Оқи отырыңыз
Қазақстанның Бас санитар дәрігері Жандарбек БЕКШИН әлемді жайлап бара жатқан коронавирусқа қатысты екіұшты сөз сөйлеп, көпшіліктің сынына ұшырады. Ол өз сөзінде: «Бұл індет ақыры бізге де келетін сияқты. Елімізде 11-16 наурыз аралығында анықталуы мүмкін», - деген еді. Осыған орай www.nege.kz сайты Бас санитардан айтқан сөзін толығырақ түсіндіріп беруді сұрады.
"Біз осыдан кейін ҚР Бас санитарлық дәрігері Жандарбек Бекшинге телефон соғып, өз аузынан естігенді жөн көрдік," - деп жазды nege.kz сайтының тілшілері.
– Жандарбек Мұхтарұлы, сіз бүгін 11-16 наурыз аралығында коронавирус анықталуы мүмкін дедіңіз? Мұны неге сүйеніп айттыңыз? Әлде, жасырып отырсыздар ма?
– Иә, айттым. Бірақ 11-16 наурыз десем де, бір айдың ар жақ, бер жағында дедім ғой.
– Егер коронавирус тіркелмесе, бұлай айтудың жөні бар ма?
– «Бізге келе ме? Алдын ала болжам бар ма?» деген сияқты сұрақ көбейді.
– Карантинде жатқандардан анықталуы мүмкін бе?
– Әзірге шыққан жоқ. Қазір коронавирус тіркеліп жатқан елдің саны көбейіп жатыр. Қытайдан бөлек, Оңтүстік Корея, Иран, қазір бүкіл Еуропадан анықталуда. Осыған байланысты біздің ғалымдар әрі кетсе 1 айдың ішінде елімізде шығуы мүмкін екенін айтты.
Осыдан кейін аталмыш сайт тілшісі 200-ге жуық адамды, оның ішінде, Қытай, Оңтүстік Корея, Моңғолия азаматтарын карантинге жатқызып, бақылап отырған мекеме - Алматы қалалық денсаулық сақтау басқармасының басшысы Тілеухан Әбілдаевтан мән-жайды сұрап білді.
– Тілеухан Шілдебайұлы, Бас санитар дәрігер Жандарбек Бекшин 11-16 наурызда коронавирус анықталуы мүмкін екенін айтты. Сіз не дейсіз?
– Айтса, өзі жауап берсін. Мен ешнәрсе айта алмаймын. Ол менен жоғары дәрігер ғой. Математикалық моделдеу деген бар. Бұл – ғылыми болжам. Бүгінде әлемнің 109 мемлекетінде тіркелді. Жанымыздағы Ресейде де анықталды. Сосын ол жақтан келіп-кетіп жатқан қонақтар бар.
– Коронавирус Алматыда карантинде жатқандардан шығып жатқан жоқ па?
– Жоқ, шыққан жоқ.
– Әлде анықталып қойып, соны 11-16 наурыз аралығында жариялайын деп жатыр ма?
– Жоқ, ешкім ондай жауапкершілікті мойнына ала алмайды. Шықса да, сол күні айтады.
Республикамыздың Бас санитары атышулы сөзінің соңында бұл тек болжам ғана екенін айтып, халықты тынышталдырғысы келді. Алайда әлеуметтік желіде дәрігердің екіұшты жауабы қызу талқыланып, тіпті, мазақ ету мақсатында құрастырылған картиналар тарап кетті. Әуелгі сөзінде: «11-16 наурыз арасында дерт жұқтырғандар анықталуы мүмкін», - дейді де, артынша жай ғана болжам деп тайсақтайды.
Бұл сөзі елімізге жан-жақтан келіп, карантинге жатқызылғандардың ішінен вирус жұқтырғандар табылды ма немесе жағымсыз ақпаратты бірден жайып салудан қашып отыр ма деген күдік ұялатты. Қазақтың «Ауруын жасырған өледі» деген даналығын ұмытпасақ болғаны.
"ЖЕТІСУ-АҚПАРАТ"
