Бүкіләлемдік қысқы Универсиаданың басталуына 204 күн қалды. Алатаудың етегін дүбірге бөлейтін додаға бүгінде қызу дайындық жүріп жатыр. Ұлы Даланың айбынын асыратын спорт жарысына арналған нысандар бірінен кейін бірі бой көтеріп, ару Алматының ажарына ажар қосып отыр. Бұл туралы 2017 жылғы 28-ші қысқы Универсиадаға дайындық пен оны өткізу бойынша дирекция директоры Наиль Нуров «Hard Rock Cafе Almaty» мейрамханасында өткен журналистермен кездесуде мәлім етті.
Қазіргі таңда Универсиада нысандарының құрылысы 80 пайызға аяқталып қойды. Оның ішінде 12 мың көрерменге арналған Мұз сарайы бар. Нысандар күзгесалым пайдалануға беріледі. «3 мың адамдық және 12 мың орынды Мұз сарайының құрылысы уақытысында емес, одан ертерек аяқталады. Өз кезегінде өзге нысандар қазір жұмыс істеп тұр, тек қажетті толықтырулар, техникалық жарықтандыру жұмыстары қажет. Бұл жерде айтарлықтай мәселе жоқ. Тек «Алатау» шаңғы-биатлон кешенінде локациялық жүйелерді орнатуда техникалық қиындық бар. «Шымбұлақ» пен «Сұңқар» трамплиндер кешенінде де жаңарту жұмыстары жүреді», – деді Наиль Нуров.
Сондай-ақ, Универсиада тарихында алғаш рет салынып жатқан Атлеттер қалашығында да жетілдіру жұмыстары жүргізілуде. Барлық қатысушының басы тоғысатын бұл жерде Қазақстанның кешегі мен бүгінгі тарихынан сыр шертетін үлкен мәдени бағдарлама ұйымдастырылады. Наиль Нуровтың хабарлауынша, Алматыдағы Универсиаданың құрылыс нысандарын 35 ел жоғары бағалады.
– Жұмыс қызу жүріп жатыр. Қатысушы елдердің соңғы саны жылдың соңында белгілі болады. Мұнда біз «FISU» (Халықаралық студенттер спорты федерациясының), Қайрат Закирьянов басқаратын Ұлттық студенттер спорты одағының жұмысына сенім артып отырмыз. Біздің мақсат – рекордтық 52 ел қатысқан Эрзурумде өткен ойындардан кем соқпау», – деді дирекция жетекшісі.
Қазақстан бүгінде 64 елді, 2 мың спортшы мен делегатты, 3 мың еріктіні, 30 мың туристі барлық жағынан қабылдауға әзір. Универсиада – бұл шын мәнінде спорт тарихындағы ең ірі іс-шаралардың бірі. Оның негізгі міндеттерінің бірі – Универсиада философиясына үлкен өзгерістердің енуі. Универсиаданы Олимпиадаға дайындық кезеңі деп емес, өзін-өзін қамтитын жоба деп есептеген абзал.
Дирекция басшысы Универсиаданы қоғам жастар мен студенттердің фестивалі, спортшылардың форумы ретінде қабылдайтынын айтады. Студент – еліміздің болашағы және ертеңгі күн тәртібін қалыптастырушы, кез келген елде қоғамның ең озық сегменті. Ендеше, бүгінде Универсиада – ең жарқын спорттық жастар форумы болып есептеледі. Біз осы арқылы өскелең ұрпаққа Қазақстан туралы айтып, отаншылдық рухтың дәнегін себеміз.
Қазақстан Универсиаданы жарқын қылып өткізуге даяр. Өйткені, Универсиаданың теле аудиториясы бір миллиард адамды құрайды.Атап кетейік, тілшілерге арналған асты ұйымдастыруға «Hard Rock Cafe Almaty» ұжымы қолдау білдірді. «Hard Rock Cafe» – 1971 жылы құрылған халықаралық франчайзинг мейрамханаларының америкалық желісі. Бүгінгі таңда әлемнің 64 елінде 200-ден астам бөлімшесі бар. Қазақстан аталған мекеме ашылған 59-шы мемлекет болып тіркелді. «Hard Rock Cafe Almaty» Азия елдері бойынша Мәскеуден кейінгі 13 жылдан бері істеп келе жатқан танымал кафе болып табылады. Мәңгілік Елдің мерейі Алатау мен Алматыны әлемге тағы да таныта түсетін Универсиадамен үстем.
Қуаныш ТҰНҒАТАР