Ассалаумағалейкум, Алаш жұрты! Оңтүстік Америка, Бразилия, Рио төрінен ақжолтай хабар таратып, баспасөз арқылы сіздермен қауышып отырғаныма қуаныштымын. Айтатын жаңалық көп. Барлығыңыз да елеңдеп әңгіменің тиегін ағытса деп тосып отырсыздар. Әсіресе, мен арнайы жазып отырған Жетісу жұртшылығы бұл дүбірге тоғыз бірдей тұлпарын қосып, тақым қысып отырғандарыңызды білемін. Сенім артқан серкелердің жолына үмітпен қарап, жандарыңызды шүберекке түйіп жүрген жанкүйердің мауқын бір басайын деген ниетпен әңгімемді бастайын. Көптен күткен алау тұтанды. Тоқсан мың жанкүйерді бауырына басқан «Маракана» стадионы лық толы. Сарайыңды ашатын, төрт жылғы сағынышты басатын Олимпиаданың ашылу салтанаты да өз деңгейінде өтті. Спорттың қырықтан аса түрінен сынға түсетін спортшылар қаланың әр түкпірінде бақ сынауда. Тілшінің міндеті додадан жаңалық таратып, жанкүйермен тезірек қауыштыру. Бірақ компьютердің заманы, жаңа технологияның дамыған кезінде жылт еткен жаңалықты бізден гөрі сіздер бұрын естисіздер. Сондықтан мен осы ашылу салтанаты мен күрестен кейінгі түйген ойыммен бөлісіп, өз пікірімді жеткізейін. Ал бастадық.
Ең әуелі байқағаным, біздің қоржынға жүлде салған дзюдо бәсекесіне 35 спортшы тіркеліпті. Бұл дегеніңіз Олимпиада жарыстары үшін өте көп. Бұрында жақсылап тұрып іріктеп алатын ұйымдастыру алқасы. Бұған дейін небәрі 20 балуан, боксшы, тағы басқа спорт түрлерінде де осы есепті нық ұстайтын. Ал бұл жолы 35 балуанды көргенде менің көзім шарамнан шығып кете жаздады. Соған қарап мен былай деп те ой түйдім. Әлемдегі жеті миллиардқа жуық адамның, әсіресе, ер адамдардың салмағы орта салмақтан төмендеп бара жатқандай көрінеді. Бұл пікірім, дұрыс түсініңіздер. Бір жағы қалжың болғанымен түбінде шындық жатыр. Ұсақталу процесі басып бара жатқандай. Жарайды, басты мәселе бұл емес. Осы отыз бес адамның арасынан жарып шыққан Елдос Сметовті біз қол шапалақтап қарсы алдық. Сіздер теледидардан қарсы алдыңыздар. Жарыс біткесін Елдос баламыз қос қанатын жайған құстай ұшып, жарыс өткен «Кариоко» стадионының ішінде жүр екен. Бет-жүзінен бір өкініш, бір қуаныш байқалады. Біз оның жағдайын жақсы түсінеміз және қолдаймыз. Олимпиаданың күміс жүлдесі қазақ баласының кеудесінде күндей жарқырап жүргенін көрдік. Күтіп те тұрдық. Мен секілді жазатын журналистердің арманы Елдосты құшақтарына қысу. Ол сәтке де жеттік. Барша тілшілер қауымы мен спорт мамандары, шенеуніктер, ыңғайын тауып қарауылдан өтіп кеткен туристер де кезек-кезек Елдосты құшағына қысып, құттықтап жатыр. Мен де жүлде алған баламды құшағыма қысып, маңдайынан сүйіп құттықтадым. Сол аралықта сұрақ та қойып үлгердім. Елдостың әңгімесін соңына қалдырайын. Қуанышты хабар болғасын бірден осыған түсіп кетіппін. Ең алдымен Олимпиаданың ашылу салтанатынан бастайын.
ХХХІ жазғы Рио-де-Жанейро Олимпиадасы ашылу салтанаты біз бала күнде еститін «Маракана» стадионында өтті. Бұл стадионда мен бірнеше рет болғам. Пеленің отаны саналатын Бразилияның негізгі ойыны футбол болғандықтан, көптеген чемпионатқа қатысқам. Бұған негізінен екі жүз мың адам сиятын. Олимпиада ашылуында стадионның бір жақ шетін шорт кесіп, сахна жасаған. Сондықтан болар, салтанатты шараны көз алдында тоқсан мың адам ғана көре алды. Мен көптеген Олимпиада ойындарының ашылу салтанаты мен түрлі спорттық шайқастарға қатыстым. Ендігі осы жерде айтайын дегенім, Пеле жайлы. Ашылу салтанатында алауды Пеле жағады деп ойлағанбыз. Әр оқиғаға сын көзбен қарайтын мен үшін аты аңызға айналған Пеленің айтулы мерекеге қатыспағаны көңілге кірбің ұялатты. Жалпы ашылу салтанатын керемет деп айтуға аузым бармайды. Біріншіден, тоқсан мың жанкүйер тамашалаған Олимпиаданың ашылуы Бразилияның дәстүріне сай биімен басталды. Бидің қаншалықты әсерлі болғанын сіздердің талқылауларыңызға қалдырдым. Ал одан кейінгі көрініс мен үшін қызықты болды. Мұхит жағалауында тұрып жатқан елдің тұрмыс-тіршілігі, әр қиырдан жиылған халықтың салт-дәстүрі мен мәдениеті, байырғы халықтардың тарихы, мұхит жағасындағы негізгі кәсібі балық аулау секілді қойылымдарды әлемге паш етті. Балқаш көлінің жағасында өскен бұл көрініс менің сонау балалық шағымды қайта еске түсіргендей болды. Екінші бөлігінде ғылыми басқа да жетістіктер жайлы ұсынылды. Бұл да таптаулы жол. Неге десеңіз, бұған дейінгі олимпиадаларда мұны қайталаған болатын. Біржақты сыни көзбен қарады деген ойдан аулақ болыңыздар. Көңілге медет болатын жайлар да бар. Ғылыми-техникалық прогресс өркендеген сайын жаңалықты, жақсылықты небір кереметті көргің келеді. Жеті жыл бойы дайындалған мемлекеттің көз қарықтырар жаңалығы болса екен деп армандайтынымыз анық. Тағы бір мәселе, спортшылардың шеруі екі сағаттан аса уақытқа созылды. Ұзақ уақыт жиылған жанкүйерді жалықтырып жібергендей. Мұны да бір ізге түсірмесек, жаңалық ашпасақ, кейінгі жазғы олимпиадаларда барлығының тамашалайтын көрінісі тек спортшылардың ту көтеріп шығуы ғана болып қалмақ. Бұл, әрине, керек процедура. Болғаны дұрыс, тек жаңаша жолын тапса деген ой. Ал біздің мемлекеттің Көк туын талантты спортшы 85 келідегі таэквондошы Руслан Жапаров алып шықты. Өте әдемі, көзімізге жас үйіріп қолдау көрсеттік Ұлттық құраманың киген киімі де тамаша болды. Алпауыт елдердің көбісінен біздің киім ерекшеленіп, әдемі қалпында алдымыздан жүріп өтті. Осы жерде осыншама ұзақ уақытқа созылған шеруде біз арнайы аккредитация алып кіргенімізбен, бәленшебай доллар төлеп кірген жанкүйерлердің алтын уақытын аяп кеттім. Олимпиаданың ең тұздығы алау жағу. Осы сәтке футбол каролі Пеленің қатыспауы көпті алаңдатты. Бразилияда тұңғыш рет өтіп отырған Олимпиада алауына аты аңыз болған адамның айтулы шараға қатыспауы мені де жабырқатты. Расымен де, алауды тұтату тек осындай азаматтың құрметімен бастау алса, бәсекенің абыройын көтермесе, бәсеңсітпесі анық. Бұл жайлы да түрлі әңгіменің шеті шықты. Бірі денсаулығы десе, екіншілері ірі жобаға келісімшарт жасау сәті осы күнге белгіленіп, уақытының болмағандығын айтады. Бұл жайлы барлық баспасөз беттерінде қызу талқыланды. Әлем бойынша қызу талқыланып бара жатқан әңгіме тым тереңдеп кеткенін сезген Пеле өзі жауап берген еді. Алдын ала жоспарлап қойған келісімшарт оңды шешіліп, уақыт болып жатса қатысуға тырысамын деген-ді. Ал мен бұл жерде басқа мәселенің ұшығын көріп тұрғандаймын. Мүмкін қателесуім де ықтимал. Мен де пендемін. Сондықтан жеке пікірім деп қабылдаңыздар. Сонау 60-шы жылдары Пеле болып доп тебу әр футбол сүйер қауымның арманы еді. Небәрі он сегіз жасында әлемдік футбол мамандарының көзіне ілігу, үш дүркін Әлем чемпионы деген атаққа қол жеткізу әркімнің қолынан келе бермейтін іс. Ал осындай аңыз адамның шараға қатыспауы ұйымдастыру алқасының шалалығы деп білемін. Менің ойымша Пеленің туған елімен, олимпиадалық комитетпен арада келіспеушіліктер бар ма деп те ойлаймын. Жеті жылдан бері қолға алынып келе жатқан істі бір ғана келісімшартпен сылтаулаудың еш реті жоқ. Соған қарағанда түбінде бір шикілік бар. Біз мұны қанша баспасөз бен интернетті ақтарсақ та таба алмадық. Ал алау жағуда түрлі қызықтарды көргенбіз. Адамдардың үстімен өрмелеп, садақпен атып жамбыға тигізіп небір адамның басын айналдыратын техникалық прогрестің көмегімен жаққан сәттерді көргенбіз. Ал бұл жолы от жағу қарабайыр болып қалған секілді. Тізбектей берсе сөз көп. Тырнақ астынан кір іздеу емес. Қалай болғанда таңдайымызды қағып, көзімізді жұмамыз деген ойымыз іске аспағаны ішімізді қынжылтты. Бір сөзбен айтқанда, Рио Олимпиадасының алғашқы қадамы осылай жасалды. Енді бағанағы Елдос балама оралайын. Құшағыма қысқан Елдосқа қойған алғашқы: «Елдос, айналайын, жүлдең құтты болсын! Сенің күмісің алтыннан да артық біз үшін, қазір қандай көңіл күйдесің?», – деген сауалға қысқа ғана жауап берді. Сол кезде Елдос: «Аға, қуаныш пен өкініштің арасында тұрмын. Өзіңіз білесіз, қуанышым елімнің, халқымның, жұртымның бір ісіне жарадым. Олимпиададан күміс жүлде сыйладым. Ал өкінішім қол созымда тұрған алтыннан айырылып қалғаным. Осының барлығын жүрегімнен қайта өткізіп, келесі Олимпиадада алтынға алмастырамын», – деді. Бұған біздің ішіміз жылып, күмісі алтынға тең асылымыздың маңдайынан сүйіп құттықтадық. Біздің де күткеніміз осы болатын, одан асқан жауапты да керек етпедік.
Бұдан кейін баспасөз мәслихаты өтті. Оған әлемнің түкпір-түкпірінен келген журналистер қауымы қатысты. Елдостан басқа жүлде алған төрт спортшының барлығы келді. Қола алған қызымыз Галбадрах Отгонцецег те болды. Қоланы уысына қысқан Галбадрах сұрақтарға қысқа болса да жақсы жауап берді.
– Мен бәріңізге рахметімді айтамын, әсіресе, қолдау білдірген, барлық жағдайды жасаған қазақ халқына, спорт басшыларына, ұлттық олимпиада комитетіне және дзюдо федерациясына, – деді. – Алтын аламын деген ниетім бар еді. Бұйырғаны қола болды. Өзімнің сәл босаңсығаным болар, жастығым да шығар, қолда тұрған мүмкіндікті жіберіп алдым. Алда талай жарыс бар, сол бәсекелерден алтынмен сүйіншілеймін, – деді. Ал Елдосқа қойылатын сұрақ босқа қалды. Басында келеді деген еді. Артынша отандық тележурналистері өздерінің студияларына алып кеткенін білдік. Әрине, тілші болғасын жаңалықты бірінші және тез жеткізу дұрыс. Тек Елдосты баспасөз мәслихатына қатыстыру керек еді. Өйткені бұл жерде әлемнің журналистері күтіп отырды. Алаштың алтын баласын осындай мәслихат арқылы күллі әлемге таныстыру керек. Әлем білсін Елдосты. Сөзі мен мәдениетін, сол арқылы қазақ жұртын әйгілейтін еді. Содан барып таңға дейін студияда ұстаса нұр үстіне нұр болары хақ. Бұл менің жеке пікірім.
Несіп Жүнісбайұлы, белгілі спорт журналисі,
арнайы «Жетісу» газеті үшін Рио Олимпиадасынан.