Оқи отырыңыз
Алматы қаласындағы «Тұлпар» ат спорты орталығының ұйымдастыруымен БАҚ өкілдері арасында ҚР Еңбек сіңірген қайраткері, Қазақстанның Құрметті журналисі Нұртілеу Иманғалиұлы, С.Бердіқұлов атындағы сыйлықтың лауреаты Амангелді Сейітханов және ҚР Президенті сыйлығының иегері, Қазақстан Журналистер одағы сыйлығының лауреаты, «Ерен еңбегі үшін» медалінің иегері Бейсен Құранбекті еске алуға арналған шағын футболдан республикалық турнир өтті.
Өнертану докторы, профессор, Қазақстанның еңбек сіңірген қайраткері Арыстанбек Мұхамедиұлының мұрындық болуымен өткен турнирге Шығыс Қазақстан облысынан «Шығыс ақпарат», Жамбыл облысынан «Taraz Press» командасы, Алматы қаласынан «КТК/Халық арна», «Қазақ газеттері» «Намыс», «Хабар», «Шұғыла» жастар командалары және облысымыздың «Qareket» командасы қатысты.
Майталман журналистерді еске алуға арналған спорттық доданың қатысушыларына Мәдениет және спорт министрі Дәурен Абаев құттықтау хат жолдап, сайысқа қатысушыларға сәттілік тіледі. Дүбірлі доданың ашылу салтанатына облыстық «Жетісу» телеарнасының директоры Серік Әбікенұлы, қазақ спорт журналистикасының ақтаңгері Несіп Жүнісбаев, Нұртілеу Иманғалиұлы мен Бейсен Құранбек сынды дарабоз таланттардың өмірінің соңына дейін жемісті еңбек еткен қара шаңырағы «Қазақстан» корпорациясының Алматы филиалы директорының орынбасары Руслан Қосанов, Нұртілеу Иманғалиұлының зайыбы Қарлығаш Табулдинова, белгілі спорт журналисі Ақын Ордабай арнайы келіп қатысып, ұйымдастырушыларға зор алғыстарын жеткізіп, ойыншыларға сәттілік тіледі.
Турнир тартысқа толы болды. Журналистер ала допты ұршықша иіріп, жеңістің желкенін көтеру үшін барын салып ойнады. Жарыс қорытындысы бойынша облысымыздың «Qareket» командасы 1-орынды жеңіп алса, 2-орынды «КТК/Халық арна» командасы еншіледі. Ал «Шығыс ақпарат» командасы үздік үштікті түйіндеді. «Қазақ газеттері» командасы Нұртілеу Иманғалиұлы атындағы арнайы жүлдемен, «Намыс» футбол командасы ұйымдастырушылардың арнайы жүлдесімен марапатталса, облыстық «Жетісу» телеарнасының арнайы сыйлығы «TarazPress» командасына бұйырды. Сонымен қатар, турнирде ерекше ойынымен көзге түскен үздік ойыншы, үздік қақпашы, үздік қорғаушы, үздік шабуылшы да марапаттан тыс қалмады.
Соңында жарыс ұйымдастырушысы Жасұлан Қыдырбаев қатысушыларға алғысын білдіре отырып, айтулы жарыстың жылда дәстүрлі түрде өтетінін айтты.
"ЖЕТІСУ-АҚПАРАТ"
