Өңірлік коммуникация қызметінің ұйымдастыруымен брифинг өтті. Аталмыш жиында облыстық дене шынықтыру және спорт басқармасының басшысы Тұратбек Шарапиев есеп берді.
Төрткүл дүние тағатсыз күткен Универсиадаға облыс көлеміндегі дайындықты Тұратбек ағамыз толықтай қамтып, тарқатты.
– Қадірменді қонақтар, осындай дүбірлі доданың елімізде өтуі біз үшін үлкен қуаныш. Оған облысымыздың дайындығы да жоғары. Мәселен, Алматыда екі үлкен спорттық арена салынып, «Табаған» мәдени сауықтыру кешені күрделі жөндеуден өтті. Ендігі мәселе спортшыларымыз жүлделі орындардан көрініп, Көк туымызды биікке көтергені, – деп тебірене сөйледі.
Облысымызда қаңтар айының 28-і күні Универсиада ойындарының алау эстафетасы өтеді. «Жастар» саябағынан бастау алып, «Жастар» спорт кешенінен аяқталатын салтанатты шара тосын жаңалықтарға толы болмақ. Жалпы Универсиадаға облыстық бюджеттен 587 миллион теңге бөлінген. Қаржының басым бөлігі қауіпсіздікті қамтамасыз ету бөліміне, яғни арнайы құрал-жабдық, техникалар, киім-кешек, жол тазалайтын қызметкерлерге, құшағына үш жарым мың жанкүйерді сыйдырған «Алатау» шаңғы биатлон стадионына және 2500 көрерменді қабылдайтын «Табаған» спорт кешеніне жұмсалды. Облыс әкімінің өкімімен жедел штаб құрылып, жанкүйерлерге де барлық жағдай жасалды. Жақын маңдағы Қапшағай қаласы, Қарасай, Жамбыл, Іле, Талғар, Еңбекшіқазақ аудандарының әкімі осы жұмысқа жауапты болып, жанкүйерлерге арнайы көлік бермек. Ең бастысы, алау құтысын ұстайтындар да бекітілді. Олар байрақты бәсекеде өңіріміздің намысын қорғап жүрген спортшылар. Облыс әкімі Амандық Баталовтан құтыны алған алаугерлер Жансүгіров, Тәуелсіздік көшесімен жүріп өтеді. Сонымен қатар қаламызда 50-ге жуық билборд, 500-ден астам Универсиаданың жалауы ілінеді.
Елу мемлекеттің 220 кіл мықтылары спорттың он екі түрінен бақ сынаспақ. Оның бесеуі облысымызда өтеді. Атап айтсақ, «Табаған» спорт кешенінде фристайл мен могулдан, «Алатау» биатлон кешенінде шаңғымен қоссайыс және биатлон сайысы болады. Бұл сында облысымыздың үкілеген үміткерлері бар. Шаңғымен қоссайыстан Вячеслав Бочкарев, Расул Ғайырбеков пен Абзал Қарашалов өз өнерлерін көрсетсе, мәнерлеп сырғанауға Абзал Рахымғалиев, керлингке Ситора Аллиарова мен Темірлан Іргебай қатысады. Қарт Алатаудың шыңын еңсеріп, мұз үстіне қысқы ойынның ою-өрнегін салған спортшыларымыз биік белестерді бағындырады деген сенімдеміз!
Айдар Қалиев