Тәуелсіздік күні қарсаңында Балпық би ауылындағы Мұсабек Сеңгірбаев атындағы орталық саябақ аумағында бірнеше ойын алаңы ашылды. Енді көксулықтар үшін футбол, волейбол ойнайтын заманауи алаң бар. Сондай-ақ, ата-аналар балаларды қуанту үшін әткеншекке отырып, сырғанақ тебетін жер іздеп сабылмайтын болды.
Шараның ашылу салтанатында Көксу ауданының әкімі Алмас Әділ сөз сөйледі. Ол: «Жастар жылы аясында саябағымыздың келбетін өзгерттік. Футбол, баскетбол, волейбол алаңдарын жабдықтадық, жаңа заманға сай воркаут тренажерлерін орнаттық. Жарықтандыру жасадық. Жыл сайын спорт құрылымдарын көбейтіп, тиісті жұмыстарды істеп жатырмыз. Бұл бағыттағы жұмыстарды ары қарай да атқаратын боламыз», - деді.
Айта кетейік Көксу ауданында 119 спорт нысаны бар. Ауданда 41 мың тұрғын болса, бүгінде спортпен шұғылданатындардың саны 12 мың адамға жетіп отыр.
"ЖЕТІСУ-АҚПАРАТ"