кешірім сұраймын» – деп жауап қайтарды. «Бірақ, мен оны тап басып тағы да айта алмаймын. Мен чемпион болып қолымды көтергенде залдағылар ысқырып, келіспейтіндерін көрсетті. Ол маған ауыр тиді. Мен жанкүйерлерді де, қарсыласымды да қатты құрметтеймін. Істің тағдырын шешу менің қолымда емес екенін тағы да айтамын» – деп тындырымды жауап қайтарды. Мен екеуіне де риза болдым. Бір-біріне топырақ шашпай, нағыз спортшы екендерін айқын дәлелдеді. Спортшы ретінде шайқаста олар шайқасатындығын, төрелікті төрешілер беретіндігін тағы да бір астын сызып тұрып айта кеткенді жөн санадым. Енді Мырзағалидың жауабына құлақ түрейік.
– Мырзажан, бүгінгі шаршы алаңға шыққан боксшылар туралы айтып берсең? Олжастан бастасақ.
– Боксшылардың барлығы жанкүйерлерін жерге қаратып жатқан жоқ. Бар күштерін салып жатыр. Оған шеберлігі де, таланты да, күші де жеткілікті.
Ал Олжас жайлы айтар болсақ, кездесу жайы бүкіл әлемге аян. Ол қарсыласынан еш кем түскен жоқ. Бас бапкер ретінде нақты айта аламын. Жеңіс біздікі еді. Әттеген-ай, төрешілер жеңісті алып қойды. Бұл Олжасқа қатты ауыр тиді. Мен де жетісіп отырған жоқпын.
– Жеңісіне нақты сенімді болсаңыз шағым жасауға болмай ма?
– ... Бояуы сіңгенен кейін еш нәрсе өзгермейді. Осыдан-ақ байқауға болады. Құйтырқы ойындардың басталып кеткенін.
– Сенім артқан Жәнібекке не болды? Ол да төрешілердің құрбаны болды ма ?
– Арандары ашылып кеткендігі сонша, боксшыларды тірідей жерге тыққандай. Расымен де біздің жігіттердің сағын сындырып келеді. Жәнібек ең талантты боксшының бірі. Алтынға лайықты жігіт. Чемпион болып тұрса қандай керемет, тіпті жарасып-ақ кетеді. Оны да жарға жықты. Төрешілер өз қолдарымен итеріп құлатты десек болады. Шайқасын сүреңсіз деп айтуға келмейді. Тағы да жеңіліс...
– Данияр финалға өтті. Тапсырмаңызды толық орындады ма?
– Даниярдың қарсыласы өте мықты. Мықтыны мықты деп мойындауымыз керек. Данияр сауатты бокстасты. Барлық тапсырманы тыңғылықты орындады. Мәртебесі биік жарыс болғасын қарсыластар түрлі әрекеттерге барады. Жеңіс үшін ештеңеден аянбасы анық. Бірінші раундтан бастап ұпай санын молырақ жинады. Ақыры шамасының жетпейтінін білген қарсыласы Даниярды баспен сүзіп, маңдайын жаралап тастады. Осы әрекеті үшін жарыстан шығып қалды. Төрешілер жеңісті бізге жазды.
– Жарақаты ауыр секілді. Финалға шықпай қалу каупі жоқ па?
– Иә, маңдай терісі қақ ортасынан жыртылып кетті. Дәрігерлер тігіп қойды. Бір күн демалысымыз бар. Рұқсат етуге тиіс. Егер рұқсат етпесе амал қанша? Жарақаты ауыр болса да Данияр оған қарайын деп тұрған жоқ. Финалда нағыз майдан болады. Алтынды уыстан шығармаймыз.
– Левиттің жеңісі кімге тиесілі?
– Левит жарады! Барлық тапсырмаларды ойдағыдай орындады. Үш раундта да қарсыласын бет қаратпай соқты. Жеңіс біздің қолда еді. Төрешілер тағы қиянат жасады. Тіпті ресейліктің қолын көтергенде залда отырғандар шыңғырып, ысқырып, беттеріне түкіруге жақын қалды. Әлем мойындап отыр. Жеңіс Қазақстандікі екенін. Өзінің жеңісіне шынайы қуана алмаған боксшыны осындай күйге жеткізген АИБА-ға таңым бар. Қараңыздыршы, Тищенконың қолын көтергенде бетінде қуаныштың лебі мен шаттық жоқ. Әрине, боксшының кінәсі жоқ. Барлығына кінәлі төрешілер және ортада құйтырқы әрекеттерге барып жүрген адамдар деп ойлаймын. Ал Женя болса менен кешірім сұрады.
– Мұндай әділетсіздікті бұрын бастан өткіздің бе?
– Дәл осындай сорақылықты көрмедім. Бәрін АИБА есеппен істеп отырғаны айқын көрінді. Сондай-ақ, әрбір мемлекет өздері үшін қалай жұмыс жасап жатқанын осыдан көруге болады. Біздің жігіттер күйіп кетіп жатыр. Біздің басшылықтың осыған назар аудармағанына қайран қаламын. Менің еш құқығым жоқ. Мен тек бапкермін. Былайша айтқанда әскербасы. Ал жігіттерім шайқас өнерінің әскерлері. Мен оларды шайқасқа, ұрысқа, бокске ғана дайындаймын. Сол әскерлерімнің таза майданда емес, әділетсіз күрестің құрбанына айналып жатқанына қарным ашады. Жерге қаратқан жігіттерім жоқ. Мен сеніммен айтамын.
– Әңгімеңізге рахмет!
Қызықтың көкесі
CompuBox жүйесінің есебі бойынша, қазақ боксшысы қарсыласына қарағанда әлдеқайда көп соққы жұмсаған және дөп тию көрсеткіші жағынан да Левиттің дәлдігі екі есеге көп.
Мәселен, үш раунд бойы Василий Левит 234 соққы жұмсапты, оның 62-сі (26,5 пайыз) қарсыласына дәл тиген. Джеп соққыларының саны – 55, дәл тигені – 5 (9,1 пайыз). Ауыр соққылары – 179, дәл тигені – 57 (31,8 пайыз).
Тищенко болса небәрі 175 соққы жұмсаған көрінеді. Оның тек 35-і ғана қарсыласына дәл тиген (22,3 пайыз). Джеп соққыларының саны – 44, дәл тигені – 4 (8,3 пайыз). Ауыр соққылары – 109, дәл тигені – 31 (28,4 пайыз).
Несіп Жүнісбайұлы, белгілі спорт журналисі, Алматы облысының Құрметті азаматы, арнайы «Жетісу» газеті үшін Рио Олимпиадасынан.